અમદાવાદ ગ્રામ્ય LCB પોલીસને મોટી સફળતા મળી છે. UGVCLના વીજ થાંભલાઓ પરથી 11 KV લાઈનના કિંમતી વાયરની ચોરી કરતી રાજસ્થાનની આંતરરાજ્ય ગેંગનો પર્દાફાશ કરીને પોલીસે 6 આરોપીઓને ઝડપી પાડ્યા છે. આરોપીઓ પાસેથી 6.50 લાખ રૂપિયાથી વધુનો મુદ્દામાલ કબજે કરી કાર્યવાહી હાથ ધરાઈ છે. આ ગેંગ કોઠ અને ધોલેરા પોલીસ સ્ટેશન વિસ્તારમાં થયેલા વીજ વાયર ચોરીના 3 ગુનાઓમાં સામેલ હતી. LCB એ 1080 મીટર એલ્યુમિનિયમ વાયર સહિત કુલ ₹6,50,127 નો મુદ્દામાલ જપ્ત કર્યો છે.

જામનગરના નાગનાથ સર્કલ પાસે ચાની લારી પર ચા આપવાની બાબતે થયેલી બોલાચાલીએ ઉગ્ર સ્વરૂપ ધારણ કર્યું. મોહસીન શેખ નામના શખ્સે આમદભાઈ ઇબ્રાઈમભાઈ કુરેશીના પુત્ર જાહીદ પર પથ્થર વડે હુમલો કર્યો, જેના કારણે તેના પગમાં ફ્રેક્ચર થયું. ફરિયાદીની ફરિયાદના આધારે પોલીસે ગુનો નોંધી વધુ તપાસ હાથ ધરી છે. આ ઘટનામાં મોટરસાયકલ પર આવેલા આરોપીએ જાહીદને પથ્થર માર્યો હતો.

કોંગ્રેસ અને વિપક્ષી દળોએ ચૂંટણી પંચ સામે દિલ્હી અને ઝારખંડમાં ઉગ્ર વિરોધ પ્રદર્શનો કર્યા. વિપક્ષના 300થી વધુ સાંસદો ચૂંટણી પંચને મળવા પહોંચ્યા, પરંતુ તેમને રોકવામાં આવ્યા. રાહુલ ગાંધીએ એક વીડિયો જાહેર કરી સવાલ કર્યો કે મુખ્ય ચૂંટણી કમિશનર (CEC) વિપક્ષી સાંસદોને કેમ મળી રહ્યા નથી? દિલ્હીમાં સાંસદોની અટકાયત અને ધરણાં બાદ રાંચીમાં ચૂંટણી અધિકારીની ઓફિસ પર તોડફોડ અને કાળી શાહી લગાવી વિરોધ કરાયો. CEC જ્ઞાનેશ કુમારના રાજીનામા સુધી આંદોલન ચાલુ રાખવાની ચીમકી ઉચ્ચારવામાં આવી છે.

અમદાવાદના ન્યૂ રાણીપ વિસ્તારમાં શ્રમજીવી પરિવારના 37 દિવસના બાળક ચોરીના કેસમાં પોલીસે ચાર આરોપીઓની ધરપકડ કરી છે. બાળકને નિઃસંતાન દંપતીને 20 લાખ રૂપિયામાં વેચવાની યોજના હતી. આરોપી જીનલ પરમાર, ઉત્તર પ્રદેશના ભુવનેશ અને બે સગીરોની સંડોવણી ખુલી છે. ભૂતકાળમાં ઝેપ્ટો કંપનીમાં સાથે કામ કરતા આ આરોપીઓ મોટા બાળ તસ્કરી રેકેટનો ભાગ છે. પોલીસે સીસીટીવી ફૂટેજ અને તપાસ આધારે બાળકને હેમખેમ શોધી કાઢ્યું.

સાબરમતીથી ઉપડતી ટ્રેન નંબર 19223 (સાબરમતી-જમ્મુ તવી એક્સપ્રેસ) હવે 18 ઓક્ટોબર 2026થી સીધી માતા વૈષ્ણોદેવી કટરા (SVDK) સ્ટેશન સુધી જશે. તેવી જ રીતે, ટ્રેન નંબર 19224 કટરાથી સાબરમતી 20 ઓક્ટોબર 2026થી કટરાથી જ રવાના થશે. અગાઉ યાત્રાળુઓને જમ્મુ તવીથી કટરા સુધી 50 કિલોમીટરનું અંતર કાપવું પડતું હતું, જેમાં 2 થી 3 કલાકનો સમય અને 300 થી 500 રૂપિયાનો વધારાનો ખર્ચ થતો હતો. આ વિસ્તરણથી ગુજરાત, રાજસ્થાન, હરિયાણા, પંજાબ અને જમ્મુ-કાશ્મીરના યાત્રિકોને મોટી સુવિધા મળશે.

છોટા ઉદેપુર જિલ્લામાં SOG (Special Operations Group) પોલીસે નશીલા પદાર્થો વિરુદ્ધ મોટી કાર્યવાહી કરી છે. નસવાડી તાલુકાના માતોરા ગામે મળેલી બાતમીના આધારે પોલીસે બે ખેતરોમાં દરોડો પાડ્યો હતો. આ દરોડા દરમિયાન, પોલીસે ગેરકાયદેસર રીતે ઉગાડવામાં આવેલા લીલા ગાંજાના 38 છોડ ઝડપી પાડ્યા, જેનું વજન 16.2 કિલોગ્રામ હતું. આ ગાંજાનો અંદાજિત કિંમત 8.01 લાખ રૂપિયા આંકવામાં આવી છે. પોલીસે બંને ખેડૂતો, વિષ્ણુ રાઠવા અને દામણ રાઠવા, સામે NDPS એક્ટ હેઠળ ગુનો નોંધી કાયદેસરની કાર્યવાહી હાથ ધરી છે.

અમદાવાદના ઘાટલોડિયામાં રહેતી 32 વર્ષીય પરિણીતાએ તેના સાસરિયાં વિરુદ્ધ પશ્ચિમ મહિલા પોલીસ સ્ટેશનમાં ફરિયાદ નોંધાવી છે. લગ્ન બાદ પતિ અને સાસરિયાં દ્વારા વિદેશ પ્રવાસના ખર્ચ કરાવવા, એપલ મોબાઈલ સહિત દહેજની માંગણી કરવા, IVF ટ્રીટમેન્ટનો ઇનકાર કરવા અને માનસિક-શારીરિક ત્રાસ આપી છૂટાછેડા માટે દબાણ કરવાનો આરોપ છે. પરિણીતાના પિતાને પણ સમાધાન દરમિયાન અપમાનિત કરાયા હતા. પોલીસે ગુનો નોંધી વધુ તપાસ હાથ ધરી છે.

અમદાવાદના શેલા વિસ્તારમાં આવેલા એક મોબાઇલ શો-રૂમમાં સ્ટોર મેનેજરે દુકાન માલિકને લાખો રૂપિયાનો ચૂનો ચોપડ્યો છે. મેનેજરે પોતાની સત્તાનો દુરુપયોગ કરી અંદાજે 20.70 લાખ રૂપિયાની ઉચાપત કરી. કિંમતી સ્માર્ટફોન વેચીને મળેલા નાણાં જમા ન કરાવ્યા. બોપલ પોલીસ મથકે ફરિયાદ નોંધાઈ છે, જેમાં હેડ ઓફિસના ચેકિંગ દરમિયાન 6.20 લાખ રૂપિયાની શોર્ટ પડી હોવાનું સામે આવ્યું હતું. માલિકે રૂબરૂ તપાસ કરતાં મેનેજરે 16 મોંઘા સ્માર્ટફોન વેચી 14.49 લાખ રૂપિયા પણ ચાંઉ કર્યા હોવાનો ઘટસ્ફોટ થયો.

અમદાવાદ જિલ્લાના વિરમગામ તાલુકાના સચાણા ગામમાં નવા બની રહેલા મકાનના દરવાજાની દિશા બાબતે થયેલી ઉગ્ર બોલાચાલી બાદ હિંસક અથડામણ થઈ હતી. રાજપુતવાસમાં નિર્માણાધીન મકાનના દરવાજા મુદ્દે તકરાર વકળતાં અજય ભરવાડ સહિત 9 લોકોના ટોળાએ લાકડીઓ સાથે હુમલો કર્યો હતો. જેમાં પિતા-પુત્ર સહિત ત્રણ વ્યક્તિઓ ઈજાગ્રસ્ત થયા હતા. વૃદ્ધ નવલસંગ પરમારના માથામાં ગંભીર ઈજા થઈ છે. પોલીસે 9 લોકો સામે ફરિયાદ નોંધી તપાસ હાથ ધરી છે.

મહારાષ્ટ્રના સામાજિક કાર્યકર્તા અભિજીત દીપકેના ઘરની બહાર 50થી વધુ પોલીસકર્મીઓ તૈનાત કરાયા છે. આ કાર્યવાહી તેમની પ્રસ્તાવિત પ્રેસ કોન્ફરન્સ પહેલાં થઈ, જેના કારણે રાજકીય અને સામાજિક વર્તુળોમાં ચર્ચા જાગી છે. દીપકેનો દાવો છે કે પોલીસ તેમના કાર્યકર્તાઓને દિલ્હીના જંતર-મંતર ખાતે યોજાનાર આંદોલનમાં ન જવા દબાણ કરી રહી છે. તેમણે મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માગણી કરી છે અને ચેતવણી આપી છે કે જો માંગણીઓ નહીં સંતોષાય તો દેશભરમાં આંદોલનો થશે. કોકરોચ જનતા પાર્ટી (CJP) એ આ વિરોધ પ્રદર્શનોનું સમર્થન કર્યું છે.

અમદાવાદના મેમનગર સ્થિત ગેસ્ટ્રો એન્ડ લિવર હોસ્પિટલના ડૉક્ટર સામે IIMની એક વિદ્યાર્થિનીએ મેડિકલ તપાસ દરમિયાન અયોગ્ય વર્તનના ગંભીર આક્ષેપો કર્યા છે. વિદ્યાર્થિનીની ફરિયાદ મુજબ, દર્દીની સંમતિ વિના અયોગ્ય રીતે શારીરિક તપાસ કરવામાં આવી હતી. આ ઘટના બાદ વસ્ત્રાપુર પોલીસે ડૉ. વ્રજ પટેલ વિરુદ્ધ છેડતી સહિતની કલમો હેઠળ ગુનો નોંધી ધરપકડ કરી છે. પોલીસે વધુ તપાસ હાથ ધરી છે અને પુરાવા એકત્ર કરી રહી છે. ધરપકડ કરાયેલા ડૉક્ટરને જેલ હવાલે કરાયા છે.

15 ઓક્ટોબરથી, રુ.2,000 થી વધુના P2M UPI વ્યવહારો પર 0.4% MDR લાગુ થશે, જેમાં મહત્તમ ચાર્જ રુ. 300 રહેશે. જોકે, રેલવે, ટેલિકોમ, વીમા, અને પેટ્રોલ-ડીઝલ જેવી ચોક્કસ શ્રેણીઓ માટે રુ.5 નો નિશ્ચિત MDR નક્કી કરાયો છે. આ પાછળનું કારણ એ છે કે આ ક્ષેત્રોમાં વ્યવહારોની સંખ્યા ખૂબ વધારે હોય છે અને નફાનું પ્રમાણ મર્યાદિત હોય છે. 0.4% MDR લાગુ કરતાં ખર્ચ વધી શકે છે, તેથી રુ.5 નો નિશ્ચિત ચાર્જ ખર્ચ નિયંત્રણમાં રાખશે. આ નિર્ણય આવશ્યક સેવાઓને સસ્તું રાખવા અને ડિજિટલ પેમેન્ટને પ્રોત્સાહન આપવા માટે લેવાયો છે.

અમરેલી LCB પોલીસે વડીયા વિસ્તારમાં પેટ્રોલિંગ દરમિયાન કુંકાવાવ રેલવે ફાટક નજીક એક શંકાસ્પદ કારનો ફિલ્મી ઢબે પીછો કરી અટકાવી હતી. કારમાંથી વિદેશી દારૂની ૩૪૬ બોટલ, જેની કિંમત ૧.૮૩ લાખ રૂપિયા થાય છે, તે ઝડપી પાડવામાં આવી છે. પોલીસે સાગર થળેચા નામના એક વ્યક્તિને ઝડપી પાડ્યો છે. આ દારૂના નેટવર્ક સાથે સંકળાયેલા મુખ્ય આરોપી રવિરાજ વાળા પોલીસને ચકમો આપી ફરાર થવામાં સફળ રહ્યો છે. પોલીસે કુલ ૪.૯૩ લાખ રૂપિયાનો મુદ્દામાલ જપ્ત કર્યો છે અને ફરાર આરોપી રવિરાજ વાળાને ઝડપી પાડવા માટે તપાસ હાથ ધરી છે.

વડોદરા પોલીસે આજવા ચોકડી પાસે દારૂની હેરાફેરીનો પર્દાફાશ કર્યો છે, જ્યાં બે મોપેડમાંથી 455 બોટલ વિદેશી દારૂ જપ્ત કરવામાં આવ્યો છે. આ દારૂની કિંમત આશરે 1.41 લાખ રૂપિયા છે. પોલીસ તપાસમાં જાણવા મળ્યું છે કે બુટલેગરોએ મોપેડમાં ગુપ્ત ચોરખાના બનાવી આ દારૂની હેરાફેરી કરતા હતા. પોલીસે બંને મોપેડ, દારૂ અને બે આરોપીઓની ધરપકડ કરી વધુ તપાસ હાથ ધરી છે. આ ઘટનાએ પોલીસને પણ આશ્ચર્યચકિત કરી દીધી છે.

જામનગરમાં એક પરિણીતાને તેના પતિ અને સાસુ-સસરા દ્વારા છૂટાછેડા માટે દબાણ કરી રસ્તા પર મારકૂટ કરી છરી બતાવી જાનથી મારી નાખવાની ધમકી આપવામાં આવી હોવાની ઘટના સામે આવી છે. આ અંગે સિટી એ-ડિવિઝન પોલીસે પતિ, સસરા અને સાસુ વિરુદ્ધ ગુનો નોંધી તપાસ હાથ ધરી છે. ફરિયાદી પરિણીતાએ આરોપ લગાવ્યો છે કે છ વર્ષ પહેલાં પ્રેમલગ્ન કર્યા બાદ તેને માનસિક અને શારીરિક ત્રાસ આપવામાં આવતો હતો. તાજેતરમાં, હોસ્પિટલથી ઘરે જતી વખતે પતિએ તેને રોકી માર માર્યો અને છરી બતાવી ધમકી આપી.

જામનગરના કાલાવડ નજીક જીવાપર રોડ પર ભેંસો ચરાવવા ગયેલા એક માલધારી યુવક પર ખેતરમાં નુકસાન કરતી હોવાના આક્ષેપ સાથે એક શખ્સે કુહાડો મારી ઈજા પહોંચાડી હતી. આરોપીએ પીડિતને ગાળો આપી ફરીથી આ વિસ્તારમાં ભેંસો લાવવા પર જાનથી મારી નાખવાની ધમકી આપી હતી. આ બનાવ અંગે કાલાવડ ટાઉન પોલીસે ગુનો નોંધી તપાસ શરૂ કરી છે. ફરિયાદી તેજસુરભાઈ હરભમભાઈ ઘોડાને આરોપી તરશી પાટડીયાએ જમણા પગમાં ઘૂંટી ઉપર કુહાડાની ઉંધી બાજુથી માર મારી ઈજા પહોંચાડી હતી.

જામનગર નજીક ઢીચડા ગામમાં જૂની અદાવતનો ખાર રાખી 44 વર્ષીય આધેડ પર કાર ચલાવી, ત્યારબાદ છરી, લાકડાના ધોકા અને લોખંડના પાઇપ વડે જીવલેણ હુમલો કરાયો. બે વર્ષ પહેલાં ફરિયાદીના ભત્રીજાની કાર અકસ્માતમાં આરોપીઓના સગાનું મૃત્યુ થયું હતું. આ બનાવને લઈને બંને પરિવારો વચ્ચે મનદુઃખ ચાલતું હતું. બેડી મરીન પોલીસે ચાર નામજોગ સહિત છ શખ્સો સામે ગુનો નોંધી વધુ તપાસ હાથ ધરી છે. ઈજાગ્રસ્તને સારવાર માટે હોસ્પિટલમાં ખસેડાયા.

અમદાવાદના રામોલ વિસ્તારમાં વોકિંગ કરી રહેલી યુવતીની છેડતીના બનાવ બાદ બજરંગ દળ અને વિશ્વ હિન્દુ પરિષદ (VHP)ના કાર્યકરો રામોલ પોલીસ સ્ટેશન પહોંચ્યા હતા. ત્યાં પોલીસકર્મીઓ સાથે થયેલા ઘર્ષણ અને ધક્કામુક્કી બાદ મામલો વણસ્યો હતો. ઉચ્ચ પોલીસ અધિકારીઓએ સ્થળ પર પહોંચી પરિસ્થિતિને નિયંત્રણમાં લીધી. પોલીસે આરોપી અરમાન મલિક સામે ગુનો નોંધી તપાસ હાથ ધરી છે. આ ઘટનાએ પોલીસ સ્ટેશનમાં તંગદિલીભર્યું વાતાવરણ સર્જ્યું હતું.

અમદાવાદ ક્રાઈમ બ્રાન્ચની SOG ટીમે વાસણા APMC મેટ્રો સ્ટેશન નજીકથી એક ઓટોરિક્ષા ચાલકને 184 ગ્રામ ગાંજા સાથે ઝડપી પાડ્યો છે. આરોપીની સીટ નીચેથી 90 પડીકીઓ મળી આવી, જેની કિંમત અંદાજે 9,200 રૂપિયા છે. પોલીસે ગાંજા, મોબાઈલ ફોન અને રિક્ષા મળી કુલ 64,700 રૂપિયાનો મુદ્દામાલ જપ્ત કર્યો છે. આ રેકેટમાં ફતેહવાડીના ઉબેદ અમાનુલ્લાહ ખાન પઠાણ નામની વ્યક્તિ પણ સંડોવાયેલી હોવાનું મનાય છે. પોલીસે NDPS એક્ટ હેઠળ ગુનો નોંધી વધુ તપાસ હાથ ધરી છે.

અમદાવાદના સોલા પોલીસ સ્ટેશનમાં કડીના એક દંપતી સાથે ફિનલેન્ડમાં નોકરી અને Work Permit અપાવવાના બહાને ₹28 લાખની છેતરપિંડીનો ગુનો નોંધાયો છે. યુઝ્ડ કાર ડીલર પરાગ પટેલ અને તેમની પત્ની રાજકુમારીને આરોપી રોહિત શર્મા, જે 'Mahant Travels' ચલાવે છે, તેણે આ વિશ્વાસઘાત કર્યો. આરોપીએ Job Offer Letter, નકલી Visa, અને Work Permit ના નામે તબક્કાવાર ₹28 લાખ પડાવ્યા. મુંબઈ એરપોર્ટ પર Flight Cancel થતા અને ખોટા Visa દેખાતા દંપતીને છેતરપિંડીનો અહેસાસ થયો. પૈસા પાછા માંગતા ઇનકાર કરતા પોલીસે તપાસ હાથ ધરી છે.

અમદાવાદના CTM ચાર રસ્તા નજીક નેશનલ હાઈવે નંબર-8 પર આવેલા ડબલ ડેકર ઓવરબ્રિજ પરથી એક યુવકે અગમ્ય કારણોસર નીચે ઝંપલાવી આપઘાત કર્યો. રામોલ પોલીસ ઘટનાસ્થળે પહોંચી મૃતકની ઓળખ કરવા કાર્યવાહી હાથ ધરી. સવારના સમયે વાહનોની અવરજવર વચ્ચે આ ઘટના બની, જેમાં યુવક નીચે પટકાયો. સ્થાનિકોમાં રોષ છે કારણ કે ઓવરબ્રિજ પર સુરક્ષા જાળીની ઊંચાઈ ટૂંકી હોવાથી આ પ્રકારની ઘટનાઓ વારંવાર થાય છે. છેલ્લા અઠવાડિયામાં આ બીજી ઘટના છે, અને અગાઉ પણ આવા અનેક બનાવો નોંધાયા છે.

વડોદરામાં એક 82 વર્ષના વૃદ્ધ, અજીતભાઈ ભોગીલાલ મોદી, સાથે ભાવિક પ્રવીણચંદ્ર શાહ નામના વ્યક્તિએ પારિવારિક સંબંધો કેળવીને વિશ્વાસઘાત કર્યો છે. છેલ્લા 10 વર્ષથી ઓળખાણ ધરાવતો ભાવિક, વૃદ્ધની મદદના બહાને તેમની સાથે ઘરકામ અને બજારમાં જતો હતો. વિશ્વાસ કેળવ્યા બાદ, તેણે અંગત અને વ્યાવસાયિક કામકાજ માટે કુલ રૂ. 16,33,000/- ની રકમ ચેક અને રોકડા સ્વરૂપે પડાવી લીધી. જ્યારે વૃદ્ધે પૈસા પરત માંગ્યા, ત્યારે આપેલા ચેક "ઇન્સફિશિયન્ટ ફંડ્સ" ના કારણે બાઉન્સ થયા અને ભાવિકે પૈસા આપવાની સ્પષ્ટ ના પાડી દીધી.

સુરત શહેરની નવી સિવિલ હોસ્પિટલમાં એક ચોંકાવનારી ઘટના બની છે. 40 વર્ષીય સીમા પાટીલ નામના મૃતક મહિલાના એક્સ-રે રિપોર્ટમાં મંગળસૂત્ર દેખાઈ રહ્યું હતું, પરંતુ પોસ્ટમોર્ટમ બાદ પરિવારજનોને મંગળસૂત્ર મળ્યું નથી. આ ઘટના બાદ મૃતકના પરિવારજનોએ હોસ્પિટલ સ્ટાફ પર શંકા વ્યક્ત કરી હોબાળો મચાવ્યો હતો. બનાવની જાણ થતાં ખટોદરા પોલીસ ઘટનાસ્થળે પહોંચી હતી અને પરિવારજનોને સમજાવી મામલો થાળે પાડવાનો પ્રયાસ કર્યો છે. પોલીસે આ મામલે તપાસ હાથ ધરી છે.

ભાવનગર-અલંગ નેશનલ હાઈવે પર 7 લોકોના કરુણ મોત થયા છે. એક કાર ટ્રેલર પાછળ ધડાકાભેર ઘૂસી જતાં આ ગંભીર અકસ્માત સર્જાયો. કારમાં સવાર લોકો અલંગ શિપ બ્રેકિંગ યાર્ડ જઈ રહ્યા હતા. અકસ્માતમાં 6 લોકોનું ઘટનાસ્થળે જ મોત થયું, જ્યારે એક વ્યક્તિનું સારવાર દરમિયાન મૃત્યુ થયું. પોલીસે ઘટનાસ્થળે પહોંચી તપાસ શરૂ કરી છે. હાઈવે પર વાહનચાલકોની સુરક્ષા મુદ્દે ફરી સવાલો ઉભા થયા છે.

અલ નીનોના કારણે મહારાષ્ટ્રમાં વરસાદમાં ઘટાડો થતાં પાણીનું સંકટ સર્જાયું છે. રાજ્યના જળસંપદા મંત્રી ગિરીશ મહાજને જણાવ્યું છે કે, 16 ઓક્ટોબર 2026થી તમામ શહેરી સ્થાનિક સ્વરાજ્ય સંસ્થાઓમાં ઓછામાં ઓછો 10% પાણીકાપ લાગુ કરવાનો નિર્દેશ અપાયો છે. આગામી 31 ઓગસ્ટ 2027 સુધી પીવાના પાણીને પ્રાધાન્ય આપવામાં આવશે અને દરેક ડેમમાં 10% ઇમરજન્સી બફર જથ્થો અનામત રહેશે. 265 તાલુકાઓમાં દુષ્કાળ જાહેર કરાયો છે અને પાણીનો કરકસરપૂર્વક ઉપયોગ કરવા તથા અનધિકૃત પાણી ઉપાડ સામે કડક કાર્યવાહીના આદેશ અપાયા છે.

એક્ટર વિદ્યુત જામવાલ પોતાની ફિટનેસ અને માર્શલ આર્ટ્સ ઉપરાંત અનોખી યોગ પ્રેક્ટિસ માટે જાણીતો છે. તાજેતરમાં મુંબઈમાં આયોજિત સ્ટ્રીટ ફાઈટરની ઇવેન્ટમાં, વિદ્યુતે સ્ટેજ પર 15 મિનિટ સુધી શ્વાસ રોકી રાખીને અને 20 મિનિટ સુધી આંખ પટપટાવ્યા વિના યોગ સાધનાનું પ્રદર્શન કર્યું. આ જોઈ ત્યાં ઉપસ્થિત લોકો ચોંકી ગયા અને કેટલાક તો ચિંતામાં પણ પડી ગયા. વિદ્યુત જામવાલ "સ્ટ્રીટ ફાઈટર" માં ધલસિમનું પાત્ર ભજવી રહ્યો છે, જે યોગ અને આધ્યાત્મિક સાધના સાથે જોડાયેલું છે. તેણે યુવાનોને જીવનમાં સ્થિર રહેવાનો સંદેશ પણ આપ્યો.

ભારતીય જનતા પાર્ટીના સાંસદ સંબિત પાત્રાએ કોંગ્રેસ અને રાહુલ ગાંધી પર ફોર્મ-6 અંગે આકરા પ્રહારો કર્યા છે. મુખ્ય ચૂંટણી આયુક્ત (CEC) જ્ઞાનેશ કુમાર વિરુદ્ધ 'ઇન્ડિયા' ગઠબંધન દ્વારા માર્ચના આયોજન પહેલા સંબિત પાત્રાએ કહ્યું, "ભાજપની મદદ જ્ઞાનેશજી નહીં, પરંતુ ગણેશજી કરી રહ્યા છે." તેમણે આરોપ લગાવ્યો કે છેલ્લા કેટલાક સમયથી ચૂંટણી પંચ પર હુમલા થઈ રહ્યા છે અને દેશમાં અરાજકતા ફેલાવવાનો પ્રયાસ થઈ રહ્યો છે. જનતા પરિવારવાદ અને ભ્રષ્ટાચારને સમર્થન આપનારાઓને નકારી કાઢશે.

વડોદરામાં એક ચોંકાવનારી ઘટના સામે આવી છે, જ્યાં ઇન્સ્યોરન્સ કંપનીએ મૃતક વ્યક્તિનો વીમો ઉતારવા બદલ વીમા બ્રોકર કંપનીના કર્મચારી સામે પોલીસ ફરિયાદ નોંધાવી છે. ICICI Prudential Insurance Companyના રિલેશનશિપ મેનેજરે જણાવ્યું કે D2C Insurance Broking Pvt. Ltd. સાથેના કરાર હેઠળ, તેમના એક કર્મચારીએ તાજેતરમાં મૃત્યુ પામેલા રાકેશ પ્રતાપભાઈ પટેલિયાના નામે વીમો ઉતાર્યો હતો. બ્રોકર કંપનીએ તમામ કાગળોની ચકાસણી કર્યા બાદ વીમો મંજૂર કરવામાં આવ્યો હતો, પરંતુ તપાસ કરતાં જાણવા મળ્યું કે વીમાધારકનું બે મહિના અગાઉ જ મૃત્યુ થયું હતું. આ વિશ્વાસઘાત બદલ કાર્યવાહી હાથ ધરાઈ છે.

પ્રખ્યાત સિંગર મિકા સિંહે તાજેતરમાં પાકિસ્તાન અને ત્યાંના લોકો વિશે એક નિવેદન આપ્યું છે, જે હાલમાં ચર્ચાનો વિષય બન્યું છે. એક પોડકાસ્ટ દરમિયાન, મિકાએ પાકિસ્તાની મુસ્લિમો અને દુબઈના મુસ્લિમો પ્રત્યેના લોકોના અલગ-અલગ દ્રષ્ટિકોણ પર પ્રશ્ન ઉઠાવ્યો. તેમણે જણાવ્યું કે પાકિસ્તાની મુસ્લિમોએ શીખ ધર્મસ્થળોની સેવા કરવામાં મદદ કરી હતી, તેથી તેમને સમજાયું નહીં કે લોકો પાકિસ્તાની મુસ્લિમોથી કેમ અકળાય છે, જ્યારે દુબઈના મુસ્લિમો તેમને ખૂબ ગમે છે. તેમણે ભારપૂર્વક કહ્યું કે પાકિસ્તાન અને તેના લોકો ખરાબ નથી.

INDIA blocના સાંસદો 'સેવ ડેમોક્રસી' અને 'સેવ માઈ વોટ'ના પોસ્ટર્સ સાથે મુખ્ય ચૂંટણી કમિશનર જ્ઞાનેશ કુમાર વિરુદ્ધ સૂત્રોચ્ચાર કરી રહ્યા છે. કથિત મત ચોરીના મુદ્દે તેમના રાજીનામાની માંગણી સાથે સંસદ ભવનથી ચૂંટણી પંચના મુખ્યાલય 'નિર્વાચન સદન' તરફ કૂચ કરી. DMK અને AAP આ માર્ચથી દૂર રહ્યા. રાહુલ ગાંધીને આકાશવાણી ભવન પાસે રોકતા ત્યાં જ ધરણા પર બેસી ગયા. જ્યાં સુધી જવાબદારી નક્કી ન થાય ત્યાં સુધી વિરોધ ચાલુ રહેશે.