દક્ષિણ એશિયાના ભૂરાજકારણમાં ગંગા નદીના પાણીનો મુદ્દો ફરી ચર્ચામાં આવ્યો છે. બાંગ્લાદેશમાં સત્તા પર આવેલી બાંગ્લાદેશ નેશનાલિસ્ટ પાર્ટીએ સ્પષ્ટ કર્યું છે કે ભારત સાથેના ભવિષ્યના સંબંધો હવે ગંગા નદીના પાણીની વહેંચણી પર નિર્ભર રહેશે. બાંગ્લાદેશ માટે આ મુદ્દો માત્ર નદીનો વિવાદ નહીં પરંતુ 17 કરોડ લોકોમાંથી મોટી વસ્તીની આજીવિકા અને પર્યાવરણ સાથે જોડાયેલો છે. 1996માં થયેલી 30 વર્ષની ગંગા જળ સંધિ હવે અંતિમ તબક્કામાં હોવાથી બાંગ્લાદેશના આ આક્રમક વલણે ભારત-બાંગ્લાદેશ સંબંધોમાં નવી ચિંતાઓ ઊભી કરી છે.

પશ્ચિમ બંગાળમાં સત્તા પરિવર્તન બાદ શુભેન્દુ અધિકારીના નેતૃત્વ હેઠળની નવી ભાજપ સરકારે રાજ્યની સરકારી ઓળખમાં મોટા ફેરફારો શરૂ કર્યા છે. તૃણમૂલ કોંગ્રેસ અને મમતા બેનરજી સરકારની ઓળખ ગણાતા ‘બિસ્વ બાંગ્લા’ લોગોને તબક્કાવાર દૂર કરી તેના સ્થાને રાષ્ટ્રીય પ્રતીક ‘અશોક સ્તંભ’ અપનાવવામાં આવી રહ્યો છે. કોલકાતાના સોલ્ટ લેક સ્ટેડિયમ સહિત અનેક સરકારી પ્લેટફોર્મ પર આ બદલાવ જોવા મળ્યો છે. ‘એગીયે બાંગ્લા’ પોર્ટલની ડિઝાઇન અને રંગ થીમ પણ બદલાઈ ગઈ છે અને વિવિધ વિભાગોના ડિજિટલ ચિહ્નોને ફરીથી ડિઝાઇન કરવામાં આવ્યા છે.

ભારત અને પાકિસ્તાન વચ્ચે સિંધુ જળ સંધિને લઈને તણાવ વધુ વકરી ગયો છે. 15 મેના રોજ એક કથિત મધ્યસ્થતા અદાલતે જળ ગ્રહણ ક્ષેત્ર અંગે આપેલા ચુકાદાને ભારતે સંપૂર્ણપણે ફગાવી દીધો છે. વિદેશ મંત્રાલયના પ્રવક્તા રણધીર જયસ્વાલેજણાવ્યું કે આ ગેરકાયદેસર રીતે રચાયેલી અદાલતના કોઈપણ નિર્ણયને ભારત માન્યતા આપતું નથી. ભારતે પહેલેથી જ સિંધુ જળ સંધિને સ્થગિત કરી છે અને સ્પષ્ટ કર્યું છે કે પાકિસ્તાન આતંકવાદને સમર્થન આપવાનું બંધ નહીં કરે ત્યાં સુધી સંધિ ફરી અમલમાં આવશે નહીં.

નેધરલેન્ડ યાત્રાએ પીએમ મોદીની હાજરીમાં 1000 વર્ષ જૂના ચોલ તામ્ર પટ્ટીકાઓ ભારત લાવવા કરાર થયો. ટાટા ઇલેક્ટ્રોનિક્સ અને ડચ ચિપ કંપની ASML વચ્ચે સેમિકન્ડક્ટર ક્ષેત્રે પણ સમજૂતી થઈ. મોદીએ નેધરલેન્ડના રાજા-રાણીને મળ્યા, રોકાણ માટે ભારતમાં અત્યારે શ્રેષ્ઠ સમય ગણાવ્યો.

ત્રિવેન્દ્રમ-દિલ્હી રાજધાની એક્સપ્રેસ (12431) ના AC કોચ B-1 માં આગ લાગતાં 68 મુસાફરોને 15 મિનિટમાં સુરક્ષિત બહાર કાઢવામાં આવ્યા. મધ્યપ્રદેશના લૂણીરીછા-વિક્રમગઢ આલોટ સ્ટેશન વચ્ચે આ ઘટના બની. કોઈ જાનહાનિ થઈ નથી. આગ લાગવાના કારણોની તપાસ ચાલુ છે. Delhi-Mumbai રેલ ટ્રેક પર ટ્રાફિક રોકવામાં આવ્યો છે.

IIT-NIT પ્રવેશ માટે JEE એડવાન્સ પરીક્ષા બે સેશનમાં યોજાઈ. NEET પેપર લીક વિવાદ વચ્ચે વિદ્યાર્થીઓ આત્મવિશ્વાસ સાથે પરીક્ષા આપી રહ્યા છે, જોકે દૂરના પરીક્ષા કેન્દ્રો ફાળવાતા વાલીઓમાં નારાજગી જોવા મળી રહી છે. દેશભરમાંથી અંદાજે 2.50 લાખ વિદ્યાર્થીઓ પરીક્ષા આપી રહ્યા છે.

પેટ્રોલ, ડીઝલ અને CNGના ભાવ વધારાને કારણે અમદાવાદ સહિત ગુજરાતના મુખ્ય શહેરોમાં કેબ સર્વિસ મોંઘી થશે. Ola, Uber, Rapido જેવા ઓપરેટરો માટે ખર્ચાળ બન્યું છે, જેના કારણે મુસાફરો પર ભાડાનો બોજ વધશે. ડ્રાઇવરોની આવક પર અસર થઈ રહી છે. CNGનો ભાવ 86.02 પ્રતિ કિલો થયો છે, જેના વિરોધમાં રિક્ષા ચાલકોએ આવેદનપત્ર આપવાનો નિર્ણય કર્યો છે.

મુંબઈ ઝવેરીબજારમાં આજે શનિવારના કારણે બુલીયન બજાર સત્તાવાર બંધ રહી હતી. જોકે બંધ બજારે સોના- ચાંદીના ભાવ વધુ તૂટયા હતા. વિશ્વબજારમાં ભાવ વધુ નીચા ઉતરતાં ઘરઆંગણે ઈમ્પોર્ટ કોસ્ટ ઘટી હોવાનું બજારના સૂત્રો જણાવી રહ્યા હતા. દરમિયાન, મુંબઈ કરન્સી બજારમાં બંધ બજારે રૂપિયા સામે ડોલરના ભાવ જે શુક્રવારે ઉંચામાં રૂ.૯૬.૧૫ થઈ રૂ.૯૫.૯૬ બંધ રહ્યા હતા તે ભાવ શનિવારે ઘટી રૂ.૯૫.૮૩ આસપાસ બોલાઈ રહ્યા હતા.

ભારતીય રિઝર્વ બેંક (RBI) એ નાની NBFCs માટે નોંધણીમાંથી મુક્તિ આપી છે. આનાથી ઇક્વિટી બજારોમાં તેમની ભાગીદારી વધશે, મૂડી બજાર મજબૂત બનશે. અનેક સંસ્થાઓ NBFC વર્ગીકરણના ડરથી ઇક્વિટી બજારોમાં આવવાનું ટાળતી હતી, હવે તેઓ વધુ સક્રિય થઈ શકે છે.

પેટ્રોલ તથા ડીઝલના ભાવમાં કરાયેલા વધારાથી દેશની તેલ રિફાઈનરીઓને થયેલી રાહત ડોલર સામે રૂપિયામાં હવે પછીની કોઈપણ નબળાઈથી ધોવાઈ જશે એમ એસબીઆઈ ઈકોરેપના એક અહેવાલમાં જણાવાયું હતું. પેટ્રોલ-ડીઝલના ભાવમાં પ્રતિ લિટર રૂપિયા ૩નો વધારો કરાતા ઓઈલ માર્કેટિંગ કંપનીઓને તેમની અન્ડર રિકવરીમાં રૂપિયા ૫૩૦૦૦ કરોડ જેટલી રાહત થશે. વર્તમાન નાણાં વર્ષમાં તેલ રિફાઈનરીઓને થનારી અપેક્ષિત ખોટના આ રકમ પંદર ટકા જેટલી થવા જાય છે. 

હવે દેશભક્ત બનવું સહેલું થયું છે. સોશિયલ મીડિયામાં ‘ભારત માતા કી જય’ લખી દો કે તિરંગો મૂકી દો. અથવા તો સોનું-ચાંદી ખરીદીને નહીં, પણ ન ખરીદીને દેશહિતમાં ફાળો આપો. સરકારી ઓફિસમાં પૂછપરછ કરો, તો જવાબ મળશે: ‘કશું જ નહીં. ઘરે બેસી રહો.’ આ રીતે બેરોજગાર લોકો ખરેખર ઉત્તમ દેશભક્ત છે, કારણ કે તેઓ પેટ્રોલ નથી બાળતા, સોનું-ચાંદી નથી ખરીદતા કે ફોરેન ટૂર નથી કરતા. તેઓ પર્યાવરણની પણ સેવા કરે છે.

કેનેડા ગયેલા 20,000 ભારતીય વિદ્યાર્થીઓ 'નો શો' થયા છે, જે ચિંતાનો વિષય છે. આ વિદ્યાર્થીઓ ગાયબ નથી, પરંતુ તેમણે કોલેજમાં પ્રવેશ લીધો નથી અથવા હાજરી નથી ભરી. આના અનેક કારણો છે, જેમાં કડક સરકારી નિયમો, કોલેજો અને ફેક કન્સલ્ટન્ટ્સની ગોલમાલ, PR કે વર્ક પરમિટ મેળવવાનો પ્રયાસ, અને અમેરિકા જવાનું આયોજન શામેલ છે.

દિલ્હીના લાલ કિલ્લા પર થયેલા ભીષણ હુમલાને લઇને તપાસ કરી રહેલી એનઆઇએ દ્વારા 10 આરોપીઓની સામે 7500 પાનાની ચાર્જશીટ દાખલ કરવામાં આવી છે. જેમાં અનેક મોટા ખુલાસા થયા છે, એનઆઇએએ કોર્ટને જણાવ્યું છે કે પાકિસ્તાનમાં સક્રિય આતંકીઓ ટેક્નોલોજીનો ઉપયોગ કરીને ભારતમાં ગઝવા-એ-હિન્દનું મોટું કાવતરું ઘડી રહ્યા છે. આ બ્લાસ્ટમાં સામેલ તમામ આતંકીઓ શિક્ષિત છે. અંસાર ગઝવત ઉલ હિન્દ નામના આતંકી સંગઠન દ્વારા ટેક્નોલોજીનો ભરપુર ઉપયોગ થઇ રહ્યો છે.

દિલ્હી પોલીસની ઈઓડબલ્યુએ બનાવટી કંપનીઓ અને નકલી ઈનવોઈસના નેટવર્ક દ્વારા ચાલતા GST કૌભાંડનો પર્દાફાશ કર્યો છે. આ કૌભાંડમાં ૧૨૮ કરોડ રૂપિયાની છેતરપિંડી થઈ હતી, જેમાં છ લોકોને અટક કરવામાં આવ્યા છે. આરોપીઓએ માલ કે સેવા પૂરી પાડ્યા વિના બનાવટી કંપનીઓ ચલાવી, બોગસ GST ઈનવોઈસ બનાવ્યા અને ખોટી Input Tax Credit (ITC) મેળવી હતી.

મુંબઈ-હૈદરાબાદ બુલેટ ટ્રેન પ્રકલ્પની રૂપરેખા નક્કી, પુણે, બારામતી, પંઢરપુર, સોલાપુર, કલબુર્ગી અને વિકારાબાદ માર્ગે દોડશે. આનાથી પુણે માત્ર 48-50 મિનિટમાં, સોલાપુર દોઢ કલાકમાં અને હૈદરાબાદ 2 કલાકથી ઓછા સમયમાં પહોંચી શકાશે. પંઢરપુર અને સોલાપુરના વિકાસ અને પર્યટનને વેગ મળશે.

કેન્દ્રીય ગૃહ રાજ્ય મંત્રી બંડી સંજય કુમારના પુત્ર બંડી ભગીરથ સામે POCSO કેસમાં મોટો વળાંક આવ્યો છે. હાઈકોર્ટમાંથી ધરપકડ સામે રક્ષણ ન મળતા અને દેશ છોડીને ભાગી જતા અટકાવવા માટે લુક-આઉટ સર્ક્યુલર (LOC) જાહેર કરાયા બાદ આખરે ભગીરથે સાયબરાબાદ પોલીસ સમક્ષ આત્મસમર્પણ કર્યું છે. 17 વર્ષની સગીરાની માતાની ફરિયાદના આધારે આ કાર્યવાહી થઈ છે. મંત્રીએ જણાવ્યું કે કાયદાની નજરમાં બધા સમાન છે અને પુત્ર પણ કાયદાનું પાલન કરશે.

NEET-UG 2026 પેપર લીક વિવાદ વચ્ચે, કેન્દ્ર સરકારે NTA (નેશનલ ટેસ્ટિંગ એજન્સી) માં 4 ટોચના અધિકારીઓની નિમણૂકને મંજૂરી આપી છે. જેમાં 2 સંયુક્ત સચિવ (અનુજા બાપટ, રૂચિતા વિજ) અને 2 સંયુક્ત નિયામકનો સમાવેશ થાય છે. આ નિમણૂક 5 વર્ષ માટે છે અને એપોઇન્ટમેન્ટ્સ કમિટી ઓફ ધ કેબિનેટ (ACC) દ્વારા કરવામાં આવી છે. આ નિર્ણય ઉચ્ચ શિક્ષણ વિભાગ હેઠળ કાર્યરત NTA માં પારદર્શિતા લાવવાના પ્રયાસ તરીકે જોવાય છે.

પશ્ચિમ એશિયામાં વધતા તણાવ વચ્ચે કેન્દ્ર સરકારે સોના-ચાંદીની આયાતને લઈને મહત્વપૂર્ણ નિર્ણય લીધો છે. ડિરેક્ટોરેટ જનરલ ઓફ ફોરેન ટ્રેડ (DGFT) દ્વારા જાહેર કરાયેલા નોટિફિકેશન મુજબ હવે 99.9 ટકા શુદ્ધતા ધરાવતા ચાંદીના બારને ‘ફ્રી’ કેટેગરીમાંથી હટાવી ‘રેસ્ટ્રિક્ટેડ’ કેટેગરીમાં મૂકવામાં આવ્યા છે. અન્ય સિલ્વર બાર પર પણ આ જ નિયમ લાગુ કરાયો છે. આ નિર્ણય બાદ હવે સરકારની પરવાનગી વગર ચાંદીના બારની આયાત કરી શકાશે નહીં. સરકારનો આ પગલું વૈશ્વિક આર્થિક પરિસ્થિતિ અને આયાત નિયંત્રણને ધ્યાનમાં રાખીને લેવામાં આવ્યું હોવાનું માનવામાં આવે છે.

કોંગ્રેસ ફરી આંતરિક રાજકીય સંકટનો સામનો કરી રહી છે. કેરળમાં મુખ્યમંત્રી પદનો વિવાદ શાંત થયા બાદ હવે કર્ણાટકમાં મુખ્યમંત્રી Siddaramaiah અને નાયબ મુખ્યમંત્રી D. K. શિવકુમાર વચ્ચે સત્તાને લઈને ફરી મતભેદોની અટકળો તેજ બની છે. રાજ્યમાં લાગેલા પોસ્ટરો અને ચાલી રહેલી ચર્ચાઓથી કોંગ્રેસ હાઈકમાન્ડ એલર્ટ મોડમાં આવી ગયું હોવાનું કહેવાય છે. ગયા વર્ષે પણ બંને નેતાઓ વચ્ચે સત્તા સંઘર્ષની ચર્ચાઓ ઉઠી હતી, જેને હાઈકમાન્ડે શાંત પાડી હતી.

ભારતીય ક્રિકેટ ટીમમાં 'સુપરસ્ટાર કલ્ચર' ખતમ કરવાને લઈને ચાલી રહેલી લાંબી ચર્ચા વચ્ચે પૂર્વ હેડ કોચ રાહુલ દ્રવિડે મોટું નિવેદન આપ્યું છે. દ્રવિડે સ્પષ્ટ શબ્દોમાં કહ્યું છે કે, દરેક રમતને આગળ વધારવા માટે પોતાના હીરો અને સુપરસ્ટાર્સની જરૂર હોય છે, કારણ કે કોઈ પણ ખેલાડી મેદાન પર સતત શાનદાર પ્રદર્શન કર્યા વગર સુપરસ્ટાર બની શકતો નથી. રાહુલ દ્રવિડનું આ નિવેદન એવા સમયે આવ્યું છે જ્યારે વર્તમાન હેડ કોચ ગૌતમ ગંભીર સતત એ વાત પર જોર આપી રહ્યા છે કે ભારતીય ક્રિકેટમાં વ્યક્તિગત રેકોર્ડ કે સુપરસ્ટાર કલ્ચર કરતાં ટીમની જીત અને સફળતાને વધુ મહત્વ મળવું જોઈએ.

ICCની હાઈપ્રોફાઈલ બેઠક IPL-2026ના ફાઈનલ વીકેન્ડ દરમિયાન અમદાવાદમાં યોજાશે. 21 મેએ CECની વર્ચ્યુઅલ મીટિંગ અને 30-31 મેએ ICC બોર્ડની રૂબરૂ બેઠક થશે. આ હાઈપ્રોફાઈલ બેઠક પહેલા સૌથી મોટો સવાલ એ ઉઠી રહ્યો છે કે, પાકિસ્તાન ક્રિકેટ બોર્ડ (PCB)ના ચેરમેન મોહસિન નકવી (Mohsin Naqvi) ભારત આવશે કે નહીં? ભારત અને પાકિસ્તાન વચ્ચેનો તણાવ જોતાં મોહસિન નકવીની અમદાવાદમાં હાજરી અંગે અનિશ્ચિતતા વ્યક્ત કરાઈ રહી છે.

NEET પેપર લીક મામલે રાહુલ ગાંધીએ શિક્ષણ મંત્રી ધર્મેન્દ્ર પ્રધાનને તાત્કાલિક બરતરફ કરવાની માંગ કરી. તેમણે કહ્યું કે 22 લાખ વિદ્યાર્થીઓ સાથે વિશ્વાસઘાત થયો છે. PM મોદીના મૌન પર પણ પ્રશ્ન ઉઠાવ્યો. રાહુલ ગાંધીએ શિક્ષણ પ્રણાલીમાં RSS-BJPની સાઠગાંઠનો પણ આરોપ લગાવ્યો.

ગુજરાત રાજ્યમાં RTEમાં પ્રવેશ માટેની 2026-27ની ઓનલાઇન કેન્દ્રિય પ્રક્રિયામાં પ્રથમ રાઉન્ડ પુરો થઇ ગયો છે. પ્રથમ રાઉન્ડના અંતે 73 હજારથી વધુ બાળકોનો પ્રવેશ કન્ફર્મ થઇ ગયો છે. જ્યારે 4732 વાલીએ પોતાના બાળકોને પ્રવેશ મળવા છતાં પણ પ્રવેશ કન્ફર્મ કરાવ્યો નથી અને પ્રવેશ જતો કર્યો છે. જેથી આ ખાલી બેઠકો ઉપરાંત અગાઉ ન ફાળવાયેલી સહિતની હવે કુલ 10494 બેઠકો ખાલી છે. જે માટે બીજો રાઉન્ડ હાથ ધરાશે. RTE Act અંતર્ગત ધોરણ 1માં વિનામૂલ્યે પ્રવેશ માટેની સરકારની ઓનલાઇન કોમન પ્રક્રિયામાં આ વર્ષે રાજ્યની 9500થી વધુ ખાનગી સ્કૂલોની 25 ટકા બેઠકો મુજબ 83687 બેઠકો હતી.

દિલ્હીમાં IPL મેચોના VIP અને ફ્રી પાસની કાળાબજારીનો પર્દાફાશ. DDCA અધિકારીઓ અને પેટ્રોલ પંપ કર્મચારીઓની મદદથી સ્ટેડિયમની અંદરથી આયોજિત કૌભાંડ. વિરાટ કોહલીની મેચનો પાસ ₹80,000 સુધીમાં વેચાયો. સ્ટેડિયમ પાસેના પેટ્રોલ પંપથી પાસનું વિતરણ થતું હતું. પોલીસે મુખ્ય સૂત્રધાર સહિત અનેકને ઝડપી પાડ્યા. ઓનલાઈન સટ્ટાબાજી અને ગુનાહિત કનેક્શનની શંકા.

મુંબઈ-અમદાવાદ રાષ્ટ્રીય રાજમાર્ગ પર પાલઘર નજીક ₹17 કરોડની 600 કિલો ચાંદી ભરેલી સિક્યોરિટી વેન ડિવાઈડર કૂદીને ટ્રેલર સાથે ભટકાયા બાદ પલટી મારી ગઈ. આ ગમખ્વાર અકસ્માતમાં 2 લોકોના મોત, 1 ગંભીર રીતે ઈજાગ્રસ્ત. કિંમતી ચાંદીની સુરક્ષા માટે પોલીસ ગોઠવવી પડી.

NEET-UG 2026 પેપર લીક કેસમાં CBIએ પુણેની વરિષ્ઠ વનસ્પતિશાસ્ત્ર શિક્ષિકા મનીષા ગુરુનાથ મંડહરેની દિલ્હીથી ધરપકડ કરી છે. તેઓ NTA પેનલની સભ્ય હતા અને પેપર લીકના માસ્ટરમાઇન્ડ હોવાનું સામે આવ્યું છે. મંડહરે અને પુણેની મનીષા વાઘમારેએ મળી વિદ્યાર્થીઓને વિશેષ કોચિંગ આપી પરીક્ષા અગાઉ જ સવાલ જણાવ્યાનો આરોપ છે. CBIએ દેશભરમાં 6 સ્થળોએ દરોડા પાડી અનેક સામાન જપ્ત કર્યો છે, અને અત્યાર સુધીમાં કુલ 9 આરોપીઓની ધરપકડ કરી છે, જેમાં મુખ્ય સૂત્રધાર પી.વી. કુલકર્ણીનો પણ સમાવેશ થાય છે. NEETની ફરી પરીક્ષા 21 જૂને યોજાશે.

આંધ્રપ્રદેશ સરકારે ઘટતા વસ્તી વૃદ્ધિ દરને ધ્યાનમાં રાખી વધુ બાળકો પેદા કરવા પ્રોત્સાહિત કરતી નવી યોજના જાહેર કરી છે. મુખ્યમંત્રી ચંદ્રબાબુ નાયડુના નેતૃત્વ હેઠળ સરકાર હવે ત્રીજા બાળકના જન્મ પર ₹30,000 અને ચોથા બાળકના જન્મ પર ₹40,000ની આર્થિક સહાય આપશે. દેશમાં વસ્તી નિયંત્રણ અંગે ચર્ચાઓ વચ્ચે આ નિર્ણય ચર્ચાનો વિષય બન્યો છે. અગાઉ બીજા બાળક માટે પણ સહાયની ચર્ચા થઈ હતી, પરંતુ તેના અંગે હજી સત્તાવાર જાહેરાત કરવામાં આવી નથી.

સમાજવાદી પાર્ટી (SP)ના કદાવર નેતા આઝમ ખાનને 2019ની લોકસભા ચૂંટણીના પ્રચાર દરમિયાન તત્કાલીન જિલ્લા મેજિસ્ટ્રેટ (DM) વિરૂદ્ધ વાંધાજનક અને અપમાનજનક ટિપ્પણી કરવાના મામલામાં રામપુરની વિશેષ MP-MLA કોર્ટે દોષિત જાહેર કર્યા છે. અદાલતે આ કેસમાં આઝમ ખાનને 2 વર્ષની જેલની સજા સંભળાવી છે અને સાથે જ ₹5000નો આર્થિક દંડ પણ ફટકાર્યો છે. આ સમગ્ર મામલો 2019ની સામાન્ય ચૂંટણી વખતનો છે, જ્યારે રામપુરના ભોટ પોલીસ સ્ટેશન વિસ્તારમાં એક જાહેર સભાને સંબોધિત કરતી વખતે આઝમ ખાને તત્કાલીન કલેક્ટરને નિશાને લીધા હતા.

દિલ્હીમાં યોજાયેલા ‘સેના સંવાદ’ કાર્યક્રમમાં ભારતીય સેના પ્રમુખ ઉપેન્દ્ર દ્વિવેદીએ પાકિસ્તાનને કડક ચેતવણી આપતાં જણાવ્યું કે જો તે આતંકવાદીઓને આશરો આપવાનું ચાલુ રાખશે તો તેને પોતાના ભવિષ્ય અંગે વિચારવું પડશે. તેમણે આતંકવાદ સામે ભારતનું ‘ઝીરો ટોલરન્સ’ વલણ ફરી સ્પષ્ટ કર્યું. આ નિવેદનને પાકિસ્તાન માટે મહત્વપૂર્ણ કૂટનીતિક સંદેશ માનવામાં આવી રહ્યું છે. કાર્યક્રમ દરમિયાન રાષ્ટ્રીય સુરક્ષા, સરહદી પડકારો અને આધુનિક યુદ્ધની સ્થિતિ પર પણ ચર્ચા કરવામાં આવી હતી, જેના કારણે ભારત-પાક સંબંધો ફરી ચર્ચામાં આવ્યા છે.

ગુજરાતના વાહનચાલકો માટે ફરી એકવાર મોંઘવારીના માઠા સમાચાર સામે આવ્યા છે. અદાણી ગેસ દ્વારા કમ્પ્રેસ્ડ નેચરલ ગેસ (CNG)ના ભાવમાં પ્રતિ કિલો 2.24 રૂપિયાનો વધારો ઝીંકી દેવામાં આવ્યો છે. આ નવો ભાવ વધારો આજ (16મી મે)થી જ અમલમાં આવી ગયો છે, જેના કારણે સામાન્ય જનતા અને મધ્યમ વર્ગના ખિસ્સા પર સીધો આર્થિક બોજ વધશે. નવા વધારા બાદ હવે અદાણી CNGનો ભાવ પ્રતિ કિલો 86.1 રૂપિયા પર પહોંચી ગયો છે. નોંધનીય છે કે, છેલ્લા થોડા સમયથી અદાણી CNGના ભાવમાં સતત વધારો થઈ રહ્યો છે.