ભાવનગર શહેર અને જિલ્લામાં શંખનાદ, ઘંટનાદ અને આતશબાજી સાથે પરંપરાગત રીતે જન્માષ્ટમી મહોત્સવની રંગદર્શી ઉજવણી થઈ. ગીતા ચોક, વડવા, નિર્મળનગર સહિતના વિસ્તારોમાં લોકમેળા, ગોકુળીયા, મટકીફોડ અને દહીંહાંડી જેવા કાર્યક્રમો યોજાયા. રાત્રે ૧૨ વાગ્યે કૃષ્ણ જન્મ સમયે "ગોવિંદા આયા રે", "નંદ ઘેર આનંદ ભયો"ના ગગનભેદી જયઘોષ સાથે શ્રદ્ધાળુઓની ભારે ભીડ ઉમટી પડી. ભાવિકોએ કાનાને ભાવભેર પારણામાં ઝુલાવી પુણ્ય કમાયું. ધર્મસ્થાનકોમાં મહાપૂજન, અભિષેક, જન્મોત્સવ આરતી, પંજરી પ્રસાદ વિતરણ અને કેક કટીંગ જેવા કાર્યક્રમો થયા. શોભાયાત્રા, રાસ-ગરબા, નાચગાન સાથે ઉત્સાહભેર ઉજવણી જોવા મળી.