સામાન્ય જનતા મોંઘવારીનો માર સહન કરી રહી છે, ત્યારે દેશની સરકારી પેટ્રોલિયમ કંપનીઓ IOC, BPCL અને HPCL એ માર્ચ ક્વાર્ટરમાં રૂ. 26,000 કરોડનો ધૂમ નફો કર્યો છે. 2025-26 નાણાકીય વર્ષમાં નફાના તમામ જૂના રેકોર્ડ તોડી નાખ્યા છે. ઇન્ડિયન ઓઇલ (IOCL)ને માર્ચ ક્વાર્ટર 2026માં રૂ. 14,667 કરોડ નફો થયો છે. તો ભારત પેટ્રોલિયમ (BPCL)નો માર્ચ ક્વાર્ટર 2026નો નફો રૂ. 6,442 કરોડ છે. એવી જ રીતે, હિંદુસ્તાન પેટ્રોલિયમ (HPCL) કંપનીનો માર્ચ ક્વાર્ટર 2026નો નફો રૂ. 4,902 કરોડે પહોંચી ગયો છે. કંપનીઓ ખોટનો દાવો કરે છે, જ્યારે પ્રજાનું ખિસ્સું ખાલી થઈ રહ્યું છે.

ગુજરાત વિધાનસભામાં અધ્યક્ષ દ્વારા 18 સમિતિઓની જાહેરાત કરાઈ છે. જેમાં કોંગ્રેસમાંથી ભાજપમાં આવેલા સી.જે. ચાવડા, હાર્દિક પટેલ અને અલ્પેશ ઠાકોર સહિત અનેક નેતાઓને પ્રમુખ અને સભ્ય તરીકે મહત્વની જવાબદારીઓ સોંપાઈ છે. નાણાકીય અને બિન-નાણાકીય સમિતિઓ સરકારના ખર્ચ, વહીવટ અને કાયદાકીય કામકાજ પર દેખરેખ રાખશે.

ઈરાન અને અમેરિકા વચ્ચેના યુદ્ધથી વૈશ્વિક ઓઇલ બજારમાં ભારે અસ્થિરતા સર્જાઈ છે. ઇંધણ સંકટ વચ્ચે બ્રિટને પોતાના રશિયા વિરોધી પ્રતિબંધોમાં રાહત આપતા ભારત અને તુર્કીયેની રિફાઇનરીઓમાં રશિયન ક્રૂડથી બનેલા ડીઝલ અને જેટ ઇંધણની આયાતને મંજૂરી આપી છે. બ્લૂમબર્ગના અહેવાલ મુજબ બ્રિટન દ્વારા જાહેર કરાયેલું નવું જનરલ લાઇસન્સ 20 મેથી અમલમાં આવ્યું છે. આ નિર્ણય વૈશ્વિક ઇંધણ સંકટ અને બદલાતા આર્થિક સમીકરણો વચ્ચે મહત્વપૂર્ણ માનવામાં આવી રહ્યો છે.

બ્યુરો ઓફ ઈન્ડિયન સ્ટાન્ડર્ડ (BIS)એ પેટ્રોલમાં ઈથેનોલ મિશ્રણ અંગે નવા નિયમો જાહેર કર્યા છે. હવે પેટ્રોલમાં ઈથેનોલનું મિશ્રણ 20% થી વધારીને 30% સુધી કરવાની મંજૂરી આપવામાં આવી છે. કેન્દ્ર સરકારે 15 મે 2026ના રોજ આ નિર્ણયને મંજૂરી આપી હતી. નવા ધોરણો મુજબ 22, 25, 27 અને 30 ટકા મિશ્રણ માટે ગુણવત્તા માપદંડ નક્કી કરાયા છે. આ પગલાથી ક્રૂડ ઓઈલ પરની આયાત નિર્ભરતા અને પ્રદૂષણ ઘટાડવામાં મદદ મળશે, સાથે સ્થાનિક ખાંડ અને બાયોફ્યુઅલ ઉદ્યોગને પણ મોટો ફાયદો થશે.

ભારતમાં 'કોકરોચ જનતા પાર્ટી' (Cockroach Janata Party- CJP) નામનો નવો રાજકીય ટ્રેન્ડ ઉભરી આવ્યો છે. બેરોજગાર યુવાનો, ડિજિટલ મીમ્સ અને સંસ્થાકીય આક્રોશના મિશ્રણથી જન્મેલા આ પક્ષે માત્ર 72 કલાકમાં 1 લાખથી વધુ સભ્યોને જોડ્યા છે. ચીફ જસ્ટિસ સૂર્ય કાંતની ટિપ્પણી સામે વિરોધ રૂપે શરૂ થયેલ આ ચળવળ, તૃણમૂલ કોંગ્રેસના સાંસદો સહિત અનેક સેલિબ્રિટીઝને પણ આકર્ષી રહી છે. CJPનું સ્લોગન 'ધર્મનિરપેક્ષ, સમાજવાદી, લોકશાહી અને આળસુ!' છે અને તેના 5 મુદ્દાના મેનિફેસ્ટોમાં અનેક ગંભીર મુદ્દાઓ આવરી લેવાયા છે.

ભારતે અમેરિકા-ઈરાન તણાવ વચ્ચે હોર્મુઝ જળમાર્ગ પરથી ફરી ક્રૂડ ઓઈલ અને ગેસ સપ્લાય શરૂ કરવા મોટી તૈયારીઓ શરૂ કરી છે. સૂત્રો મુજબ, ભારતે આ સમગ્ર પ્લાનને અંતિમ રૂપ આપી દીધો અને જહાજો મોકલવાની પણ તૈયારીઓ શરૂ કરી દીધી છે. સરકારી કંપની શિપિંગ કોર્પોરેશન ઓફ ઈન્ડિયાએ પણ ખાડી ક્ષેત્રમાં ઓપરેશન શરૂ કરવાની તૈયારી કરી લીધી છે. પરંતુ આ માટે ભારતીય નૌકાદળ અને કેન્દ્ર સરકારની અંતિમ સુરક્ષા મંજૂરીની રાહ જોવાઈ રહી છે. ઈરાન યુદ્ધ બાદ હોર્મુઝ જળમાર્ગ અત્યંત સંવેદનશીલ બન્યો હોવા છતાં ભારત સપ્લાય ચેન ફરી સક્રિય કરવા પ્રયત્ન કરી રહ્યું છે.

રાહુલ ગાંધીએ ‘મેલોડી’ ટૉફી મામલે નરેન્દ્ર મોદી પર કટાક્ષ કરતા કહ્યું કે દેશ આર્થિક પડકારો સામે ઝઝૂમી રહ્યો છે, ત્યારે વડાપ્રધાન ઈટાલીમાં ટૉફી વહેંચી રહ્યા છે. રાહુલે ખેડૂતો, યુવાનો, મહિલાઓ અને નાના વેપારીઓની મુશ્કેલીઓનો ઉલ્લેખ કરીને આને “નેતૃત્વ નહીં, નાટક” ગણાવ્યું. ઇટાલીની વડાપ્રધાન જ્યોર્જિયા મેલોનીને મોદી દ્વારા ‘મેલોડી’ ટૉફી ગિફ્ટ કરાયા બાદ સોશિયલ મીડિયા પર #Melodi ચર્ચામાં આવ્યું હતું. મેલોનીએ આ ગિફ્ટ માટે સોશિયલ મીડિયા પર વડાપ્રધાન મોદીનો આભાર માન્યો હતો.

ભારતીય રેલવેએ તાજેતરમાં ટ્રેનોમાં લાગેલી આગની ઘટનાઓ પાછળ અસામાજિક તત્વોનો હાથ હોવાનો દાવો કર્યો છે. રાજસ્થાનના અમરપુરા અને કોટા, બિહારના સાસારામ તથા પશ્ચિમ બંગાળના હાવડામાં બનેલી ઘટનાઓની તપાસમાં ચોંકાવનારા ખુલાસા થયા છે. અમરપુરામાં ટ્રેનની ચાદરોમાં ઇરાદાપૂર્વક આગ લગાડવાનો પ્રયાસ થયો હતો, જ્યારે હાવડામાં બાથરૂમમાંથી પેટ્રોલથી ભીંજાયેલું કપડું મળ્યું હતું. કોટાની રાજધાની એક્સપ્રેસમાં બાથરૂમમાંથી આગ નીકળી હતી અને સાસારામમાં ખાલી કોચમાં સળગતી વસ્તુ ફેંકાતા આગ ભભૂકી ઉઠી હતી.

પશ્ચિમ બંગાળના પૂર્વ મુખ્યમંત્રી મમતા બેનરજીના અભિષેક બેનરજીની મિલકતો સામે કોલકાતા નગર નિગમ (KMC) દ્વારા મોટી કાર્યવાહી થવાના સંકેત મળ્યા છે. મીડિયા અહેવાલો મુજબ KMCએ તેમની 17 જેટલી મિલકતો અંગે ગેરકાયદે બાંધકામ મામલે નોટિસ પાઠવી છે અને નકશા, લિફ્ટ તથા એસ્કેલેટર સંબંધિત દસ્તાવેજો માંગ્યા છે. પશ્ચિમ બંગાળના મુખ્યમંત્રી શુભેન્દુ અધિકારીએ પણ TMC નેતાઓની મિલકતોની વિગતો એકત્ર કરવાની સૂચના આપી હોવાનું કહેવાય છે. અભિષેક બેનરજી પાસે આ નોટિસને કાનૂની રીતે પડકારવાનો વિકલ્પ ઉપલબ્ધ છે.

નોર્વેની પત્રકાર હેલી લિંગે PM મોદીને પૂછેલા પ્રશ્નો બાદ દાવો કર્યો છે કે તેના Facebook અને Instagram એકાઉન્ટ સસ્પેન્ડ કરી દેવાયા છે. ઓસ્લોમાં ભારતીય અધિકારી સિબી જ્યોર્જ સાથેની દલીલ બાદ મેટા કંપનીએ આ પગલું ભર્યું હોવાનું કહેવાય છે. આ ઘટના પ્રેસની આઝાદી પર પ્રશ્નો ઊભા કરે છે. આ વિવાદ બાદ હેલીના X એકાઉન્ટ પર ફોલોઅર્સની સંખ્યામાં મોટો વધારો થયો છે.

જામનગર જિલ્લામાં ગેરકાયદેસર ખનન સામે ચાલતી ઝુંબેશ હેઠળ લાલપુર તાલુકાના બાબરીયા ગામે મોટી કાર્યવાહી કરવામાં આવી છે. Special Operations Groupએ દરોડો પાડી મંજૂર લીઝ વિસ્તાર બહાર ગેરકાયદેસર પથ્થર ખનન કરતા ઈસમ સામે કાર્યવાહી કરી છે. સ્થળ પરથી પથ્થર કાઢવાના 3 મશીનો જપ્ત કરાયા છે અને આશરે ₹8 લાખનો દંડ વસૂલવાની પ્રક્રિયા શરૂ થઈ છે. બાતમીના આધારે SOGએ ખાણ-ખનીજ વિભાગ અને લાલપુર પોલીસ સાથે સંયુક્ત કાર્યવાહી હાથ ધરી હતી.

GCAS પોર્ટલમાં વ્યાપક ખામીઓના વિરોધમાં ABVP દ્વારા KCG ખાતે ઉગ્ર દેખાવો કરાયા. સંતોષકારક ઉત્તર ન મળતા GCASની ઓફિસનો દરવાજો તોડી નાખ્યો. પોલીસે અટકાવતા બહાર ધરણા પર બેસી રામધૂન બોલાવી. GCAS પોર્ટલમાં સતત ટેકનિકલ મુશ્કેલીઓ અને વિદ્યાર્થીઓની સમસ્યાઓના નિવારણના અભાવે આક્રમક વલણ અપનાવાયું. ગુજરાત યુનિવર્સિટી કેમ્પસથી રેલી કાઢી GCAS ઓફિસ પહોંચતા ઘર્ષણ થયું. અધિકારીઓના નકારાત્મક વલણથી આક્રોશિત કાર્યકર્તાઓએ એન્ટ્રી ગેટ તોડી નાખ્યો.

અફઘાનિસ્તાન સામેની ટેસ્ટ અને ODI સિરીઝમાં મોહમ્મદ શમીની પસંદગી ન થતાં વિવાદ સર્જાયો છે. Chief Selector અજીત અગરકરે જણાવ્યું કે, મેડિકલ રિપોર્ટ મુજબ શમી માત્ર T20 ક્રિકેટ માટે ફિટ છે. સ્થાનિક ક્રિકેટમાં શાનદાર પ્રદર્શન છતાં તેની અવગણનાથી ફેન્સ નારાજ છે. શમી લાંબા સમયથી ફિટનેસ સમસ્યાઓથી પીડાઈ રહ્યો છે.

અમદાવાદના નારણપુરા વિસ્તારમાં ધોળા દિવસે એક જ્વેલર્સની દુકાનમાં ગ્રાહક બનીને આવેલા શખ્સે વેપારીની નજર ચૂકવીને રૂ. 1.50 લાખની કિંમતના સોનાના કડાની ચોરી કરી હોવાની ઘટના સામે આવી છે. જોકે, ચોરી કર્યા બાદ તે સીધો રાજકોટ ભાગી ગયો હતો. જ્યાં રાજકોટ ક્રાઈમ બ્રાન્ચે તેને દબોચી લીધો છે. ઘાટલોડિયામાં રહેતા અને નારણપુરા ટેલિફોન એક્સચેન્જ પાસે જ્વેલર્સની દુકાન ચલાવતા 48 વર્ષીય કેતનકુમાર રમણલાલ પટેલે આ અંગે ઘાટલોડિયા પોલીસ સ્ટેશનમાં ફરિયાદ નોંધાવી છે. ચોરની મોડસ ઓપરેન્ડી એકદમ ફિલ્મી હતી. 7 અને 8 મેએ આ અજાણ્યો શખ્સ સોનાની વીંટી અને ચેઇન ખરીદવાના બહાને દુકાને આવ્યો હતો.

બનાસકાંઠા જિલ્લામાં દિયોદર તાલુકા પંચાયત પ્રમુખ અને ઉપપ્રમુખ પદની ચૂંટણી પહેલાં રાજકીય ગરમાવો વધી ગયો છે. પક્ષપલટાની આશંકાને ધ્યાનમાં રાખીને કોંગ્રેસે પોતાના વિજેતા સભ્યોને સુરક્ષિત રાખવા માટે ‘રિસોર્ટ પોલિટિક્સ’નો સહારો લીધો છે. આગામી 25 તારીખે યોજાનારી ચૂંટણી પહેલાં કોંગ્રેસે સત્તા અકબંધ રાખવાના પ્રયાસરૂપે તમામ સભ્યોને અજ્ઞાત સ્થળે ખસેડી દીધા છે, જેથી કોઈ સભ્ય પક્ષ બદલી ન શકે અથવા વિરોધી પક્ષના સંપર્કમાં ન આવે. તાજેતરમાં યોજાયેલી ચૂંટણીમાં દિયોદર તાલુકા પંચાયતની કુલ 22 બેઠકોમાંથી કોંગ્રેસે 12 બેઠકો મેળવીને સ્પષ્ટ બહુમતી સાથે મેદાન માર્યું છે, જ્યારે BJPના ફાળે 10 બેઠકો આવી છે.

અમદાવાદમાં ડેટિંગ એપના માધ્યમથી પોતાને ક્રાઇમ બ્રાન્ચનો સાયબર સિક્યોરિટી ઓફિસર ઓળખાવી, એક યુવતીને લગ્નની જાળમાં ફસાવીને હજારો રૂપિયા પડાવી લીધાની ચોંકાવનારી ઘટના સામે આવી છે. આરોપીએ યુવતીનો વિશ્વાસ જીત્યો હતો. પરંતુ વધુ પડતી લાલચના કારણે તેનો ભાંડો ફૂટી ગયો છે. નવરંગપુરા પોલીસે આ મામલે ગુનો નોંધી નકલી PSIની ધરપકડ કરવા ચક્રો ગતિમાન કર્યા છે.

વડોદરામાં પતિ અને સાસરિયાના ત્રાસથી કંટાળીને એક મહિલાએ ઘરેલુ હિંસા (ડોમેસ્ટિક વાયોલન્સ)ની ફરિયાદ દાખલ કરી હતી. જો કે, આ કેસની સુનાવણી ચાલી રહી હતી, ત્યારે જ તેના પતિનું મૃત્યુ થયું હતું. આ સ્થિતિમાં કોર્ટે મહિલાની સુરક્ષા માટે પ્રોટેક્શન ઓર્ડર જાહેર કર્યો છે, પરંતુ ભરણપોષણની માંગણી પર ચુકાદો આપતા સ્પષ્ટ નોંધ્યું છે કે પતિના અવસાન બાદ સાસુ, સસરા કે જેઠ ભરણપોષણ ચૂકવવા માટે કાયદાકીય રીતે જવાબદાર નથી.

બનારસ હિન્દુ યુનિવર્સિટી (BHU) માં MA History ના પ્રશ્નપત્રમાં 'બ્રાહ્મણવાદી પિતૃસત્તાએ મહિલાઓની પ્રગતિને કેવી રીતે અવરોધી?' સવાલ પૂછાયો. આનાથી પ્રોફેસરો અને વિદ્યાર્થીઓ વચ્ચે ભારે હોબાળો મચી ગયો છે. પ્રોફેસરોએ તેને પૂર્વગ્રહયુક્ત અને વામપંથી વિચારધારાનો પ્રભાવ ગણાવ્યો. શંકરાચાર્ય અવિમુક્તેશ્વરાનંદે પણ આ અંગે સરકાર પર હિન્દુઓમાં ભાગલા પાડવાનો આરોપ લગાવ્યો. કાશી વિદ્વાન પરિષદે પણ પ્રશ્નના આધાર પર સવાલ ઉઠાવ્યો, જ્યારે કુલપતિએ ટૂંકમાં જવાબ આપ્યો.

TMCની પશ્ચિમ બંગાળ વિધાનસભા ચૂંટણીમાં કારમી હાર બાદ મમતા બેનર્જીએ ભાજપ સરકાર પર આકરા પ્રહારો કર્યા છે. ચૂંટણી પછીની કથિત હિંસા વિરુદ્ધ મમતા બેનર્જી વકીલના ડ્રેસમાં કોર્ટ પહોંચ્યા હતા. 2026ની ચૂંટણીમાં ભાજપે 207 બેઠકો જીતતા TMC માત્ર 80 બેઠકો સુધી સીમિત રહી હતી. કાલીઘાટ ખાતે ધારાસભ્યોને સંબોધતા મમતાએ દાવો કર્યો કે ભવિષ્યમાં ભાજપને કેન્દ્રની સત્તાથી પણ હટાવવામાં આવશે. તેમણે કહ્યું કે બંગાળમાં TMCનું શાસન ભલે સમાપ્ત થયું હોય, પરંતુ ભાજપ સામેની લડાઈ ચાલુ રહેશે.

ભાવનગરના પ્રજાવત્સલ રાજવી મહારાજા શ્રી કૃષ્ણકુમારસિંહજીની જન્મજયંતિ નિમિત્તે યુવરાજ જયવીરરાજસિંહે શ્રદ્ધાંજલિ અર્પી, 'મારી પ્રજાનું કલ્યાણ થાજો' સૂત્ર યાદ કર્યું. અખંડ ભારત માટે રજવાડું દાન કરનાર પ્રથમ શાસક મહારાજા સાહેબના સંસ્કારો અને ભાવનગરમાં એકતા જાળવવાની પ્રેરણા આપી. આર્થિક-સામાજિક વિકાસ માટે એકતા જરૂરી ગણાવી, સરદાર પટેલ જેવા મહાપુરુષોને પણ યાદ કર્યા.

દિલ્હી, યુપી, પંજાબ, હરિયાણા, રાજસ્થાન, મધ્ય પ્રદેશ અને મહારાષ્ટ્રના 22 શહેરોમાં તાપમાન 45°C થી ઉપર. યુપીનું બાંદા દેશમાં સૌથી ગરમ રહ્યું. વેસ્ટર્ન ડિસ્ટર્બન્સ નબળું હોવાથી આગામી એક અઠવાડિયું સૂકું રહેશે. મધ્ય ભારતમાં ચક્રવાતને કારણે હીટવેવ ચાલુ રહેશે. શહેરીકરણને કારણે ફીલ ફેક્ટર વધી રહ્યું છે.

એક પ્રીમિયમ બેટ બનવાની સફર એક નાના છોડથી શરૂ થાય છે અને ખેલાડીના હાથ સુધી પહોંચવામાં 20 વર્ષ લે છે. કોહલી જે બેટથી રનનો વરસાદ કરે છે તેને સંપૂર્ણ રીતે તૈયાર થવામાં કેટલાય વર્ષોની સખત મહેનત અને પ્રક્રિયા લાગે છે. આ પ્રક્રિયામાં યોગ્ય હવામાન, ખાસ પ્રકારના વૃક્ષો અને કુશળ કારીગરોની વર્ષોની મહેનત શામેલ હોય છે. વિશ્વના મોટાભાગના પ્રીમિયમ ક્રિકેટ બેટ બનાવવા માટે ઇંગ્લેન્ડમાં ઉગતા ખાસ 'અંગ્રેજી વિલો' વૃક્ષોનો ઉપયોગ થાય છે. આ વૃક્ષોનું લાકડું વજનમાં ખૂબ જ હલકું અને અંદરથી અત્યંત મજબૂત હોય છે. ઇંગ્લેન્ડની ચોક્કસ માટીના કારણે જ ત્યાંના લાકડામાં એક ખાસ પ્રકારની પ્રીમિયમ ગુણવત્તા જોવા મળે છે.

ભોપાલમાં ટ્વિશા શર્માના મોત મામલે પરિવારએ આત્મહત્યાની થિયરી પર ગંભીર સવાલો ઉઠાવ્યા છે. પરિવારનો દાવો છે કે જો ટ્વિશાએ આત્મહત્યા કરી હોય તો તેના શરીર પર ઇજાના અનેક નિશાન કેમ મળ્યા? તેમણે સાસરિયાઓ પર દહેજ માટે માનસિક અને શારીરિક સતામણીનો આરોપ લગાવ્યો છે. પરિવારએ રાષ્ટ્રપતિને નિષ્પક્ષ તપાસ માટે અપીલ કરી છે, જ્યારે એક વકીલે CJI અને મધ્ય પ્રદેશ હાઈકોર્ટને પણ પત્ર લખ્યો છે. ભોપાલ કોર્ટે પતિ સમર્થ સિંહની આગોતરી જામીન અરજી ફગાવી છે અને પોલીસ તેની શોધમાં કાર્યવાહી કરી રહી છે.

Indian Oil Corporationએ જણાવ્યું છે કે અમેરિકા-ઈરાન તણાવ છતાં દેશમાં ક્રૂડ ઓઇલની અછત નહીં સર્જાય, કારણ કે કંપની પાસે એક મહિનાથી વધુનો સ્ટોક ઉપલબ્ધ છે. હોર્મુઝ રૂટ અવરોધિત થતાં LPG સપ્લાયમાં થોડો પ્રભાવ પડ્યો છે, પરંતુ ઇન્ડોનેશિયા, નાઇજીરીયા, અંગોલા અને ઓમાનમાંથી તાત્કાલિક ખરીદી શરૂ કરીને પુરવઠો જાળવવામાં આવી રહ્યો છે. કંપનીનો Q4FY26માં નફો 81% વધીને ₹15,176 કરોડ થયો છે. શેરધારકો માટે ₹1.25 પ્રતિ શેર ડિવિડન્ડની ભલામણ કરવામાં આવી છે. IOC આગામી વર્ષે રિફાઇનરી વિસ્તરણ માટે ₹32,700 કરોડનું રોકાણ કરશે.

અમદાવાદ મ્યુનિસિપલ કોર્પોરેશન (AMC) એ વિકાસ અને ઇજનેરી કામોમાં પારદર્શિતા લાવવા નવો નિયમ લાગુ કર્યો છે. બિલિંગ અને માપણી પ્રક્રિયાને સચોટ બનાવવા, પ્રોજેક્ટ મેનેજમેન્ટ કન્સલ્ટન્ટ (PMC) અને કોન્ટ્રાક્ટર સંયુક્ત માપણી કરશે. સિમેન્ટ, સ્ટીલ સહિતના જથ્થાની ઝીણવટભરી તપાસ થશે. સ્માર્ટ સિટી 311 એપ પર કામના ફોટા અપલોડ કરવા ફરજિયાત છે, જેના વિના બિલ પાસ થશે નહીં. આ પગલાંથી સરકારી નાણાંનો દુરુપયોગ અટકશે અને વિકાસ કાર્યોની ગુણવત્તામાં સુધારો થશે.

વેરાવળ બંદર નજીક ઠંડા પીણાં અને પ્રોવિઝન સ્ટોરમાં ભીષણ આગ લાગતા લાખોનું નુકસાન થયું. પેટ્રોલ પંપ પાસે હોવા છતાં, ફાયર વિભાગની સમયસર કામગીરીથી મોટી દુર્ઘટના ટળી. શોર્ટ સર્કિટથી આગ લાગી હોવાનું પ્રાથમિક અનુમાન છે.

DRDO એ ULPGM-V3 નામની ડ્રોન-આધારિત મિસાઈલનું સફળ પરીક્ષણ કર્યું છે, જે હવાઈ અને જમીની લક્ષ્યો, જેમ કે ટેન્ક, હેલિકોપ્ટર અને અન્ય ડ્રોનને નિશાન બનાવી શકે છે. આત્મનિર્ભરતાની દિશામાં આ એક મહત્વપૂર્ણ પગલું છે.

HNGUએ 20 કોલેજોનું જોડાણ રદ કર્યું, સરકારની સૈદ્ધાંતિક મંજૂરી અને LICના નેગેટિવ અહેવાલોને પગલે કડક કાર્યવાહી. હવે નવા વિદ્યાર્થીઓ ફાળવાશે નહીં. MSC IT અને SOPને મંજૂરી, ઇન્ચાર્જ પ્રિન્સિપાલ અને NET/SLET/PhD લાયકાત ધરાવતા સ્ટાફની ભરતી અંગે પણ નિર્ણય લેવાયા.

PM મોદી યુરોપીય પ્રવાસના અંતિમ ચરણમાં ઇટાલી પહોંચ્યા, જ્યાં તેમનું ભવ્ય સ્વાગત થયું. ઇટાલીના PM જૉર્જિયા મેલોનીના આમંત્રણ પર આ યાત્રા બંને દેશોના વ્યૂહાત્મક સંબંધો માટે ખાસ છે. Rome પહોંચતા PM મેલોનીએ PM મોદી સાથે શાનદાર સેલ્ફી શેર કરી, જેના કેપ્શનમાં લખ્યું, 'રોમમાં તમારું સ્વાગત છે, મારા મિત્ર!' આ તસવીર તરત જ વાઇરલ થઈ ગઈ.

રાજકોટના મંત્ર હરખાણી, ડાઉન સિન્ડ્રોમ (Down Syndrome) હોવા છતાં ગુજરાતનો પ્રથમ મનોદિવ્યાંગ ગ્રેજ્યુએટ બન્યો છે. તેણે પેરા ઓલિમ્પિકમાં સ્વિમિંગમાં 2 ગોલ્ડ મેડલ જીત્યા છે અને PM મોદીના હસ્તે 'રાષ્ટ્રીય બાળ પુરસ્કાર' મેળવ્યો છે. તેની માતાના અતૂટ વિશ્વાસ અને મંત્રની મહેનતથી તેણે શૈક્ષણિક અને રમતગમતના ક્ષેત્રમાં સિદ્ધિઓ મેળવી છે.