અમદાવાદ અને ગાંધીનગરથી દિલ્હી જઈ રહેલા 100 યુવાનો નજરકેદ, ચૂંટણી કમિશનરના રાજીનામાની માંગ સાથે વિરોધ તેજ
મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે દેશવ્યાપી વિરોધ પ્રદર્શનો વચ્ચે, અમદાવાદ અને ગાંધીનગરથી દિલ્હી જઈ રહેલા લગભગ 100 યુવક-યુવતીઓને પોલીસે અગમચેતીના ભાગરૂપે નજરકેદ કર્યા છે. દિલ્હીમાં ચાલી રહેલા આંદોલનમાં જોડાતા યુવાનોને રોકવા માટે અમદાવાદ ક્રાઇમ બ્રાન્ચ, SOG અને સ્પેશિયલ બ્રાન્ચે સંયુક્ત ઓપરેશન હાથ ધર્યું હતું. રેલવે સ્ટેશનો અને બસ સ્ટેન્ડો પર ચુસ્ત ચેકિંગ ગોઠવવામાં આવ્યું છે. ગાંધીનગરમાં કાયદો-વ્યવસ્થાની સમીક્ષા માટે ઉચ્ચ અધિકારીઓની બેઠક યોજાઈ હતી. અમદાવાદમાં એલિસબ્રિજ ખાતે યુવાનો દ્વારા વિરોધ પ્રદર્શનની શક્યતાને પગલે પોલીસ તંત્ર સજ્જ બન્યું છે.