પાલનપુરના ખસા ગામની સરકારી પ્રાથમિક શાળાની 25 દીકરીઓએ કબડ્ડીમાં અદભૂત સિદ્ધિ મેળવી છે. ત્રણ વર્ષ પહેલાં જ્યાં કોઈને કબડ્ડીનો 'ક' પણ ખબર નહોતી, ત્યાં આજે આ દીકરીઓ રાજ્ય અને રાષ્ટ્રીય કક્ષાએ પોતાની પ્રતિભા સાબિત કરી રહી છે. આ પરિવર્તન પાછળ વ્યાયામ શિક્ષક પ્રકાશ પ્રજાપતિની નિઃસ્વાર્થ મહેનત છે. તેમણે દિવ્ય ભાસ્કર સાથે વાત કરતાં જણાવ્યું કે, તેઓ શાળા પૂર્ણ થયા બાદ અને રજાના દિવસોમાં દીકરીઓને તાલીમ આપે છે. તેમની મહેનતનું પરિણામ મળ્યું, જ્યાં 9 દીકરીઓ સ્ટેટ લેવલ અને 1 દીકરી નેશનલ ટીમ સુધી પહોંચી. હવે 10 દીકરીઓને દર મહિને રૂ. 5,000ની શિષ્યવૃત્તિ મળશે.