US ઇમિગ્રેશન એજન્સી USCIS એ અનેક ઇમિગ્રેશન ફોર્મ માટે ઓનલાઇન ફાઇલિંગની સુવિધા શરૂ કરી છે. આનાથી અમેરિકામાં અભ્યાસ કરતા F-1 વિદ્યાર્થીઓ, H-1B વિઝા પર કામ કરતા કર્મચારીઓ અને ગ્રીન કાર્ડ અરજદારો માટે અરજી પ્રક્રિયા સરળ બનશે. હવે કાગળના ફોર્મ મેઇલ કરવાને બદલે અરજીઓ ઇલેક્ટ્રોનિક રીતે સબમિટ કરી શકાશે. Form I-90 (ગ્રીન કાર્ડ રિન્યૂ), Form N-400 (નાગરિકતા), Form I-130 (પરિવાર આધારિત) અને Form I-765 (EAD) જેવા ફોર્મ ઓનલાઇન ફાઇલ કરી શકાશે. USCIS ઓનલાઇન એકાઉન્ટ દ્વારા અરજદારો સ્ટેપ-બાય-સ્ટેપ માર્ગદર્શન મેળવી શકે છે અથવા PDF ફાઇલ અપલોડ કરી શકે છે.

ઘણા ભારતીય વિદ્યાર્થીઓ યુએસમાં ઉચ્ચ શિક્ષણ મેળવવાનું સપનું સેવે છે, પરંતુ હાલમાં વિઝા અને નોકરીની તકો અંગે ચિંતાઓ વધી રહી છે. AI પ્રોફેશનલ ધવલ પટેલે સલાહ આપી છે કે માસ્ટર ડિગ્રી માટે અમેરિકા ન આવો. તેમના જણાવ્યા મુજબ, ઘણા વિદ્યાર્થીઓને અભ્યાસ બાદ નોકરી મળતી નથી અને H-1B વિઝામાં પણ મુશ્કેલીઓ આવે છે. બે વર્ષના માસ્ટર ડિગ્રીનો ખર્ચ $1 લાખ સુધી પહોંચી શકે છે. તેથી, વિદ્યાર્થીઓએ યુનિવર્સિટી રેન્કિંગ ઉપરાંત જોબ માર્કેટ, ખર્ચ, સ્કોલરશિપ અને વર્ક ઓથોરાઇઝેશન નિયમોનું મૂલ્યાંકન કરવું જોઈએ.

મહારાષ્ટ્રમાં શાળાઓની 50 મીટર ત્રિજ્યામાં હાઈ ફેટ, સોલ્ટ એન્ડ શુગર (HFSS) ખોરાકના વેચાણ પર નિયંત્રણો કડક બનાવવા FSSAI દ્વારા કવાયત હાથ ધરાઈ છે. બાળકોમાં વધતી સ્થૂળતા અને બિનઆરોગ્યપ્રદ ખાવાની આદતોને ધ્યાનમાં રાખીને આ પગલું ભરવામાં આવી રહ્યું છે. ચિપ્સ, પેકેજ્ડ નાસ્તા, ખાંડવાળા પીણાં, ચોકલેટ તેમજ વધુ મીઠું, ખાંડ કે ચરબી ધરાવતા ઉત્પાદનો પર નિયંત્રણ આવી શકે છે. આ કવાયતનો હેતુ બાળકોને જંક ફૂડથી દૂર રાખી સ્વસ્થ વિકલ્પો તરફ વાળવાનો છે.

જૂનાગઢ જિલ્લાના લગભગ 100 ખાનગી શાળા સંચાલકોએ ભેગા મળીને પોતાની પડતર માંગણીઓ અંગે કલેક્ટર અને શિક્ષણ વિભાગના અધિકારીઓને આવેદનપત્ર સુપરત કર્યું છે. તેમની મુખ્ય માંગણીઓમાં ફી વધારો, RTE હેઠળના વિદ્યાર્થીઓ માટે સહાયની રકમમાં વધારો, અને FRC (ફી રેગ્યુલેશન કમિટી) ની એફિડેવિટ પ્રક્રિયામાંથી 10% થી ઓછી ફી વધારતી શાળાઓને મુક્તિનો સમાવેશ થાય છે. RTE વિદ્યાર્થીઓની ફી FRC ના ધોરણો મુજબ ચૂકવવાની અને વારંવાર પરિપત્રો દ્વારા ઊભી થતી વહીવટી મુશ્કેલીઓ દૂર કરવાની માંગ પણ કરાઈ છે.

IIT બોમ્બેના મુંબઈ સ્થિત કેમ્પસમાં એક વિદ્યાર્થી દ્વારા આત્મહત્યા કર્યા બાદ, મોટી સંખ્યામાં વિદ્યાર્થીઓએ શનિવારે (19 સપ્ટેમ્બર) આક્રમક વિરોધ પ્રદર્શન કર્યું. ઘટનાના વિરોધમાં ઉતરેલા વિદ્યાર્થીઓએ પ્રશાસન સામે સૂત્રોચ્ચાર કર્યા અને તણાવપૂર્ણ માહોલ સર્જાયો. એનર્જી સાયન્ય એન્ડ એન્જિનિયરિંગ વિભાગના બીજા વર્ષના વિદ્યાર્થીએ પરીક્ષા હોલમાં ChatGPT પર પ્રશ્નપત્ર અપલોડ કરતા ઝડપાયા બાદ જીવન ટૂંકાવ્યું હોવાનો દાવો છે, જોકે આની સત્તાવાર પુષ્ટિ બાકી છે. IIT બોમ્બે દ્વારા વિદ્યાર્થી સામે કોઈ શિસ્તભંગની કાર્યવાહી ન થયાનો દાવો કરાયો છે.

નેશનલ કમિશન ફોર ઇન્ડિયન સિસ્ટમ ઓફ મેડિસિન (NCISM) દ્વારા શૈક્ષણિક વર્ષ 2026-27 માટે દેશભરમાં 48 આયુર્વેદિક કોલેજોની માન્યતા રદ કરવામાં આવી છે, જેમાં જૂનાગઢની નોબલ આયુર્વેદ કોલેજ અને ગુજરાતની સાત કોલેજોનો સમાવેશ થાય છે. નિયમોના ઉલ્લંઘન અને શૈક્ષણિક ધોરણો જાળવવામાં નિષ્ફળતાને કારણે આ કાર્યવાહી થઈ છે. અનેક કોલેજોમાં 'કાગળ પર' દર્શાવવામાં આવેલી બોગસ ફેકલ્ટીના ટીચર કોડ 1 વર્ષ માટે સસ્પેન્ડ કરવામાં આવ્યા છે. આ રદબાતલને કારણે કુલ 620 BAMS બેઠકોમાં ઘટાડો થયો છે, જેનાથી વિદ્યાર્થીઓ અને વાલીઓમાં ચિંતા છે.

અમેરિકામાં ઉચ્ચ શિક્ષણ મેળવવાનું આયોજન કરી રહ્યા છો? ફોર્બ્સ મેગેઝિન દ્વારા 2027 માટે જાહેર કરાયેલ રેન્કિંગ મુજબ, પ્રિન્સટન યુનિવર્સિટી રોકાણ પર શ્રેષ્ઠ વળતર (RTO) આપતી ટોચની US કોલેજ છે. આ યાદી સ્નાતકોની કમાણી, શિક્ષણ ખર્ચ, વિદ્યાર્થી લોન અને નાણાકીય સહાય જેવા પરિબળો પર આધારિત છે. City University of New York (CUNY) સિસ્ટમની સાત કોલેજો પણ ટોચની 10 માં સ્થાન પામી છે, જે દર્શાવે છે કે આ સંસ્થાઓમાંથી ડિગ્રી મેળવીને વિદ્યાર્થીઓ ઝડપથી તેમની અભ્યાસ ખર્ચની ભરપાઈ કરી શકે છે અને ઉચ્ચ પગારવાળી નોકરીઓ મેળવી શકે છે.

ગુજરાતમાં 27 કોલેજોમાં 108 લૉ પ્રોફેસરની ફિક્સ પગારની ભરતી માટે અપાયેલો વર્ક ઓર્ડર રાજ્યના ઉચ્ચ શિક્ષણ વિભાગ દ્વારા રદ કરવામાં આવ્યો છે. ભરતી પ્રક્રિયામાં કોન્ટ્રાક્ટ પદ્ધતિ અને GeM પોર્ટલના ઉપયોગ સામે હાઈકોર્ટે સવાલો ઉઠાવ્યા બાદ આ નિર્ણય લેવાયો છે. ભરતી એજન્સી મારફતે થનારી આ કોન્ટ્રાક્ટ પદ્ધતિ સામે પાટણના એક ઉમેદવારે હાઈકોર્ટમાં અરજી કરી હતી. કોર્ટે પ્રોફેસર જેવા શૈક્ષણિક પદની ભરતી માટે એજન્સીની જરૂરિયાત પર સવાલો ઉઠાવ્યા હતા. આ ફટકાર બાદ ભરતી પ્રક્રિયા પર ફરી વિચારણા કરવામાં આવશે.