2003માં દક્ષિણ આફ્રિકાના કેપ્ટન ગ્રીમ સ્મિથ, જે ત્યારે 22 વર્ષના હતા, ઇંગ્લેન્ડ પ્રવાસ દરમિયાન સ્થાનિક મીડિયાના વ્યંગબાણોનો સામનો કરી રહ્યા હતા. આ દરમિયાન, ભારતમાં જન્મેલા અને ઇંગ્લેન્ડ માટે રમેલા દિગ્ગજ ક્રિકેટર બોબ વૂલ્મરે સ્મિથની બેટિંગ ટેક્નિકમાં સુધારો કરીને એક ખાસ સલાહ આપી. તેમણે સમજાવ્યું કે ઇંગ્લેન્ડના વાતાવરણમાં બોલ મોડો સ્વિંગ થશે, તેથી ફ્રન્ટફૂટને બદલે બેકફૂટ પર રહીને રમવું અને ઓફ-સ્ટમ્પની બહાર જતા બોલથી દૂર રહેવું. આ સલાહના પગલે, સ્મિથે પ્રથમ ટેસ્ટમાં 277 અને બીજી ટેસ્ટમાં 259 રન બનાવી ઇંગ્લિશ મીડિયાને જવાબ આપ્યો.