ભારતીય ટીમે ઈંગ્લેન્ડ સામે પ્રથમ વનડે મેચ 6 વિકેટે જીતી લીધી છે. ઈંગ્લેન્ડ 258 રનમાં ઓલઆઉટ થયું હતું, જેમાં અક્ષર પટેલે 4 વિકેટ લીધી હતી. જો રૂટે 76* અને લિયામ ડોસન 68 રન બનાવી શક્યા. જવાબમાં શુભમન ગિલ 80 રન બનાવી રિટાયર્ડ હર્ટ થયા, જ્યારે વોશિંગ્ટન સુંદર 52* અને અક્ષર પટેલ 57* રનની અણનમ ભાગીદારી કરીને ભારતને 28 બોલ બાકી રહેતા યાદગાર જીત અપાવી.

પશ્ચિમ એશિયામાં ચાલી રહેલા સંઘર્ષને કારણે ભારતીય નાગરિકો, ખાસ કરીને દરિયાઈ નાવિકો મોટી મુશ્કેલીમાં છે. સરકારી સૂત્રોના જણાવ્યા અનુસાર, ૨૮ ફેબ્રુઆરીથી અત્યાર સુધીમાં ખાડી વિસ્તારમાં ૧૩ ભારતીય નાવિકોના મોત થયા છે, જ્યારે ૩ હજુ પણ ગુમ છે. અમેરિકા-ઈરાન તણાવ વધતા Hormuz Strait પર વ્યાપારી જહાજો પર હુમલાઓ વધી ગયા છે, જેમાં જીવ ગુમાવનારા વિદેશી નાગરિકોમાં ભારતીયોની સંખ્યા સૌથી વધુ છે. આ કારણે વૈશ્વિક દરિયાઈ વેપાર અને જહાજોની અવરજવર પર ગંભીર અસર પડી રહી છે.

સુરત DCP રાજદીપસિંહ નકુમ ફરી એકવાર ચર્ચામાં છે. સલાબતપુરા વિસ્તારમાં હત્યાના પ્રયાસના આરોપીઓને કોર્ટ અને DGPના નિયમોને અવગણી જાહેરમાં માર મારવામાં આવ્યો. આ ઘટનાનો વીડિયો વાયરલ થતાં DCP નકુમની કાર્યશૈલી સામે પ્રશ્નો ઉઠી રહ્યા છે. પોલીસ કાયદાના રક્ષક હોવા છતાં જાતે કાયદો હાથમાં લઈને ન્યાય આપી રહ્યા છે, જે સુપ્રીમ કોર્ટ અને DGPના આદેશોનું સ્પષ્ટ ઉલ્લંઘન છે. આ ઘટના 'ખેડા ફ્લોગિંગ કેસ'ની યાદ અપાવે છે, જ્યાં આવા કૃત્ય બદલ પોલીસકર્મીઓને સજા થઈ હતી.

ગુજરાત રાજ્યમાં ચાંદીપુરા વાયરસનો ભય ફેલાયો છે. છેલ્લા 14 દિવસમાં 32 શંકાસ્પદ કેસ નોંધાયા છે, જેમાં 7 પોઝિટિવ અને 3 દર્દીઓના મોત થયા છે. 20 દર્દીઓ સારવાર હેઠળ છે જ્યારે 9ના રિપોર્ટ બાકી છે. આરોગ્ય વિભાગ અને IMA દ્વારા અસરગ્રસ્ત વિસ્તારોમાં સર્વેલન્સ, દવાનો છંટકાવ અને જાગૃતિ અભિયાન શરૂ કરાયું છે. 'સેન્ડફ્લાય' દ્વારા ફેલાતા આ વાયરસથી બચવા ઘર અને આસપાસની સ્વચ્છતા જાળવવી, તાવ, ઉલટી કે બેભાન અવસ્થામાં તાત્કાલિક સારવાર લેવી જરૂરી છે.

ભરૂચ જિલ્લાના પાનોલી પોલીસ સ્ટેશનના ત્રણ પોલીસકર્મીઓ દારૂના કેસના આરોપીનો મોબાઇલ પરત આપવા માટે રૂપિયા ૧ લાખની લાંચ લેતા એસીબી (ACB) દ્વારા રંગેહાથ ઝડપી પાડવામાં આવ્યા છે. પ્રોહિબિશન એક્ટ હેઠળ નોંધાયેલા કેસ બાદ આરોપીનો મોબાઇલ પરત આપવા માટે ASI અનિરુદ્ધ વલકુભાઈ ધાંધલ અને હેડ કોન્સ્ટેબલ જયદીપસિંહ સુખદેવસિંહ પરમોરે ૩ લાખની માંગણી કરી હતી. આખરે ૧ લાખના ત્રણ હપ્તા નક્કી થયા હતા. આરોપીની ફરિયાદ બાદ LRD કોન્સ્ટેબલ સાગર કરણભાઈ ચાવડાએ પ્રથમ હપ્તો સ્વીકારતા ત્રણેયને ACBએ પકડી પાડ્યા.

ગુજરાત હાઈકોર્ટમાં દાખલ કરાયેલી હેબિયસ કોર્પસ અરજી દરમિયાન મોટો ખુલાસો થયો. અરજદારની પત્ની અને પુત્રીને ડિટેન્શન સેન્ટરમાં નહીં, પરંતુ કાયદાકીય પ્રક્રિયા પૂર્ણ કરીને બાંગ્લાદેશ પરત મોકલી દેવાયા છે. અરજદારના વકીલે દલીલ કરી હતી કે પોલીસ અધિકારીઓ અરજદારના પરિવારને લઈ ગયા હતા, જેમાં પત્ની અને સાત વર્ષની પુત્રીને ગેરકાયદે રીતે અટકાયતમાં રખાયાનો આક્ષેપ હતો. બંને બાંગ્લાદેશી નાગરિક હોવાથી, કાયદેસરની કાર્યવાહી કરીને 11 જુલાઈ, 2024ના રોજ તેમને બાંગ્લાદેશ મોકલી દેવાયા હતા.

આમ આદમી પાર્ટી (AAP)ના સંયોજક અરવિંદ કેજરીવાલે E20 પેટ્રોલના મુદ્દે વડાપ્રધાન નરેન્દ્ર મોદીને પત્ર લખ્યો છે. તેમણે દેશના દરેક પેટ્રોલ પંપ પર E20 પેટ્રોલ અને સામાન્ય પેટ્રોલ બંને વિકલ્પો ઉપલબ્ધ કરાવવાની તેમજ E20 પેટ્રોલના ભાવ સામાન્ય પેટ્રોલ કરતા ઓછા રાખવાની માગણી કરી છે. આ મુદ્દે જનતા તરફથી StopE20petrol.com દ્વારા વડાપ્રધાનના નામે એક ઓનલાઈન પિટિશન પણ શરૂ કરવામાં આવી છે, જેમાં નાગરિકો પોતાના મંતવ્યો આપી શકે છે. આ પહેલાં પણ કેજરીવાલે વાહન ઉત્પાદક કંપનીઓને E20 પેટ્રોલ સુસંગતતા અંગે પત્ર લખ્યો હતો.

ભારત અને ઇંગ્લેન્ડ વચ્ચેની વનડે સિરીઝ શરૂ થાય તે પહેલાં ટીમ ઈન્ડિયાના પ્રેક્ટિસ સેશનમાં એક ચોંકાવનારો વીડિયો સામે આવ્યો છે. રિપોર્ટ અનુસાર, પ્રેક્ટિસ દરમિયાન હેડ કોચ ગૌતમ ગંભીર અને સ્ટાર બેટ્સમેન વિરાટ કોહલી વચ્ચે કોઈ વાતચીત થઈ નથી, જે ક્રિકેટ જગતમાં ચર્ચાનો વિષય બન્યો છે. ગંભીરે રોહિત શર્મા, શુભમન ગિલ અને કેએલ રાહુલ જેવા સિનિયર ખેલાડીઓ સાથે વાત કરી, પરંતુ કોહલી સાથે તેમની વાતચીત ન થતાં અને બેટિંગ કોચ સિતાંશુ કોટક પણ બંને સાથે અલગ-અલગ વાત કરતા દેખાતાં, તેમના વચ્ચે વિવાદ હોવાની શક્યતા વ્યક્ત થઈ રહી છે.

હોર્મુઝ સ્ટ્રેટમાંથી પસાર થતા ઓઈલ ટેન્કરો પર અમેરિકા દ્વારા 20% ગાર્ડિયન ફી લગાવવાના પ્રસ્તાવથી વૈશ્વિક ઓઈલ માર્કેટમાં હલચલ મચી છે. આ પ્રસ્તાવ અમલમાં આવવાથી ભારતમાં કાચા તેલની આયાત કિંમત વધી શકે છે, જે સીધી અસર પેટ્રોલ અને ડીઝલના ભાવ પર કરશે. ઈરાન પણ આ માર્ગેથી પસાર થતા જહાજો પાસેથી ટોલ વસૂલ રહ્યું છે. એક ઓઈલ ટેન્કરને કુલ 275 કરોડ રૂપિયા ટોલ તરીકે ચૂકવવા પડી શકે છે, જેનાથી પ્રતિ બેરલ 15 ડોલરનો વધારો થઈ શકે છે, જે ભારતમાં પેટ્રોલ-ડીઝલને લગભગ 9 રૂપિયા પ્રતિ લીટર મોંઘું બનાવી શકે છે.

કેન્દ્રીય મંત્રી નીતિન ગડકરી, ટોયોટા અને ઈથેનોલ પ્રોજેક્ટ અંગે સોશિયલ મીડિયા પર કથિત ખોટી અને ભ્રામક માહિતી ફેલાવવાના આરોપમાં નાગપુર સાયબર પોલીસે ચાર ઈન્ફ્લુએન્સર્સ સામે FIR નોંધી છે. ફરિયાદમાં યુટ્યુબર મનીષ કશ્યપ તેમજ ‘દેશી બોયઝ’, હર્ષિત રાઠી અને અંકલેશ ઈનવાતેના એકાઉન્ટ્સનો સમાવેશ થાય છે. આરોપ છે કે પુરાવા વગરના દાવાઓથી લોકોમાં ભ્રમ અને સરકારની છબી ખરડાવવાનો પ્રયાસ થયો. પોલીસે વાયરલ વીડિયો અને પોસ્ટની સત્યતા તથા તેની સામાજિક અસર અંગે તપાસ શરૂ કરી છે.

પાકિસ્તાનમાં સ્થિત ગેંગસ્ટર શહેઝાદ ભટ્ટીના કથિત નેટવર્કની તપાસ મહારાષ્ટ્ર એન્ટી ટેરરિઝમ સ્ક્વોડ (ATS) દ્વારા વધુ તેજ કરવામાં આવી છે. પુણે જિલ્લામાં ATSએ મોટી કાર્યવાહી હાથ ધરી ૬૬ લોકોની પૂછપરછ કરી. આ કાર્યવાહી પુણે શહેર, ગ્રામીણ પોલીસ અને પિંપરી-ચિંચવડ પોલીસની મદદથી થઈ રહી છે. ATS માને છે કે આ લોકો શહેઝાદ ભટ્ટીના સંપર્કમાં હતા. આ પહેલાં પણ રાજ્યભરમાં ૧૧૨ લોકોની ઓળખ થઈ હતી, જેમના પાકિસ્તાની ગેંગસ્ટર સાથે સંપર્ક હોવાની આશંકા છે. શહેઝાદ ભટ્ટી યુવાનોને સોશિયલ મીડિયા દ્વારા દેશવિરોધી પ્રવૃત્તિઓ માટે ઉશ્કેરતો હોવાની આશંકા છે. આ ઉપરાંત, શંકાસ્પદ નાણાકીય વ્યવહારોની પણ તપાસ થઈ રહી છે.

૧૯૯૭માં ટી-સિરીઝના સંસ્થાપક ગુલશન કુમારની હત્યામાં સંગીતકાર નદીમ સૈફીનું નામ સામે આવ્યું હતું, જેના કારણે તેમની કારકિર્દી પર અસર પડી અને તેઓ દેશ છોડીને ભાગી ગયા. હવે ૨૯ વર્ષ બાદ, અનુરાધા પૌંડવાલે આ મામલે પ્રતિક્રિયા આપી છે. જ્યારે તેમને પૂછવામાં આવ્યું કે શું નદીમને ખોટી રીતે ફસાવવામાં આવ્યા હતા, ત્યારે તેમણે કહ્યું કે તેમને આ વિશે કોઈ જાણકારી નથી કારણ કે ગુલશન કુમારે ક્યારેય આ બાબતે ચર્ચા કરી ન હતી. અનુરાધાએ હંમેશા પોતાની જાતને નકારાત્મકતાથી દૂર રાખી છે અને તેઓ લોકોની વાતોથી પ્રભાવિત થતા નથી.

વર્ષ 2020ના દિલ્હી રમખાણો દરમિયાન IB અધિકારી અંકિત શર્માની હત્યાના કેસમાં AAP ના પૂર્વ કાઉન્સિલર તાહિર હુસૈન સહિત પાંચ આરોપીઓને દોષી ઠેરવવામાં આવ્યા છે. આ ચુકાદા બાદ ભાજપે આમ આદમી પાર્ટીના સંયોજક અરવિંદ કેજરીવાલ પર અત્યંત ગંભીર આરોપો લગાવ્યા છે. ભાજપના રાષ્ટ્રીય પ્રવક્તા ગૌરવ ભાટિયાએ જણાવ્યું કે, તાહિર હુસૈનને અરવિંદ કેજરીવાલનું રાજકીય સંરક્ષણ પ્રાપ્ત હતું અને કેજરીવાલ જ તાહિર હુસૈનના અસલી આકા છે. તેમણે કેજરીવાલને આ હત્યાકાંડના સહ-આરોપી ગણાવ્યા. કોર્ટે જણાવ્યું કે, અંકિત શર્માની હત્યા માત્ર હિન્દુ હોવાને કારણે કરવામાં આવી હતી.

અમદાવાદના નવરંગપુરા વિસ્તારમાં રોડની કિનારે રિક્ષામાં બેફામ દારૂનું વેચાણ કરનાર બુટલેગરનો વીડિયો વાયરલ થતાં સ્થાનિક પોલીસ સફાળી જાગી છે. આ ઘટનાએ પોલીસની કામગીરી અને નિષ્ઠા પર ગંભીર સવાલો ઊભા કર્યા છે. ચોવીસ કલાક પેટ્રોલિંગના દાવા કરતી પોલીસને આ ખુલ્લેઆમ વેચાણની ભણક કેમ ન લાગી? ઉચ્ચ અધિકારીઓના દબાણ બાદ પોલીસે 33 વર્ષીય પ્રતાપભાઈ ગોપાલભાઈ સોનીને રિક્ષા અને દારૂ સાથે ઝડપી પાડ્યો. આ કાર્યવાહી સ્વયંભૂ થવાને બદલે 'ઉપરથી દબાણ' બાદ કેમ થઈ તે ચર્ચાનો વિષય બન્યો છે.

દેશભરની શાળાઓમાં સેક્સ એજ્યુકેશનને અભ્યાસક્રમનો ભાગ બનાવવાની કેન્દ્ર સરકારની યોજના છે. સુપ્રીમ કોર્ટમાં રજૂઆત કરતાં એડિશનલ સોલિસિટર જનરલે જણાવ્યું કે કોર્ટની મંજૂરી મળ્યા બાદ તેનો અમલ થશે. આ નિર્ણય POCSO કાયદાના દુરુપયોગ અને કિશોરોના પરસ્પર સંમતિવાળા સંબંધો અંગે સુપ્રીમ કોર્ટની ચિંતા બાદ લેવાયો છે. એક પેનલે અભ્યાસક્રમમાં વ્યાપક જાતીય શિક્ષણ અને બાળકોના જાતીય શોષણ જેવા વિષયો સામેલ કરવાનું સૂચન કર્યું છે, જેના માટે NCERT નવો અભ્યાસક્રમ તૈયાર કરશે.

અમરેલી જિલ્લામાં સિંહોનો ભય સતત વધી રહ્યો છે. છેલ્લા કેટલાક દિવસોથી સિંહો દ્વારા માનવો પર થયેલા હુમલાની ઘટનાઓ બાદ હવે લોકોમાં ચિંતા પ્રસરી છે. ગત રાત્રે રાજુલા તાલુકાના મોટા આગરિયા ગામે શિકારની શોધમાં ત્રણ સિંહો આવ્યા હતા. આ ઘટના ગામના CCTV કેમેરામાં કેદ થઈ હતી. સિંહોએ એક શ્વાન અને આખલાનો શિકાર કરવાનો પ્રયાસ કર્યો, પરંતુ શ્વાન ભાગી છૂટ્યો. આ દ્રશ્યો જોઈને ગામલોકોમાં ભયનો માહોલ છે અને વનવિભાગ પાસે નાઈટ પેટ્રોલિંગ વધારવાની માંગ કરી રહ્યા છે.

દેશભરમાં ચોમાસુ સક્રિય થતાં 22 રાજ્યોમાં ગાજવીજ સાથે ભારે વરસાદની આગાહી હવામાન વિભાગ દ્વારા જારી કરવામાં આવી છે. આગામી 3-4 દિવસ ઉત્તરપૂર્વ ભારત, બિહાર અને પશ્ચિમ બંગાળમાં અતિ ભારે વરસાદની શક્યતા છે. 14 જુલાઈએ મેઘાલય, ઉપ-હિમાલયી પશ્ચિમ બંગાળ અને સિક્કિમમાં પણ ભારે વરસાદ પડી શકે છે. જોકે, આગામી 6-7 દિવસ ઉત્તરપશ્ચિમ ભારતના મેદાની વિસ્તારોમાં વરસાદી ગતિવિધિઓ સામાન્યથી ઓછી રહેવાની ધારણા છે. દિલ્હી-NCR માં વરસાદની શક્યતા હાલ ઓછી છે, પરંતુ ભેજનું પ્રમાણ વધશે.

હવામાન વિભાગે આગામી 3 કલાક માટે નાઉ કાસ્ટ જાહેર કરતાં ગુજરાતના 11 જિલ્લાઓમાં હળવાથી મધ્યમ વરસાદની સંભાવના વ્યક્ત કરી છે. દાહોદ, પંચમહાલ, મહીસાગર, ભાવનગર, અમરેલી, જુનાગઢ, ગીર સોમનાથ, દીવ, રાજકોટ, મોરબી અને જામનગરમાં ગાજવીજ સાથે વરસાદ પડી શકે છે, સાથે પવનની ગતિમાં પણ વધારો થવાની શક્યતા છે. લોકોને સાવચેતી રાખવાની અને વીજળી પડે ત્યારે સુરક્ષિત સ્થળે રહેવાની સલાહ અપાઈ છે.

મોરબી જિલ્લામાં વીજલાઈન વળતર મુદ્દે ખેડૂતોનો રોષ ચરમસીમાએ પહોંચ્યો છે. 'સત્યાગ્રહ પાર્ટ-3' અંતર્ગત, 365 ગામ પંચાયતોના 25,000 થી વધુ ખેડૂતો અને મહિલાઓએ મહેન્દ્રનગર ચોકડીથી કલેક્ટર કચેરી સુધી વિશાળ પદયાત્રા યોજી સરકારના નવા પરિપત્રનો વિરોધ કર્યો. ખેડૂતોની મુખ્ય માંગણી છે કે ટ્રાન્સમિશન લાઈનોના વળતર અંગે ઈલેક્ટ્રિસિટી એક્ટ 2003 અને ટેલિગ્રાફ એક્ટ 1885ની જોગવાઈઓ હેઠળ 'ઓછામાં ઓછું નુકસાન અને પૂરેપૂરું વળતર'ના સિદ્ધાંત મુજબ ઠરાવમાં સુધારા કરવામાં આવે. જ્યાં સુધી આ સુધારા નહીં થાય ત્યાં સુધી નવા ઠરાવનો અમલ ન કરવા અલ્ટીમેટમ આપવામાં આવ્યું છે.

હવામાન નિષ્ણાત અંબાલાલ પટેલે રાજ્ય માટે ચોમાસાની નવી આગાહી કરી છે. તેમના મતે, 15 જુલાઈ આસપાસ હવામાનમાં પલટો આવવાના સંકેત છે અને 20 જુલાઈ સુધી રાજ્યમાં હળવા વરસાદની શક્યતા છે. રથયાત્રાના દિવસે પણ છૂટાછવાયા વરસાદની સંભાવના છે. અંબાલાલ પટેલે જણાવ્યું કે, 22 જુલાઈથી ચોમાસું તેની અસર જમાવશે અને 30 જુલાઈ સુધી દક્ષિણ ગુજરાતમાં ભારે વરસાદ પડી શકે છે. કચ્છ, મધ્ય ગુજરાત, અમદાવાદ, વડોદરા અને પંચમહાલમાં પણ વરસાદની આગાહી કરવામાં આવી છે.

ભારતે 20 કિલોમીટરથી વધુ ઊંચાઈએ ઉડી શકે તેવા સ્વદેશી હાઇ ઑલ્ટિટ્યુડ એરશિપ બનાવવાની યોજના શરૂ કરી છે, જેનો ખર્ચ અંદાજે 15,000 કરોડ રૂપિયા થશે. આ પ્રોજેક્ટનો મુખ્ય હેતુ લાંબા સમય સુધી દેખરેખ, ગુપ્ત માહિતી એકત્રિત કરવા અને સંદેશાવ્યવહારને મજબૂત બનાવવાનો છે. તેને 'એરશિપ-બેઝ્ડ હાઇ ઑલ્ટિટ્યુડ સ્યુડો સેટેલાઇટ' (AS-HAPS) નામ અપાયું છે, જે રડાર, હાઇ-રિઝોલ્યૂશન કેમેરા અને ઈલેક્ટ્રોનિક ઈન્ટેલિજન્સ સિસ્ટમ જેવા આધુનિક સેન્સરથી સજ્જ હશે. આ ટેક્નોલોજી ચીન જેવા દેશોની સરહદી ગતિવિધિઓ પર નજર રાખવામાં અત્યંત મદદરૂપ થશે.

ચારા કૌભાંડ કેસમાં બિહારના પૂર્વ મુખ્યમંત્રી લાલુ યાદવને સુપ્રીમ કોર્ટમાંથી મોટી રાહત મળી છે. કોર્ટે એન્ફોર્સમેન્ટ ડિરેક્ટોરેટ (ED) દ્વારા તેમની જામીન રદ કરવાની અરજી ફગાવી દીધી છે, જેના પગલે તેમના જામીન યથાવત્ રહેશે. 2018માં દોષિત ઠેરવાયા બાદ હાઇકોર્ટમાં પેન્ડિંગ અપીલને કારણે 2021માં તેમને જામીન મળ્યા હતા. ED ની માંગણી ફગાવી સુપ્રીમ કોર્ટે જણાવ્યું કે લાંબા સમયથી ચાલી રહેલા જામીન મામલે હવે દખલગીરી યોગ્ય નથી. આ સાથે, હાઇકોર્ટને 6 મહિનામાં અપીલ પર સુનાવણી પૂર્ણ કરવાનો આદેશ આપ્યો છે.

વડોદરા નજીક કુંઢેલા સ્થિત સેન્ટ્રલ યુનિવર્સિટીમાં હેલ્થ સેન્ટર-સ્પોર્ટ્સની સુવિધા વધારવા અને હોસ્ટેલમાં સાફ-સફાઈની માગણી સાથે વિદ્યાર્થીઓ સોમવાર રાતથી ધરણા પર બેઠા હતા. આજે સવારે તેમણે યુનિવર્સિટીનો મુખ્ય ગેટ બંધ રાખતા બહારથી આવતા વિદ્યાર્થીઓ અને અધ્યાપકો અટવાયા હતા. પ્રોવોસ્ટ અને અધ્યાપકોની દરમિયાનગીરી વખતે ધક્કામુક્કી અને ઝપાઝપી થઈ હતી. એબીવીપીના જણાવ્યા મુજબ, આ ઘટનામાં બે વિદ્યાર્થીઓને ઈજા પણ થઈ હતી. વારંવાર રજૂઆત છતાં સમસ્યાઓનો ઉકેલ ન આવતા વિદ્યાર્થીઓએ ધરણાનું શસ્ત્ર ઉઠાવ્યું.

વડોદરા MS યુનિવર્સિટીની સાયન્સ ફેકલ્ટીમાં આજે ABVP અને NSUIના કાર્યકરો વચ્ચે છુટા અને મારામારી થતા દોડધામ મચી ગઈ હતી. વિધાર્થી આલમમાં ચાલતી ચર્ચા પ્રમાણે સાયન્સ ફેકલ્ટીમાં NSUI અને ABVPના બે જૂથ વચ્ચે પહેલેથી અદાવત છે. આજે એકબીજાની સામે જોવાની નજીવી બાબતમાં બે જૂથના નેતાઓ આમને સામને આવી ગયા હતા. જોતજોતામાં બંને જૂથ વચ્ચે મારામારી શરૂ થઈ જતા ફેકલ્ટીમાં દોડધામ મચી ગઈ હતી. અન્ય વિદ્યાર્થીઓએ તેમને છૂટા પાડ્યા હતા. જોકે રાબેતા મુજબ સિક્યુરિટી ગાયબ હતી.

ભારતીય ક્રિકેટ ટીમના કોચિંગ સ્ટાફમાં આગામી સમયમાં કેટલાક મહત્વના ફેરફારો જોવા મળી શકે છે. આસિસ્ટન્ટ કોચ Ryan Ten Doeschate પારિવારિક કારણોસર ટીમનો સાથ છોડવા માંગે છે. તેમણે BCCIને આ અંગે જાણ કરી દીધી છે અને જો બધું બરાબર રહ્યું તો ઇંગ્લેન્ડ સિરીઝ બાદ તેઓ પદમુક્ત થઈને પરત ફરી શકે છે. Ryan Ten Doeschate લંડનમાં પોતાના પરિવાર સાથે સમય વિતાવવા માંગે છે. તેઓ છેલ્લા બે વર્ષથી ટીમ સાથે જોડાયેલા છે અને તેમણે ટીમની ફીલ્ડિંગ પર ઘણું કામ કર્યું છે. BCCI ટૂંક સમયમાં આ અંગે નિર્ણય લઈ શકે છે.

અમદાવાદમાં 16મી જુલાઈના રોજ યોજાનારી 149મી જગન્નાથજી રથયાત્રા માટે સુરક્ષાના અભેદ્ય કવચની તૈયારીઓ કરવામાં આવી રહી છે. આ વર્ષે, સુરક્ષાને વધુ મજબૂત બનાવવા માટે અત્યાધુનિક ટેકનોલોજીનો ઉપયોગ થશે. ભગવાન જગન્નાથજી, સુભદ્રાજી અને બલરામના રથ ખેંચનારા ખલાસીઓનું 'આધાર ઇનેબલ એપ' દ્વારા વેરિફિકેશન કરીને બારકોડવાળા ઓળખપત્ર આપવામાં આવશે. 35 ડ્રોન અને GPS સિસ્ટમ દ્વારા ત્રણેય રથોનું લાઈવ મોનિટરિંગ થશે. સાથે જ, પુશીંગ સ્ક્વોર્ડ દ્વારા રથની આસપાસ સુરક્ષા કોર્ડનિંગ કરાશે અને ઉચ્ચ અધિકારીઓની આગેવાનીમાં પોલીસ કાફલો સતત રથ સાથે રહેશે.

બોલિવૂડ અભિનેત્રી ઝીનત અમાન લદાખના પર્યાવરણ અને લોકોના અધિકારો માટે ભૂખ હડતાળ પર બેઠેલા સોનમ વાંગચુકના સમર્થનમાં આગળ આવી છે. '3 ઈડિયટ્સ' ફેમ ઓમી વૈદ્ય બાદ ઝીનત અમાને પણ સોનમ વાંગચુકની લડતને ટેકો આપ્યો છે. તેમણે કેન્દ્ર સરકારને મધ્યસ્થી કરવા અને વાતચીત શરૂ કરવા વિનંતી કરી છે. ઝીનત અમાનના જણાવ્યા મુજબ, સોનમ વાંગચુક દેશના ભવિષ્ય માટે લડી રહ્યા છે અને તેમનું સ્વાસ્થ્ય ચિંતાજનક રીતે બગડી રહ્યું છે. આ કોઈ રાજકીય લડાઈ નથી, પરંતુ કુદરતી સંસાધનો અને માનવીય અધિકારોની રક્ષાનો મામલો છે.

દિલ્હીના જંતર-મંતર ખાતે કેન્દ્રીય શિક્ષણ મંત્રીના રાજીનામાની માંગ સાથે ચાલી રહેલી ભૂખ હડતાલમાં સામાજિક કાર્યકર્તા સોનમ વાંગચુકનું 16 દિવસમાં 8 કિલો વજન ઘટતાં વિપક્ષી નેતાઓ ચિંતિત છે. આમ આદમી પાર્ટીના અરવિંદ કેજરીવાલે વાંગચુકને અનશન સમાપ્ત કરવાની અપીલ કરી છે અને પરીક્ષા પ્રણાલીમાં સુધારાની માંગને સમર્થન આપ્યું છે. સમાજવાદી પાર્ટીના અખિલેશ યાદવે પણ વાંગચુકને ઉપવાસ તોડવા વિનંતી કરી ભાજપ સરકારની સંવેદનહીનતા પર પ્રહારો કર્યા છે. વાંગચુકે આ મુદ્દાને દેશનો વિષય ગણાવી તમામ નેતાઓને સાથે આવવા આહ્વાન કર્યું છે.

સૌરાષ્ટ્ર અને કચ્છના લાખો પક્ષકારોને ઝડપી અને સસ્તો ન્યાય મળે તે માટે રાજકોટ ખાતે ગુજરાત હાઇકોર્ટની બેંચ સ્થાપવા વકીલોએ ફરી એકવાર આંદોલનનું રણશિંગુ ફુક્યું છે. આ મામલે આગામી 25મી તારીખે રાજકોટ ખાતે સૌરાષ્ટ્ર-કચ્છના તમામ બાર એસોસિએશનના પ્રતિનિધિઓની મહાબેઠકનું આયોજન કરાયું છે. જેમાં આગામી આંદોલનની વ્યૂહરચના નક્કી કરવામાં આવશે. રાજકોટ બાર એસોસિએશનના પ્રમુખ સુમિત વોરા અને સેક્રેટરી નિલેશ પટેલે જણાવ્યું કે, રાજકોટમાં હાઇકોર્ટ બેંચ કાર્યરત થાય તો કચ્છ, પોરબંદર જેવા અંતરિયાળ વિસ્તારોમાંથી આવતા પક્ષકારોનો સમય, શક્તિ અને નાણાંનો વ્યય થતો અટકશે.

રાજકોટ શહેર PCB ટીમે ગેરકાયદેસર હથિયારોના મોટા વેપારનો પર્દાફાશ કર્યો છે. મધ્યપ્રદેશના સપ્લાયર સકીલ મનસુરી સહિત પાંચ શખ્સોની ધરપકડ બાદ, ન્યારી ડેમ નજીક વેનીલા કેફેના માલિક સંદીપસિંહ પરમારની બે ગેરકાયદે પિસ્ટલ સાથે ધરપકડ કરવામાં આવી છે. સપ્લાયરે આ હથિયારો પ્રદીપ કરપડાને એક-એક લાખ રૂપિયામાં વેચ્યા હતા, જેણે બાદમાં સંદીપસિંહને રોફ જમાવવા માટે વેચ્યા હતા. આ ઘટના રથયાત્રા અને અષાઢી બીજ પહેલા કાયદો અને વ્યવસ્થા જાળવવાના પોલીસના પ્રયાસો હેઠળ બની છે.