અમેરિકા અને ઈરાન વચ્ચેના યુદ્ધ અને હોર્મુઝ સ્ટ્રેટ બંધ થવાથી વૈશ્વિક ઓઇલ સંકટ છે. ક્રૂડ ઓઇલ $110 પ્રતિ બેરલ છે. ડોનાલ્ડ ટ્રમ્પે દાવો કર્યો કે ઈરાન સાથેનું યુદ્ધ ટૂંક સમયમાં પૂરું થશે અને ઓઇલના ભાવ ઘટશે. ઈરાન શાંતિ કરાર કરવા આતુર છે, અને જો ડીલ સફળ થાય તો ભાવ ઝડપથી ઘટશે. સાઉદી અરેબિયા અને UAE સહિતના દેશો મધ્યસ્થી કરી રહ્યા છે. ટ્રમ્પે કહ્યું કે તેઓ ઈરાન પર હુમલો કરવાના હતા, પણ મધ્યસ્થીઓના કારણે ઈરાદો બદલ્યો. ટ્રમ્પના નિવેદન બાદ ભાવમાં થોડી નરમી આવી છે, પણ મધ્યપૂર્વના પુરવઠા જોખમને કારણે ભાવ ઊંચા છે.

આજે, 20 મેના રોજ, સેન્સેક્સ 550 પોઈન્ટ (0.75%) ઘટીને 74,647 પર કારોબાર કરી રહ્યો છે. નિફ્ટી 170 પોઈન્ટ (0.72%) ઘટીને 23,450 પર આવ્યો. ઓટો, બેન્કિંગ અને મેટલ શેરોમાં સૌથી વધુ વેચવાલી જોવા મળી. એશિયન અને અમેરિકી બજારોમાં પણ ઘટાડો રહ્યો. વિદેશી રોકાણકારોએ 2458 કરોડ રૂપિયાના શેર વેચ્યા.

Indian Oil Corporationએ જણાવ્યું છે કે અમેરિકા-ઈરાન તણાવ છતાં દેશમાં ક્રૂડ ઓઇલની અછત નહીં સર્જાય, કારણ કે કંપની પાસે એક મહિનાથી વધુનો સ્ટોક ઉપલબ્ધ છે. હોર્મુઝ રૂટ અવરોધિત થતાં LPG સપ્લાયમાં થોડો પ્રભાવ પડ્યો છે, પરંતુ ઇન્ડોનેશિયા, નાઇજીરીયા, અંગોલા અને ઓમાનમાંથી તાત્કાલિક ખરીદી શરૂ કરીને પુરવઠો જાળવવામાં આવી રહ્યો છે. કંપનીનો Q4FY26માં નફો 81% વધીને ₹15,176 કરોડ થયો છે. શેરધારકો માટે ₹1.25 પ્રતિ શેર ડિવિડન્ડની ભલામણ કરવામાં આવી છે. IOC આગામી વર્ષે રિફાઇનરી વિસ્તરણ માટે ₹32,700 કરોડનું રોકાણ કરશે.

ભારતની લિથિયમ આયાત આઠ વર્ષમાં દસ ગણી વધી છે, જે EV બજારના ઝડપી વિસ્તરણ અને બેટરી સ્ટોરેજની વધતી માંગને પ્રતિબિંબિત કરે છે, તેમ છતાં સ્થાનિક ઉત્પાદન ક્ષમતા વપરાશ વૃદ્ધિથી પાછળ રહી ગઈ છે. વાણિજ્ય અને ઉદ્યોગ મંત્રાલયના ડેટા અનુસાર, એપ્રિલ-ફેબુ્રઆરી નાણાકીય વર્ષ ૨૦૨૬ દરમિયાન લિથિયમ આયાત વધીને રૂ. ૩૭,૬૨૪.૬ કરોડ થઈ ગઈ છે. જે નાણાકીય વર્ષ ૨૦૧૮માં રૂ. ૩,૫૩૨ કરોડ હતી. નાણાકીય વર્ષ ૨૦૨૫માં રૂ. ૨૫,૪૫૮.૬ કરોડની આયાત થઈ હતી, અને નાણાકીય વર્ષ ૨૦૨૬ના પ્રથમ ૧૧ મહિનામાં લગભગ ૪૮% વધી ગઈ છે.

હાલમાં, માર્કેટ કેપ પ્રમાણે વિશ્વની ટોચની ૧૦૦ કંપનીઓમાં ભારતની કોઈ કંપની સામેલ નથી. અમેરિકાના ટેરિફ અને પશ્ચિમ એશિયા યુદ્ધના કારણે ભારતીય ઇક્વિટીમાં ઘટાડો થયો, જેના પરિણામે ભારતીય કંપનીઓની માર્કેટ કેપમાં ઘટાડો થયો. ૨૦૨૫ની શરૂઆતમાં, રિલાયન્સ, TCS, અને HDFC બેંક ટોચની ૧૦૦માં હતી. રિલાયન્સ, જે ૨૦૨૫માં ૫૭મા અને ૨૦૨૬માં ૭૩મા સ્થાને હતી, તે હવે ૧૦૫મા સ્થાને છે.

હાલ બેંકિંગ ક્ષેત્રનો વિકાસ દર અને કમાણીનો માર્ગ રોકાણકારોને નિરાશ કરી રહ્યો છે. આ હકીકત પરથી સ્પષ્ટ થાય છે કે બેંક નિફ્ટી સતત બેન્ચમાર્ક નિફ્ટી ૫૦ કરતાં ઓછા મૂલ્યાંકન પર ટ્રેડ કરી રહ્યો છે. બેંક નિફ્ટી હાલમાં બેન્ચમાર્ક નિફ્ટી ૫૦ કરતાં ૪૩.૫% ડિસ્કાઉન્ટ પર ટ્રેડ કરી રહ્યો છે. ૨૦૧૫ માં ઇન્ડેક્સ મૂલ્યાંકન ડેટા ઉપલબ્ધ થયા પછી આ તફાવત સૌથી મોટો છે.

ભારતીય ગ્રાહકોને ઉનાળાની ગરમીમાં એસી અને રેફ્રિજરેટરની અછતનો સામનો કરવો પડી શકે છે. એર કંડિશનર અને રેફ્રિજરેટરના સૌથી મહત્વપૂર્ણ ઘટક કોમ્પ્રેસરની આયાત પર કેન્દ્ર સરકારના કડક પ્રતિબંધને કારણે આ ક્ષેત્રની મોટી કંપનીઓની ઊંઘ ઉડી ગઈ છે. અહેવાલો અનુસાર, આ ક્ષેત્રની મોટી બ્રાન્ડ્સે ચેતવણી આપી છે કે સરકારી પ્રતિબંધથી ભારતીય બજારમાં કૂલિંગ ઉપકરણોની તીવ્ર અછત સર્જાઈ શકે છે. પરિણામે, બજારમાં વધતા ભાવ અને એસી અને રેફ્રિજરેટર જેવા કૂલિંગ ઉપકરણોની અછત ઉદભવી શકે છે. 

મુંબઈ ઝવેરી બજારમાં આજે સોના-ચાંદી તથા પ્લેટીનમના ભાવ વધુ વધ્યા હતા. જો કે ચાંદી તથા પ્લેટીનમના ભાુવ આરંભમાં ઉંચા ખુલ્યા પછી નીચા ઉતર્યા હતા. વિશ્વ બજારમાં જો કે કિંમતી ધાતુઓના ભાવમાં પીછેહટ દેખાઈ હતી પરંતુ ઘરઆંગણે કરન્સી બજારમાં આજે ડોલર વધતાં તથા રૂપિયો ઘટતાં ઝવેરી બજારમાં ઈમ્પોર્ટ કોસ્ટ ઊંચી રહેતાં બજાર ભાવ મક્કમ હતા. કોપરના ભાવ વધી ઉંચામાં રૂ.૯૬.૬૦ થયા હતા.

અમેરિકી રાષ્ટ્રપતિ ટ્રમ્પના ઈરાન પર હુમલા ટાળવાના નિર્ણય અને ક્રુડ ઓઈલના ભાવ ઘટવાને કારણે વૈશ્વિક બજારોમાં રિકવરી આવી. ભારતીય શેર બજારોમાં પણ શરૂઆત મજબૂત થઈ. વડાપ્રધાન મોદીની યુરોપીયન દેશોની મુલાકાત અને તેમના અબજો ડોલરના રોકાણના કરારોની પોઝિટીવ અસરે વિદેશી ફંડોએ ભારતીય શેરોમાં ખરીદી કરી, જે તેજીને પીઠબળ બન્યું. IT, ટેકનોલોજી, હેલ્થકેર અને ઓટો શેરોમાં સિલેક્ટિવ ખરીદીએ બજાર પોઝિટીવ રહ્યું. સેન્સેક્સ 431 પોઈન્ટ વધી 75746 સુધી પહોંચ્યો, પરંતુ અંતે 114 પોઈન્ટ ઘટી 75200 રહ્યો.

ઓનલાઈન દવા વેચાણ અને ડુપ્લીકેટ દવાઓ સામે વિરોધમાં ગુજરાતના 35,000 થી વધુ મેડિકલ સ્ટોર્સ આજે બંધ રહેશે. ઈમરજન્સી જરૂરિયાત માટે 832 સ્ટોર ખુલ્લા રાખવામાં આવશે. આ હડતાળ ગેરકાયદેસર ઈ-ફાર્મસી અને ડુપ્લીકેટ દવાઓના વેચાણ સામે છે, જે નાના વેપારીઓ અને લોકોના સ્વાસ્થ્ય માટે જોખમી છે.

મધ્ય-પૂર્વમાં અમેરિકા, ઈઝરાયેલ, ઈરાન યુદ્ધના કારણે દુનિયાભરમાં ઊભી થયેલી ઓઈલ કટોકટીના કારણે ભારતમાં એક સપ્તાહથી ઓછા સમયમાં પેટ્રોલ અને ડીઝલના ભાવમાં વધારો કરવાની ફરજ પડી છે. સરકારી ઓઈલ કંપનીઓએ મંગળવારે પેટ્રોલ અને ડીઝલના ભાવમાં પ્રતિ લિટર ૯૦ પૈસાનો વધારો કર્યો છે. બીજીબાજુ નિષ્ણાતોએ દાવો કર્યો છે કે સરકારી ઓઈલ કંપનીઓનું નુકસાન સરભર કરવા પેટ્રોલ અને ડીઝલમાં રૂ. ૩-૪ના વધારાથી કશું નહીં થાય. ઓઈલ કંપનીઓએ પ્રતિ લીટર રૂ. ૧૩થી ૧૭ સુધીનો ભાવ વધારો કરવો પડશે.

પોરબંદર જિલ્લામાં ઉનાળુ પાક તૈયાર થતાં યાર્ડમાં મગ, ઘઉં, અડદ, ચોળી અને તલની આવક વધી છે. સૌથી વધુ 53,700 કિલો મગની આવક સાથે પ્રતિમણ રૂ.1560 થી 1690 ભાવ બોલાયા. અન્ય પાકોની આવક અને ભાવ પણ નોંધાયા. જોકે, મગની આવક વધતાં પ્રતિમણ રૂ.100-200 ભાવ ઘટતાં ખેડૂતોમાં રોષ જોવા મળી રહ્યો છે.

પોરબંદરમાં ડીઝલની અછતને કારણે વાહનચાલકોને ભારે મુશ્કેલી પડી રહી છે. માંગ સામે પુરવઠો ઓછો હોવાથી પેટ્રોલપંપો પર ડીઝલ તળિયાઝાટક થઈ જાય છે. ખેડૂતો, ટ્રેક્ટર ધારકો અને માલવાહક વાહનોના કારણે ભારણ વધ્યું છે. પેનિક બાઇંગને કારણે પણ સ્થિતિ વણસી છે. પેટ્રોલપંપ સંચાલકો કોટા મુજબ સપ્લાય મળતો હોવાનું જણાવે છે, પરંતુ વધેલી માંગને પહોંચી વળવામાં મુશ્કેલી અનુભવી રહ્યા છે. ડીઝલ ટેન્કર આવતાં જ લાંબી લાઇનો લાગે છે અને જથ્થો ઝડપથી સમાપ્ત થઈ જાય છે. સ્થિતિ વધુ ગંભીર બનવાની શક્યતા છે.

ગુજરાતના 12 સરકારી વિભાગો પેટ્રોલ-ડીઝલ પર વર્ષે કરોડો ખર્ચે છે. 2026-27ના બજેટમાં 165 કરોડ ફાળવાયા છે, જ્યારે છેલ્લા 5 વર્ષમાં 847 કરોડનો વપરાશ થયો છે. મંત્રીઓથી અધિકારીઓ સુધી, વિવિધ કક્ષાના અધિકારીઓને અનેક પ્રકારની ગાડીઓ ફાળવવામાં આવે છે. ગૃહ વિભાગનો ખર્ચ સૌથી વધુ છે.

'ઑલ ઈન્ડિયા ઓર્ગેનાઈઝેશન ઓફ કેમિસ્ટ્સ એન્ડ ડ્રગિસ્ટ્સ' (AIOCD) દ્વારા 20 મેના રોજ દેશવ્યાપી હડતાળની જાહેરાત કરવામાં આવી છે. ઓનલાઈન ફાર્મસી અને ક્વિક-કોમર્સ એપ્સના વધતા પ્રભાવ સામે પરંપરાગત મેડિકલ સ્ટોર સંચાલકોમાં ભારે રોષ જોવા મળી રહ્યો છે. કેમિસ્ટ સંગઠનોનો આક્ષેપ છે કે ઈ-ફાર્મસી પ્લેટફોર્મ્સ પૂરતી સરકારી દેખરેખ વગર દવાઓનું વેચાણ કરી રહ્યા છે, જેમાં પ્રિસ્ક્રિપ્શન ચકાસણી, દવાઓના યોગ્ય સ્ટોરેજ અને ડિલિવરીના નિયમોનું પાલન થતું નથી. સંગઠનના મતે આ માત્ર વેપારનો મુદ્દો નહીં પરંતુ દર્દીઓની સલામતી અને આરોગ્ય સાથે સીધો સંબંધિત ગંભીર મુદ્દો છે, જેના કારણે દેશભરમાં વિરોધ ઉગ્ર બન્યો છે.

ભારત સરકાર ₹70,000 કરોડની સબમરીન ડીલ દ્વારા નૌકાદળની તાકાત વધારશે. Project-75 India હેઠળ 6 સબમરીન ખરીદાશે, જેમાં જર્મનીની Thyssenkrupp Marine Systems ટેકનોલોજી અને ડિઝાઈન આપશે. મઝગાંવ ડૉકયાર્ડ સાથે મળી ભારતમાં જ નિર્માણ થશે. AIP ટેકનોલોજી સબમરીનને લાંબો સમય પાણીમાં રહેવા સક્ષમ બનાવશે, જે દુશ્મનો માટે પડકારરૂપ બનશે. આ ડીલ પાકિસ્તાન અને ચીન જેવા દેશો માટે ચિંતાનો વિષય છે.

રાહુલ ગાંધી આજે ઉત્તર પ્રદેશના રાયબરેલીની મુલાકાતે પહોંચ્યા હતા, જ્યાં તેમણે ‘બડા મંગલ’ પ્રસંગે ચુરુઆ હનુમાન મંદિરમાં પૂજા કરી હતી. મીડિયા દ્વારા સમાજવાદી પાર્ટી સાથેના ગઠબંધન અંગે પૂછાયેલા સવાલનો તેમણે સીધો જવાબ ટાળ્યો અને પેટ્રોલ-ડીઝલના વધતા ભાવોને દેશનો સૌથી મોટો મુદ્દો ગણાવ્યો. રાહુલ ગાંધીએ કેન્દ્ર સરકાર અને PM મોદી પર આકરા પ્રહારો કરતા કહ્યું કે મોંઘવારી અને ખોટી નીતિઓનો ફટકો સામાન્ય જનતા, મજૂરો અને નાના વેપારીઓને પડશે, જ્યારે મોટા ઉદ્યોગપતિઓ પર તેની અસર નહીં થાય.

ઈરાન દ્વારા દરિયામાં નાંખેલા ઈન્ટરનેટ કેબલ પર ટેક્સ વસૂલવાની ધમકીથી વૈશ્વિક સ્તરે ચિંતા વધી છે. ઈરાન અને અમેરિકાના તણાવની અસર હવે ક્રૂડ ઓઈલ, સપ્લાય ચેઈન અને ઈન્ટરનેટ પર પણ દેખાઈ રહી છે. હોર્મુઝની ખાડીમાંથી પસાર થતી અનેક મોટી ઈન્ટરનેટ કેબલ્સ પર ટેક્સ લાગુ કરવાથી દુનિયાભરનું ઈન્ટરનેટ ઠપ થવાનો ખતરો છે. ભારત પણ આનાથી પ્રભાવિત થઈ શકે છે, કારણ કે ઘણી કેબલ્સ મુંબઈ અને ચેન્નાઈ સાથે જોડાયેલી છે. ઈન્ટરનેટના અભાવે બેન્કિંગ, UPI, અભ્યાસ અને વેપાર જેવી દૈનિક પ્રવૃત્તિઓ ખોરવાઈ શકે છે.

અમરેલી જિલ્લામાં પેટ્રોલ અને ડીઝલની ભારે અછત સર્જાતા વાહનચાલકો અને ખેડૂતો મુશ્કેલીમાં મુકાયા છે. સાવરકુંડલા, બાબરા અને વડીયા સહિતના વિસ્તારોમાં પેટ્રોલ પંપો પર લાંબી કતારો લાગી છે અને મોટાભાગના પંપોએ ‘નો સ્ટોક’ના બોર્ડ લગાવી દીધા છે. ખેડૂતોને 200 લીટર ડીઝલ આપવાના નિયમ હોવા છતાં માત્ર મર્યાદિત જથ્થો આપવામાં આવતા રોષ ફેલાયો છે. ખેતીની સીઝન દરમિયાન ડીઝલની અછતને કારણે ટ્રેક્ટર અને કૃષિ સાધનોનું કામ પ્રભાવિત થઈ રહ્યું છે. લોકો કલાકો સુધી રાહ જોઈ રહ્યા છે અને તંત્ર સામે ભારે અસંતોષ વ્યક્ત કરી રહ્યા છે.

અમદાવાદ-ભાવનગરની તમામ એસટી વોલ્વો બસનો રૂટ બદલી દેવાયો છે. અગાઉ અમદાવાદથી દરરોજ બાવળા, ધોળકા, ધંધુકા થઈને ભાવનગર સુધી વોલ્વોની 12 રાઉન્ડ ટ્રિપનું સંચાલન કરાતું હતું. તેની જગ્યાએ હવે આ તમામ ટ્રિપ ધોલેરા એક્સપ્રેસવે તરફ ડાયવર્ટ કરી દેવાઈ છે. એટલે હવે ભાવનગરની તમામ વોલ્વો બસ ધોલેરા એક્સપ્રેસવે થઈને જશે. જેથી અમદાવાદ-ભાવનગર વચ્ચેનો અંતર ઘટી જતા ભાડામાં પણ 14 રૂપિયાનો ઘટાડો કરાયો છે. 351 રૂપિયાના બદલે હવે મુસાફરોએ 337 રૂપિયા ટિકિટ ભાડું ચૂકવવાનું રહેશે.

અમેરિકાના પ્રતિબંધોની છૂટ સમાપ્ત થયા બાદ પણ ભારત રશિયા પાસેથી ક્રૂડ ઓઇલની આયાત ચાલુ રાખશે. પેટ્રોલિયમ મંત્રાલયના સંયુક્ત સચિવ સુજાતા શર્માએ જણાવ્યું હતું કે આયાત યોજના પર કોઈ અસર નહીં થાય. વૈશ્વિક પુરવઠાને સ્થિર કરવા માટે, યુએસ ટ્રેઝરી વિભાગે સમુદ્રમાં ફસાયેલા રશિયન તેલના જહાજોમાંથી તેલ ખરીદવા માટે 30 દિવસનું અસ્થાયી લાઇસન્સ આપ્યું છે. આનાથી ઊર્જા-સંવેદનશીલ દેશોને રાહત મળશે. ભારતે મે મહિનામાં રેકોર્ડ 23 લાખ બેરલ પ્રતિ દિવસ ક્રૂડ ઓઇલની આયાત કરી.

ભારતીય શેરબજારમાં સકારાત્મક શરૂઆત, સેન્સેક્સ 308.45 પોઇન્ટ વધી 75,623.49 અને નિફ્ટી 102.30 પોઇન્ટ વધી 23,752 પર ખુલ્યો. વૈશ્વિક બજારોમાંથી મિશ્ર સંકેતો મળ્યા. તેલના ભાવમાં ઘટાડો, જાપાનનો GDP વધ્યો, અને યુએસ-ઈરાન તણાવ ઘટવાથી બજારને રાહત.

આજ એટલે કે મંગળવાર, 19 મેના રોજ સેન્સેક્સ 400 પોઈન્ટના ઉછાળા સાથે 75,700 પર કારોબાર કરી રહ્યો છે. નિફ્ટીમાં પણ 100 પોઈન્ટનો ઉછાળો છે, તે 23,750ના સ્તરે પહોંચી ગયો છે. આજના કારોબારમાં નિફ્ટી આઈટીમાં સૌથી વધુ ખરીદી જોવા મળી રહી છે, જ્યારે નિફ્ટી પ્રાઈવેટ બેંકના શેરોમાં સૌથી વધુ વેચવાલી છે. એશિયન બજારોમાં મિશ્ર કારોબાર અમેરિકી બજારો પણ મિશ્ર કારોબાર સાથે બંધ થયા વિદેશી રોકાણકારોએ ગઈકાલે ₹1329 કરોડના શેર ખરીદ્યા સેન્સેક્સ 1000 અંક ઘટ્યા બાદ રિકવર થઈને બંધ થયો હતો.

આંતરરાષ્ટ્રીય ક્રૂડ ઓઇલના ભાવ વધારાને કારણે પેટ્રોલ-ડીઝલના દરોમાં ફરી વધારો થયો છે. છેલ્લા પાંચ દિવસમાં આ બીજી વૃદ્ધિ છે. 2022ની જેમ ભાવ વધવાની ચિંતા છે. મહાનગરોમાં Petrol ₹98.64 થી ₹109.70 અને Diesel ₹91.58 થી ₹96.11 થયું છે. મધ્ય પૂર્વના તણાવને કારણે તેલ સંકટ ઘેરું બન્યું છે.

US જસ્ટિસ ડિપાર્ટમેન્ટ અને ટ્રમ્પ વહીવટીતંત્રે Adani Group સામેના કાનૂની વિવાદો પાછા ખેંચતા, $10 બિલિયનના વિશાળ રોકાણનો માર્ગ મોકળો થયો છે. આનાથી ઈન્ફ્રાસ્ટ્રક્ચર, એનર્જી, લોજિસ્ટિક્સ અને ડેવલપમેન્ટ ક્ષેત્રે વિસ્તરણને નવી દિશા મળશે. U.S. Securities and Exchange Commission સાથે પણ પારદર્શક સમજૂતીની પ્રક્રિયા ચાલી રહી છે.

દેશભરના દવાના વેપારીઓના અસ્તિત્વ અને જન આરોગ્યની સુરક્ષા માટે આગામી તા.૨૦ મે ના રોજ રાષ્ટ્રવ્યાપી બંધનું એલાન અપાયુ છે. ઓનલાઈન ફાર્મસીની અનિયંત્રીત કામગીરી અને શોષણકારી ભાવની નીતિ સામે રસ્તા પર ભાવનગર અને બોટાદ જિલ્લાના કેમીસ્ટસ રસ્તા પર  ઉતરશે. ગેરકાયદેસર ઈ-ફાર્મસી અને ડીપ ડિસ્કાઉન્ટના કારણે ૫ કરોડ આશ્રિતોની રોજીરોટી પર સંકટ છવાઈ જવા પામેલ છે.

ગુજરાતમાં EV માર્કેટમાં સબસિડી બંધ થતાં અને ચાર્જિંગ સ્ટેશનોના અભાવે રજિસ્ટ્રેશન ઘટ્યું છે. ગ્રાહકો બેટરી બ્લાસ્ટના ડરથી ઇલેક્ટ્રિક વાહનો ખરીદવામાં ખચકાય છે. RTO આંકડા મુજબ ટુ-વ્હીલર અને કારના વેચાણમાં નોંધપાત્ર ઘટાડો થયો છે, જ્યારે અમુક RTOમાં કારના વેચાણમાં વધારો પણ જોવા મળ્યો છે. ડીલરો તાત્કાલિક સરકારી સબસિડીની માંગ કરી રહ્યા છે.

દવાના છૂટક વેપારમાં ઓનલાઈન ફાર્મસીના કારણે નાના વેપારીઓને થતા નુકસાન સામે અમદાવાદ કેમિસ્ટ એસોસિએશન દ્વારા વિરોધ પ્રદર્શન કરવામાં આવ્યું છે. વેપારીઓના હિતના રક્ષણ માટે આવતીકાલે બુધવારના રોજ અમદાવાદ શહેર સહિત સમગ્ર ગુજરાત અને દેશભરના તમામ મેડિકલ સ્ટોર્સ એક દિવસ માટે 'પ્રતીકાત્મક બંધ' પાળશે. જોકે, દવા એસોસિએશન દ્વારા સ્પષ્ટતા કરાઈ છે કે, બંધ દરમિયાન સામાન્ય જનતાને હાલાકી ન પડે તે માટે સરકારી અને મ્યુનિસિપલ કોર્પોરેશન સંચાલિત હોસ્પિટલોના મેડિકલ સ્ટોર્સ ખુલ્લા રાખવામાં આવશે.

આજના સમયમાં સવારે ઉઠતાની સાથે જ જો કોઈ સમાચાર મિડલ ક્લાસ પરિવારનું આખું બજેટ હલાવી નાખતા હોય, તો તે છે ઈંધણના ભાવ. જો તમે વિચારતા હોવ કે ગત શુક્રવારે થયેલો ભાવવધારો છેલ્લો હતો, તો તમે ખોટા છો. સરકારે માત્ર 5 જ દિવસમાં જનતાને બીજો મોટો આંચકો આપતા ફરી પેટ્રોલ અને ડીઝલના ભાવમાં વધારો ઝીંકી દીધો છે. પશ્ચિમ એશિયામાં ચાલી રહેલા તણાવ અને વૈશ્વિક બજારની ઉથલપાથલની સીધી અસર હવે સામાન્ય ભારતીયના ખિસ્સા પર દેખાવા લાગી છે.  

ભારતની ચોખાની નિકાસ, તેની સૌથી મોટી કૃષિ-ઉત્પાદન શિપમેન્ટ, પશ્ચિમ એશિયા યુદ્ધથી પ્રભાવિત થઈ રહી છે અને એપ્રિલમાં શિપમેન્ટના મૂલ્યમાં ૬% ઘટાડો થયો છે. એપ્રિલ ૨૦૨૬માં, વિશ્વના સૌથી મોટા ચોખા નિકાસકાર ભારતે ૧.૦૧ બિલિયન ડોલર મૂલ્યના ચોખા મોકલ્યા હતા, જે વાર્ષિક ધોરણે ૬% ઘટાડો દર્શાવે છે. મધ્ય પૂર્વમાં સંઘર્ષે ઈરાન અને સાઉદી અરેબિયા સહિતના ખાડી દેશોમાં સુગંધિત લાંબા અનાજવાળા બાસમતી ચોખાની નિકાસમાં વિક્ષેપ પાડયો હતો.