મહેસાણાના પાંચોટ-આનંદપુરા વિસ્તારમાં મંગળવારે રાત્રે એક વેપારીને ત્રણ અજાણ્યા શખ્સો દ્વારા લૂંટનો ભોગ બન્યા હતા. દુકાન બંધ કરીને ઘરે જઈ રહેલા 58 વર્ષીય વેપારી કૌશિકકુમાર વીરચંદભાઈ પટેલને રેલવે ફાટક પાસે વાદળી એક્ટિવા પર આવેલા ત્રણ શખ્સોએ રોક્યા હતા. તેમાંથી બે શખ્સોએ વેપારીને ધોકા વડે માર માર્યો હતો, જેના કારણે તેમના જમણા હાથમાં ફ્રેક્ચર થયું હતું. ત્રીજા શખ્સે છરી બતાવી ગળામાંથી રૂ. 2 લાખનો દોઢ તોલાનો સોનાનો દોરો લૂંટી લીધો હતો. ઇજાગ્રસ્ત વેપારીને મહેસાણા સિવિલ હોસ્પિટલમાં દાખલ કરાયા હતા અને તેમણે મહેસાણા તાલુકા પોલીસ સ્ટેશનમાં ફરિયાદ નોંધાવી છે. પોલીસ બંદોબસ્તમાં વ્યસ્ત હોવાથી સ્થળ તપાસ બાદ આગળની કાર્યવાહી કરશે.