ભારતીય ક્રિકેટ ટીમમાં 'સુપરસ્ટાર કલ્ચર' ખતમ કરવાને લઈને ચાલી રહેલી લાંબી ચર્ચા વચ્ચે પૂર્વ હેડ કોચ રાહુલ દ્રવિડે મોટું નિવેદન આપ્યું છે. દ્રવિડે સ્પષ્ટ શબ્દોમાં કહ્યું છે કે, દરેક રમતને આગળ વધારવા માટે પોતાના હીરો અને સુપરસ્ટાર્સની જરૂર હોય છે, કારણ કે કોઈ પણ ખેલાડી મેદાન પર સતત શાનદાર પ્રદર્શન કર્યા વગર સુપરસ્ટાર બની શકતો નથી. રાહુલ દ્રવિડનું આ નિવેદન એવા સમયે આવ્યું છે જ્યારે વર્તમાન હેડ કોચ ગૌતમ ગંભીર સતત એ વાત પર જોર આપી રહ્યા છે કે ભારતીય ક્રિકેટમાં વ્યક્તિગત રેકોર્ડ કે સુપરસ્ટાર કલ્ચર કરતાં ટીમની જીત અને સફળતાને વધુ મહત્વ મળવું જોઈએ.