80મા સ્વાતંત્ર્ય પર્વની ઉજવણીમાં દેવભૂમિ દ્વારકામાં દેશભક્તિનો અનેરો માહોલ જોવા મળ્યો. પ્રસિદ્ધ દ્વારકાધીશ જગતમંદિરના શિખર પર રાષ્ટ્રધ્વજ તિરંગો લહેરાતો જોઈ ભક્તોમાં ગૌરવની લાગણી છવાઈ હતી. આધ્યાત્મિકતા અને રાષ્ટ્રભક્તિનો અનોખો સંગમ સર્જાયો હતો. ભગવાન દ્વારકાધીશના ધામમાંથી ‘હર ઘર તિરંગા’ અભિયાનને સફળ બનાવવા અને દરેક નાગરિકના હૃદયમાં રાષ્ટ્રપ્રેમ પ્રજ્વલિત કરવાનો સંદેશ અપાયો હતો. આ દ્રશ્ય દેશપ્રેમના ઉત્સાહને નવી ઉંચાઈ પર લઈ ગયું.

સુરતના ડુમસ વિસ્તારમાં ‘જશ્ન વિલા 12-એ’ ફાર્મ હાઉસ પર જન્મદિવસની હાઇપ્રોફાઇલ દારૂની પાર્ટીમાં પોલીસે મોડી રાત્રે દરોડો પાડ્યો. આ કાર્યવાહીમાં 8 મહિલાઓ સહિત 20થી વધુ લોકો ઝડપાયા છે. મોંઘી લક્ઝરી ગાડીઓમાં આવેલા યુવક-યુવતીઓ વિદેશી દારૂની મહેફિલ માણી રહ્યા હતા. પોલીસે ઘટનાસ્થળેથી દારૂ, બિયર અને વાહનો મળી કુલ ૩૫ લાખથી વધુનો મુદ્દામાલ જપ્ત કર્યો છે. ઝડપાયેલા તમામની મેડિકલ તપાસ કરાવી આગળની કાર્યવાહી હાથ ધરવામાં આવી છે.

છોટા ઉદેપુર જિલ્લામાં 80મા સ્વાતંત્ર્ય દિવસની ઉજવણી સંખેડા ખાતે ખૂબ જ ઉત્સાહભેર યોજાઈ. ડી.બી. પારેખ હાઈસ્કૂલના મેદાનમાં યોજાયેલા મુખ્ય સમારોહમાં જિલ્લાના પ્રભારી મંત્રી મનીષાબેન વકીલે રાષ્ટ્રધ્વજ ફરકાવી ધ્વજવંદન કર્યું. આ પ્રસંગે સાંસદ જશુ રાઠવા, કલેક્ટર ગાર્ગી જૈન, ધારાસભ્ય અભેસિંહ તડવી સહિત અનેક મહાનુભાવો ઉપસ્થિત રહ્યા. વિદ્યાર્થીઓએ દેશભક્તિ અને સાંસ્કૃતિક કૃતિઓ રજૂ કરી, જેમાં પ્રથમ ક્રમ મેળવનાર વિદ્યાર્થીનીઓને સન્માનિત કરવામાં આવી.

સુરતની મેડિકલ કોલેજમાં ડૉ. હર્ષ પંડ્યાની આત્મહત્યા બાદ રેગિંગકાંડમાં નવા ખુલાસા થઈ રહ્યા છે. મુખ્ય આરોપી ડૉ. દિક્ષિતા ઘેવરીયાના પોલીસ સ્ટેશનમાં વર્તનથી રોષ જોવા મળી રહ્યો છે. રેગિંગ અટકાવવામાં નિષ્ફળ રહેલા કોલેજ તંત્ર સામે પગલાં લેવાશે. 30 જુનિયર તબીબોએ સિનિયરોના અસહ્ય ત્રાસ અંગે ખુલાસા કર્યા છે. HOD ડૉ. સુમૈયા મુલ્લા પર સસ્પેન્શનની પૂરી શક્યતા છે, કારણ કે તેઓએ જુનિયર તબીબોની ફરિયાદો પર ધ્યાન આપ્યું નહોતું. હવે HOD અને યુનિટ હેડ રેગિંગ માટે સીધા જવાબદાર ગણાશે.

અમરેલી ખાતે 80મો સ્વતંત્રતા પર્વ રાજ્યકક્ષાની ઉજવણી ઉત્સાહભેર સંપન્ન થયો. મુખ્યમંત્રી ભૂપેન્દ્ર પટેલે રાષ્ટ્રધ્વજ ફરકાવી નાગરિકોને શુભેચ્છાઓ પાઠવી. તેમણે જણાવ્યું કે, ગુજરાત 'વિકસિત ભારત'ના સંકલ્પમાં અગ્રેસર રહીને લીડ લેશે, અને વિકાસ-વિરાસતના સંગમથી ગુજરાત આગળ વધી રહ્યું છે. ગરીબો, યુવાનો, ખેડૂતો અને નારી શક્તિને વિકસિત ભારતના મજબૂત સ્તંભ ગણાવ્યા. ખેડૂતોને દિવસે વીજળી, જળ સંચય, બંદરોનો વિકાસ, 16 લાખથી વધુ ગરીબોને આવાસ અને 10,300 થી વધુ આરોગ્ય મંદિરો જેવી સિદ્ધિઓ ગણાવી. આકર્ષક પરેડ, રાઇફલ ડ્રીલ અને સાંસ્કૃતિક કાર્યક્રમો યોજાયા.

80મા સ્વાતંત્ર્ય પર્વની રાજ્યકક્ષાની ઉજવણી અમરેલીના પોલીસ પરેડ ગ્રાઉન્ડ ખાતે મુખ્યમંત્રી ભૂપેન્દ્ર પટેલની ઉપસ્થિતિમાં ભવ્ય રીતે સંપન્ન થઈ. મુખ્યમંત્રીએ રાષ્ટ્રધ્વજ ફરકાવી ધ્વજવંદન કર્યું. આ ઐતિહાસિક પ્રસંગે ગુજરાત પોલીસના જવાનો દ્વારા દિલધડક પરેડ, મહિલા જવાનો દ્વારા 'રાઇફલ ડ્રીલ' અને વિવિધ સાહસિક પ્રદર્શનો જેવા કે બાઈક સ્ટંટ શો, ડોગ-શો, 'માઉન્ટેડ અશ્વ-શો' અને 'ટેન્ટ પેગીંગ' રજૂ કરાયા. વિદ્યાર્થીઓએ સાંસ્કૃતિક કાર્યક્રમો અને યોગ પ્રસ્તુતિ કરી. આ કાર્યક્રમમાં અનેક ઉચ્ચ અધિકારીઓ અને નાગરિકો જોડાયા હતા.

ગુજરાતના અનેક સુંદર અને સક્રિય ધોધ, જેમ કે ગીરા, ઝાંઝરી, નિનાઈ, અને ગિરમાળ, ચોમાસામાં પાણીના પ્રવાહ વધવાને કારણે પ્રવાસીઓ માટે આકર્ષણનું કેન્દ્ર બન્યા છે. જોકે, વધતા પાણીના પ્રવાહ અને જોખમી પરિસ્થિતિઓને ધ્યાનમાં રાખીને, પ્રવાસીઓની સુરક્ષા માટે ગુજરાતના વહીવટી તંત્ર દ્વારા ધોધની નજીક સેલ્ફી લેવા, ફોટોગ્રાફી કરવા, અને જોખમી ખડકો પર ચઢવા પર પ્રતિબંધ મૂકવામાં આવ્યો છે. ઝાંઝરી ધોધ ખાતે પાંચ કિલોમીટરના વિસ્તારમાં આ નિયંત્રણો લાગુ કરાયા છે, જ્યારે અન્ય ધોધ પર પણ સાવચેતીના પગલાં લેવાઈ રહ્યા છે.

ભારતના ૮૦મા સ્વાતંત્ર્ય પર્વની દેશભક્તિના જોમ સાથે ઉજવણી થશે, જેમાં જિલ્લાભરમાં આન-બાન-શાન સાથે તિરંગો લહેરાવાશે. ઘોઘા રો-રો ફેરી ગ્રાઉન્ડ ખાતે જિલ્લા કક્ષાની ઉજવણી થશે, જ્યાં મંત્રી કુંવરજી બાવળિયાના હસ્તે ધ્વજવંદન થશે. કાર્યક્રમોમાં ધ્વજવંદન, પરેડ, સલામી, રમત-ગમત, સાંસ્કૃતિક કાર્યક્રમો, રાસ-ગરબા, નૃત્ય, રાષ્ટ્રગાન અને ઉદબોધનનો સમાવેશ થાય છે. આઝાદી પર્વની ઉજવણી નિમિત્તે સરકારી-ખાનગી બિલ્ડીંગો રોશનીથી ઝળહળી ઉઠ્યા છે.

ગયા વર્ષે અભિનેતા સૈફ અલી ખાન પર તેમના નિવાસસ્થાને ઘૂસીને છરી વડે હુમલો કરવાના આરોપમાં ધરપકડ કરાયેલા બાંગ્લાદેશી નાગરિક મોહમ્દ શરીફુલ ઈસ્લામ સામે મુંબઈની કોર્ટે આરોપો ઘડ્યા છે. આરોપીએ પોતાને નિર્દોષ જાહેર કર્યો છે. હવે તેની સામે ભારતીય ન્યાય સંહિતા (BNS) હેઠળ લૂંટ, ગંભીર ઈજા પહોંચાડવી, ઘરમાં ઘૂસણખોરી અને વિદેશી અધિનિયમ હેઠળ કેસ ચાલશે. આ હુમલો ૧૬ જાન્યુઆરીએ બાંદ્રા સ્થિત તેમના એપાર્ટમેન્ટમાં થયો હતો.

ઉમણિયાવદર ગામ પાસે પુલની માંગણીને લઇ ગ્રામજનોએ ચક્કાજામ કર્યો. ભાવનગર-સોમનાથ હાઈવે પર પુલના અભાવે લોકો અવરજવરમાં મુશ્કેલી અનુભવી રહ્યા છે, જેના કારણે વાહનવ્યવહારને અસર થઈ. ગંભીર અકસ્માતોના પગલે પુલની માંગણી લાંબા સમયથી કરાઈ રહી છે. વીર માંધાતા સંગઠનના નેતૃત્વમાં આંદોલન છેડાયું, જેમાં ૨૫ ગામના લોકો જોડાયા. પોલીસે રાજુ સોલંકી સહિત ગ્રામજનોની અટકાયત કરી. જ્યાં સુધી પ્રશ્નનું નિરાકરણ નહીં આવે ત્યાં સુધી લડત ચાલુ રાખવાની ચીમકી ઉચ્ચારાઈ. અગાઉ ચૂંટણી બહિષ્કાર બાદ હવે લોકો રસ્તા પર ઉતર્યા.

ઝારખંડમાં JPSC પરીક્ષાના મુદ્દે વિદ્યાર્થીઓ પર થયેલા લાઠીચાર્જના વિરોધમાં બોટાદમાં અખિલ ભારતીય વિદ્યા પરિષદ (ABVP) દ્વારા ટાવર ચોક ખાતે રસ્તા રોકો આંદોલન યોજવામાં આવ્યું. આ વિરોધ પ્રદર્શન દરમિયાન, ABVPના કાર્યકરોએ ઝારખંડ પોલીસની કાર્યવાહી સામે સૂત્રોચ્ચાર કર્યા. પોલીસે પ્રદર્શન કરી રહેલા ABVPના કાર્યકરોની અટકાયત કરી, જેના કારણે સમગ્ર ઘટના વખતે તંગદિલીનો માહોલ સર્જાયો હતો.

ભાવનગરની સમરસ હોસ્ટેલમાં વિદ્યાર્થીઓને હલકી ગુણવત્તાનું ભોજન, દૂષિત પાણી અને સુરક્ષાનો અભાવ જેવી અનેક સમસ્યાઓનો સામનો કરવો પડી રહ્યો છે. ભોજનમાં જીવજંતુ નીકળવાની ઘટના બાદ રાષ્ટ્રીય દલિત અધિકાર મંચ દ્વારા કલેક્ટરને લેખિત રજૂઆત કરવામાં આવી છે. 20 દિવસ લિફ્ટ બંધ રહેવાથી નવમાં માળે રહેતી વિદ્યાર્થિનીઓને ભારે હાલાકી ભોગવવી પડે છે. હોસ્ટેલ કેમ્પસની આસપાસ લુખ્ખા તત્ત્વોનો ત્રાસ પણ યથાવત છે. અધિકારીઓ અને વોર્ડન દ્વારા રજૂઆતોની અવગણના કરાતા વિદ્યાર્થીઓ ભણે કે રજૂઆતો કરે તેવો પ્રશ્ન સર્જાયો છે.

ભાવનગરના કુંભારવાડા વિસ્તારમાં જૂની અદાવતનો ખાર રાખી વિશાલભાઈ રમેશભાઈ ધરજીયા (ઉં.વ.૨૨) નામના યુવક પર લોખંડના પાઇપ અને ધોકા વડે જીવલેણ હુમલો કરવામાં આવ્યો. આ બનાવમાં ગંભીર રીતે ઘવાયેલા વિશાલભાઈને માથાના ભાગે હેમરેજ તથા બંને હાથ-પગમાં ફ્રેક્ચર જેવી ગંભીર ઇજાઓ પહોંચતા સારવાર અર્થે હોસ્પિટલ ખસેડવામાં આવ્યા. રોહિત ચોગઠ અને બલ્લી નામના શખ્સોએ રસ્તો રોકી હુમલો કર્યો. બોરતળાવ પોલીસે ગુનો નોંધી વધુ તપાસ હાથ ધરી છે.

ક્વિક કોમર્સ કંપનીઓ બ્લિન્ક ઈટ, ઝેપ્ટો અને સ્વીગી ઈન્સ્ટામાર્ટનાં મુંબઈ અને પુણે સ્થિત ૮૬ સ્ટોર્સ પર એફડીએની ટીમોએ દરોડા પાડ્યા હતા. આ દરોડા દરમિયાન, અનેક સ્ટોર્સમાં ઉંદર, વાંદા, સડેલાં શાકભાજી, એક્સપાયરી ડેટના ખાદ્યપદાર્થો અને ગંભીર ગંદકી જોવા મળી હતી. ફૂડ સેફ્ટીના નિયમોના ઉલ્લંઘન બદલ ૧૪ યુનિટનાં લાયસન્સ સસ્પેન્ડ કરાયાં હતાં, જ્યારે ૬૦ યુનિટ્સને સુધારણા માટે નોટિસ આપવામાં આવી હતી. કોલ્ડ ચેઈન જાળવણીમાં પણ બેદરકારી જણાઈ હતી, જે ગ્રાહકોના સ્વાસ્થ્ય માટે જોખમી છે.

મુંબઈમાં પાર્લે એગ્રોના વેરહાઉસમાં FDA દ્વારા રાત્રિ કાર્યવાહી હાથ ધરાઈ, જ્યાં મુદતવીતી ફ્રુટી અને એપ્પી ફિઝના લગભગ રૂ. એક લાખના જથ્થા પર કાર્યવાહી કરવામાં આવી. FDAની ટીમે પીણાંના સ્ટોકની એક્સપાયર ડેટ, સંગ્રહ અને વિતરણ સંબંધિત દસ્તાવેજોની ચકાસણી કરી. મુદત પૂર્ણ થયેલા પીણાંનું વેચાણ કરવું ખાદ્ય સુરક્ષા નિયમોનું ગંભીર ઉલ્લંઘન ગણાય છે. આ જથ્થો ગ્રાહકો સુધી પહોંચે તે પહેલાં જ કબજે કરી લેવામાં આવ્યો. શા માટે મુદતવીતી પ્રોડક્ટ રાખવામાં આવી હતી તેની તપાસ ચાલી રહી છે.

મુંબઈમાં રિડેવલપમેન્ટ પ્રોજેક્ટમાં છેતરપિંડી બદલ ડેવલપર જયેશ તન્ના, દીપતન્ના, વિવેક તન્ના સહિત સાત જણ સામે ૮૫ કરોડની ઠગાઈના આરોપમાં ચાર્જશીટ જારી કરવાનો આદેશ પીએમએલએ કોર્ટે આપ્યો છે. મુંબઈ પોલીસની આર્થિક ગુના શાખાએ આ આરોપીઓને અંધેરી, કાંદિવલી, ગોરેગાંવ ખાતેના પ્રોજેક્ટમાં ફ્લેટ્સ માટે લીધેલી રકમ અન્યત્ર વાપરી રોકાણકારો સાથે છેતરપિંડી કરવા બદલ ધરપકડ કરી હતી. તપાસમાં જણાયું છે કે આ રકમ પોતાના લાભ માટે વાપરવામાં આવી હતી અને કેટલીક બોગસ કંપનીઓ દ્વારા વિદેશમાં મિલકતો ખરીદવા માટે ભંડોળનો ઉપયોગ થયો હતો.

ભાવનગરના સિહોર તાલુકાના રાજપરા ગામે ખોડિયાર મંદિર પાસે ૧૭ વર્ષીય વિદ્યાર્થી હિરનભાઈ મકવાણા પર રોહિત નામના શખ્સે લોખંડના પાઈપ વડે હુમલો કર્યો. બીડી પીવાની ફરિયાદ મામાને કરી હોવાની દાઝ રાખીને રોહિતે વિદ્યાર્થી પર હુમલો કર્યો, જેમાં હિરનભાઈને મોં અને હાથ પર ગંભીર ઇજાઓ થઈ. ઇજાગ્રસ્ત વિદ્યાર્થીને સિહોર સરકારી હોસ્પિટલ ખસેડાયો. પોલીસે ગુનો નોંધી તપાસ હાથ ધરી છે.

અમદાવાદ શહેર અસહ્ય ધ્વનિ પ્રદૂષણથી બીમાર બની રહ્યું છે, જે આરોગ્ય અને ઓલિમ્પિક યજમાની માટે ચિંતાનો વિષય છે. ડૉ. અક્ષય વોરાના સંશોધન મુજબ, શહેરમાં 40 થી 82 ડેસિબલ સુધીનો ઘોંઘાટ નોંધાયો છે, જેમાં 52% હિસ્સો માત્ર ટુ-વ્હીલર્સનો છે. ઇન્કમટેક્સ ચાર રસ્તાથી શરૂ થયેલા 30 રૂટ પર 633 લોકેશન પર 400 કિલોમીટરની મુસાફરી કરીને નોઇસ મેપિંગ કરવામાં આવ્યું. પૂર્વ અમદાવાદ વધુ ઘોંઘાટવાળું હોવાનું જણાયું છે. આ વધી રહેલું પ્રદૂષણ ગર્ભસ્થ અને નવજાત શિશુઓ પર પણ ગંભીર અસર કરી શકે છે.

કેન્દ્ર સરકારના આંકડા મુજબ, ગુજરાત સહિત સાત રાજ્યોમાં શાકભાજીમાં જંતુનાશક દવાનું પ્રમાણ MRL (Maximum Residue Limit) કરતાં વધારે મળી આવ્યું છે. દેશભરમાં 70,652 સેમ્પલમાંથી 68,429 સેમ્પલમાં આ સમસ્યા જોવા મળી છે. ગુજરાતમાં 6,035 સેમ્પલમાંથી 170 માં પેસ્ટિસાઈડનું પ્રમાણ વધુ હતું. આ ઝેરી તત્વો સ્વાસ્થ્ય માટે અત્યંત હાનિકારક છે, જે પેટની બીમારીઓથી લઈને લીવર, કિડની અને કેન્સર જેવી ગંભીર બીમારીઓ નોતરી શકે છે. બાળકો અને વૃદ્ધો પર તેની અસર વધુ જોવા મળે છે. તેને ઘટાડવા માટે શાકભાજીને યોગ્ય રીતે ધોવા, ઉપલા પાન કાઢવા અને અમુક શાકભાજીને ઉકાળીને ઉપયોગમાં લેવા જેવા ઉપાયો સૂચવવામાં આવ્યા છે.

અમરેલીમાં 15 ઓગસ્ટે 80મા સ્વાતંત્ર્ય પર્વની રાજ્યકક્ષાની ભવ્ય ઉજવણી થશે. મુખ્યમંત્રી ભૂપેન્દ્ર પટેલ પોલીસ પરેડ ગ્રાઉન્ડ ખાતે રાષ્ટ્રધ્વજ ફરકાવશે. આ કાર્યક્રમમાં પોલીસ જવાનોની દિલધડક પરેડ, મહિલા જવાનો દ્વારા રાઇફલ ડ્રીલ, સાંસ્કૃતિક કૃતિઓ, યોગ, ડોગ-શો, બાઈક સ્ટંટ શો, ‘માઉન્ટેડ અશ્વ-શો’ અને ‘ટેન્ટ પેગીંગ’ જેવા આકર્ષક કાર્યક્રમો યોજાશે. રાજ્ય સરકારના વરિષ્ઠ અધિકારીઓ પણ ઉપસ્થિત રહેશે. વિવિધ જિલ્લા મથકોએ પણ મંત્રીઓ-કલેકટરની અધ્યક્ષતામાં ધ્વજવંદન સમારોહ યોજાશે.

સુરેન્દ્રનગરના વઢવાણ તાલુકાના માળોદ ગામમાં ખેતરના શેઢા પર માટીકામ કરી રહેલી 56 વર્ષીય કંચનબેન પટેલ પર તેમના પડોશી જીતેન્દ્ર રામજીભાઈ પટેલે સોરીયા વડે જીવલેણ હુમલો કર્યો હતો. દોઢ વર્ષ પહેલાં થયેલી ખેતરની માપણી બાબતે બંને પક્ષો વચ્ચે મનદુઃખ ચાલતું હતું. હુમલાખોરે કંચનબેન અને તેમના પતિને જાનથી મારી નાખવાની ધમકી પણ આપી હતી. આ અંગે જોરાવરનગર પોલીસ મથકે ફરિયાદ નોંધાઈ છે અને વધુ તપાસ એચસી એસ.એમ.સુમેરા કરી રહ્યા છે.

વડોદરાના પાણીગેટ સ્થિત આયુર્વેદિક હોસ્પિટલ અને ઓમ સીનીયર સીટીઝન એસોસીયેશનના સહયોગથી શ્રી ઉદય નારાયણ મહાદેવ મંદિરમાં એક મેડિકલ ચેક-અપ કેમ્પ યોજાયો હતો. આ કેમ્પમાં ડૉ. ચૈતાલી શાહ અને તેમની ટીમ દ્વારા ૧૦૦ થી વધુ દર્દીઓની વિનામૂલ્યે તપાસ કરી દવાઓ આપવામાં આવી. આ કાર્યક્રમમાં એસોસિએશનના ઉપપ્રમુખ જગદીશભાઈ પંડયા, હોદ્દેદારો, સભ્યો અને મોટી સંખ્યામાં લોકો ઉપસ્થિત રહ્યા હતા. રજનીભાઈ પટેલે આયોજનમાં મહત્વનો ફાળો આપ્યો હતો.

ભારે વરસાદને કારણે નવનિર્માણ વિદ્યાલય ઢોળીયાવાડ, પ્રાથમિક શાળા મહિલા મુખ્ય પ્રાથમિક શાળા જીપપાડા વર્ગ શાળા તેમજ નવી વસાહત વર્ગ શાળાના વિદ્યાર્થીઓના નોટબુક અને પુસ્તકોને ભારે નુકસાન થયું હતું. જેના પગલે ધોરણ 1થી 12ના અંદાજે 600 જેટલા વિદ્યાર્થીઓને શ્રી રંગ સિવાય તીર્થ ફઉન્ડેશન તેમજ આરટીઓના સ્ટાફ્ના સહયોગથી ચોપડા અને નોટબુકનું વિનામૂલ્ય વિતરણ કરવામાં આવ્યું હતું કાર્યક્રમમાંડો. કનુભાઈ લીંબાચા તેમજ રાજેન્દ્રસિંહ ચૌહાણ તથા પીબી લાઠીયા સહિત અન્ય ઉપસ્થિત રહ્યા હતા

કમિશનર યુવક સેવા અને સાંસ્કૃતિક પ્રવૃત્તિઓ,ગાંધીનગર, આયોજિત જિલ્લા યુવા અને સાંસ્કૃતિક પ્રવૃત્તિઓની કચેરી, વડોદરા શહેર, સંચાલિત માંડવી ઝોન કક્ષા,અનુસૂચિત જનજાતિ વ્યક્તિત્વ વિકાસ અને યોગાસન તાલીમ શિબિર -2026 કાર્યક્રમ અંતર્ગત સરદાર એસ્ટેટ સ્થિત કે.બી. પરીખ હાઈસ્કૂલમાં યોગા ટ્રેનર નિશાબેન તથા યેશાબેન રાજપૂતે શાળાના 40 વિદ્યાર્થીઓને યોગાસનની માહિતી આપી પ્રેકટિકલ અને તેના લાભ સાથે સમજૂતી તેમજ માર્ગદર્શન આપ્યુ હતુ

કારેલીબાગ પોલીસ સ્ટેશન સામે આવેલી ડિફન્સ ભૂમિ અને ત્યાં આવેલ હેરિટેજ બંગલાની આજુબાજુ માં આવેલા વિશાળ વૃક્ષની ડાળીઓ એટલી લાંબી થઇ ગઈ છે કે શાળાના બિલ્ડીંગની બારી સુધી પહોંચી ગઈ છે અને ચોમાસામાં વરસાદમાં મચ્છરોનો ઉપદ્રવ વધી ગયો છે તેમજ હંમેશા સરિસૃપની દહેશત હોય છે. આ અંગે જીવન સાધના શાળાના સિનિયર શિક્ષક હસમુખ પાઠકે ઈએમઈમાં લેન્ડ રેકર્ડ વિભાગમાં રજૂઆત કરીને વૃક્ષોની ડાળીઓ કાપવા માટે અનુરોધ કર્યો છે.

વડોદરા નજીક પોર સ્થિત શ્રી સી.સી.પટેલ ગ્લોબલ સ્કૂલ ખાતે SGFI (SCHOOL GAMES FEDERATION OF INDIA) દ્વારા આયોજિત 70મી શાળા કક્ષાના રમતોત્સવ અંતર્ગત રગ્બી સ્પર્ધામાં શાળાની ટીમે નોંધપાત્ર પ્રદર્શન કરી વિજય મેળવ્યો છે. આ સ્પર્ધામાં વિવિધ વયજૂથની 15 ટીમોએ ભાગ લીધો હતો. શાળાના ટ્રસ્ટીઓ અને આચાર્યના હસ્તે પ્રારંભ કરાયેલી આ સ્પર્ધામાં શ્રી સી.સી.પટેલ ગ્લોબલ સ્કૂલની રગ્બી ટીમે ઉત્કૃષ્ટ દેખાવ કરી સ્ટેટ લેવલ માટે પસંદગી મેળવી છે.

શહેરના દાંડિયાબજાર સ્થિત પ્રેમાનંદ સાહિત્ય સભામાં સમાજસેવક શંકરલાલ ત્રિવેદીની અધ્યક્ષતા અને જયંતોર્મિ સાહિત્ય સેવા ટ્રસ્ટના હરીશ શાહ તથા કવિ દુર્ગેશ ઉપાધ્યાયના અતિથિ વિશેષપદે દેશભક્તિ ગીત, ગઝલ, કવિતા, અછાંદસની પાદપૂર્તિ સ્પર્ધા યોજાઈ. આ સ્પર્ધામાં 32 કવિ-કવયિત્રીઓએ સ્વરચિત કૃતિઓ રજૂ કરી વાતાવરણ દેશભક્તિમય બનાવ્યું. હરીશ શાહે પ્રેમાનંદની પ્રવૃત્તિઓને બિરદાવી, દુર્ગેશ ઉપાધ્યાયે દેશદાઝ જાળવવા કહ્યું, અને શંકરલાલ ત્રિવેદીએ ઐક્ય સાધવાની હિમાયત કરી. વિવિધ પુરસ્કારો વિજેતાઓને એનાયત કરાયા.

એમ.એસ.યુનિ.ના હોલ્સ ઑફ રેસિડન્સ અને બ્રહ્માકુમારી સંસ્થાના સહયોગથી 600 યુનિવર્સિટી હોસ્ટેલના વિદ્યાર્થીઓમાં નશાના દૂષણો અંગે જાગૃતિ ફેલાવવા નશા મુક્તિ પ્રતિજ્ઞા મહા અભિયાનનું આયોજન કરાયું. આ અભિયાનનો ઉદ્દેશ યુવા વિદ્યાર્થીઓને નશાના હાનિકારક પ્રભાવોથી અવગત કરાવી વ્યસનમુક્ત સમાજ નિર્માણમાં તેમની ભાગીદારી સુનિશ્ચિત કરવાનો હતો. ચીફ વોર્ડન મેજર ડૉ. વિજય પરમારે જણાવ્યું કે, નશામુક્ત જીવન જીવવા માટે પ્રતિજ્ઞા લેવડાવી, તેમને નશામુક્તિ માત્ર વ્યક્તિગત સંકલ્પ નથી, પરંતુ સમગ્ર સમાજ પ્રત્યેની જવાબદારી છે.

ઘોઘંબા તાલુકાના ફરોડ ગામની શ્રી કામનાથ હાઈસ્કૂલમાં સ્વાતંત્ર્ય દિનની ઉત્સાહભેર ઉજવણી કરવામાં આવી. આ નિમિત્તે આંતર-શાળા કક્ષાની વિવિધ સ્પર્ધાઓનું આયોજન થયું, જેમાં ચિત્ર, નિબંધ, વકતૃત્વ અને દેશભક્તિ ગીત સ્પર્ધા યોજાઈ. વિદ્યાર્થીઓએ 'મારો ભારત દેશ' અને 'સ્વાતંત્ર્ય સંગ્રામના અમર શહીદો' જેવા વિષયો પર ચિત્રો દોરી, 'આઝાદીનું મહત્વ' જેવા વિષયો પર નિબંધ લખી અને શહીદોના બલિદાન જેવા વિષયો પર વક્તવ્યો આપી પોતાની દેશભક્તિ પ્રદર્શિત કરી. દેશભક્તિ ગીતોની રમઝટ પણ જામી.

ગોધરાના ઘોઘંબા તાલુકામાં આવેલ એસ. પી. પટેલ આર્ટ્સ કોલેજ, સિમલીયાના NCC દ્વારા NCC ઓફીસર ડૉ. મનહરકુમાર મકવાણાના માર્ગદર્શન હેઠળ આજરોજ હર ઘર ત્રિરંગા કાર્યક્રમ અંતર્ગત ભારતના 80 માં સ્વતંત્રતા પર્વની ઉજવણીના ભાગરૂપે ત્રિરંગા યાત્રા યોજાઇ હતી. સિમલીયા ગામમાં આ યાત્રા ફ્રી હતી. કોલેજના પ્રિન્સિપાલ ડૉ. દિલીપકુમાર અમીન, સ્ટાફ્ગણ, NCCના કેડેટ્સ ઉપરાંત વિધાર્થીઓ મોટી સંખ્યામાં ત્રિરંગા યાત્રામાં જોડાયા હતા.