માંડલ મામલતદાર કચેરીમાં મહેસૂલ કર્મચારીઓની હડતાળ: કામગીરી ઠપ, અરજદારોને હાલાકી
ગુજરાત રાજ્ય કર્મચારી મહામંડળ દ્વારા 14 માંગણીઓને લઈને અમદાવાદ સહિત અનેક જિલ્લાઓના મહેસુલી કર્મચારીઓ છેલ્લાં 3 દિવસથી હડતાળ પર છે. માંડલ મામલતદાર કચેરીના નાયબ મામલતદારો, રેવન્યુ તલાટીઓ અને કારકુનો સહિતના કર્મચારીઓએ 7મી ઓક્ટોબરથી અચોક્કસ મુદ્દતની હડતાળ શરૂ કરી છે. મુખ્ય માંગણીઓમાં નાયબ મામલતદારોની સિનિયોરિટી જાહેર કરવી, રેવન્યુ તલાટીઓ પરથી બિનજરૂરી કામનું ભારણ હટાવવું અને વિવિધ ભથ્થાં વધારવાનો સમાવેશ થાય છે. આ હડતાળને કારણે માંડલ કચેરીમાં સ્થાનિક અરજદારો, ખેડૂતો અને વકીલોના નોંધ, જમીનોના કામો સહિતના મહેસુલી કામો અટકી પડ્યા છે, જેનાથી લોકોને ભારે હાલાકીનો સામનો કરવો પડી રહ્યો છે.