સલાયા મરીન પોલીસે ગુજરાત આતંકવાદ અને સંગઠિત ગુના નિયંત્રણ અધિનિયમ (ગુજસીટોક) હેઠળ નોંધાયેલા એક આરોપી શબીરહુશેન ઉર્ફે ભૂરો ગુલામ હુશેન સુંભણીયાને ઝડપી પાડ્યો છે. આ આરોપી પર ખંડણી, ચોરી, મારામારી, ગાંજાનું વેચાણ અને પોલીસ પર હુમલા જેવા ગંભીર ગુનાઓ નોંધાયેલા છે. ગુજરાત હાઈકોર્ટે ટ્રાયલ પૂર્ણ ન થાય ત્યાં સુધી તેને દ્વારકા જિલ્લામાં પ્રવેશ નહીં કરવા આદેશ આપ્યો હતો. મોહરમના તહેવાર દરમિયાન પેટ્રોલિંગ દરમિયાન, પોલીસને બાતમી મળી કે આરોપી સલાયા ટાઉન વિસ્તારમાં હાજર છે, જેના આધારે તેને પાળેશ્વર તળાવ પાસેથી ઝડપી પાડવામાં આવ્યો. આરોપી પાસેથી ત્રાંબાની મૂઠ મળી આવતા હથિયારબંધી જાહેરનામાના ભંગ બદલ પણ કાર્યવાહી કરાઈ છે.