અયોધ્યા રામ મંદિર દાન ચોરી કેસમાં 6 જુલાઈએ શ્રી રામ જન્મભૂમિ તીર્થ ક્ષેત્ર ટ્રસ્ટની મહત્વપૂર્ણ બેઠક યોજાશે. તેમાં પૂર્વ મહાસચિવ ચંપત રાય અને ટ્રસ્ટી ડૉ. અનિલ મિશ્રાને કારણદર્શક નોટિસ આપીને ખુલાસો માંગવામાં આવશે. ફેજાબાદ બાર એસોસિએશને ચંપત રાય, અનિલ મિશ્રા અને ગોપાલ રાવ વિરુદ્ધ FIRની માંગ કરી છે. SIT તપાસ ચાલુ છે અને અત્યાર સુધીમાં 8 આરોપીઓની ધરપકડ થઈ છે. વિવાદ વધતા ચંપત રાય અને અનિલ મિશ્રાએ પોતાના પદ પરથી રાજીનામું આપી દીધું છે.

મહારાષ્ટ્રની વાશિમ જિલ્લા અદાલતે 2011ના પોલીસ કસ્ટડીમાં થયેલી હત્યાના કેસમાં પૂર્વ પોલીસ અધિકારી સહિત 9 પોલીસકર્મીઓને આજીવન કેદની સજા ફટકારી છે. પારધી સમાજના બેગ્યા પવારને પૂછપરછના બહાને પોલીસ સ્ટેશન લઈ જઈ થર્ડ ડિગ્રી અત્યાચારથી મોતને ઘાટ ઉતારાયો હતો. CID તપાસમાં મજબૂત પુરાવા મળ્યા બાદ 15 વર્ષની કાનૂની લડાઈ પછી કોર્ટે તમામ આરોપીઓને દોષિત ઠેરવ્યા. મૃતકના પરિવારજનોએ ચુકાદાને ન્યાયની જીત ગણાવી સંતોષ વ્યક્ત કર્યો.

અમદાવાદના ચંડોલા તળાવ વિસ્તારમાં વોન્ટેડ આરોપીને પકડવા ગયેલી ક્રાઈમ બ્રાન્ચની ટીમ પર આરોપીએ જીવલેણ હુમલો કર્યો, જેમાં ક્રાઈમ બ્રાન્ચના JCP ઈજાગ્રસ્ત થયા. પરિસ્થિતિ બેકાબૂ બનતા પોલીસે વળતી કાર્યવાહી કરીને આરોપીના પગમાં ગોળી મારી તેને કાબૂમાં લીધો. ઘાયલ JCP અને આરોપીને સારવાર માટે હોસ્પિટલ ખસેડવામાં આવ્યા છે. ઘટનાના પગલે સમગ્ર વિસ્તારમાં ભારે પોલીસ બંદોબસ્ત ગોઠવી આગળની તપાસ અને કાયદેસરની કાર્યવાહી શરૂ કરવામાં આવી છે.

પશ્ચિમ એશિયામાં પુરવઠાની અનિશ્ચિતતા વચ્ચે, ભારતે જૂન મહિનામાં પ્રતિ દિન ૪૯.૩૦ લાખ બેરલ ક્રુડ તેલની અત્યાર સુધીની સૌથી વધુ આયાત નોંધાવી છે. ખાસ કરીને, રશિયામાંથી આયાત પ્રતિ દિન ૨૬ લાખ બેરલ રહી છે, જે મે મહિનાની સરખામણીમાં ૩૭% નો વધારો દર્શાવે છે. રિસર્ચ પેઢી કેપ્લરના અહેવાલ મુજબ, આ વિક્રમી આયાત ભારતના આયાત સ્ત્રોતોમાં વૈવિધ્યકરણ અને ઓપેક દ્વારા ઉત્પાદનમાં વધારાનું પરિણામ છે. આનાથી ઘરઆંગણે ક્રુડ અને એલપીજીની ઉપલબ્ધતા અંગેની ચિંતાઓ ઓછી થઈ છે.

અમેરિકા-ઈરાન વચ્ચે સમજૂતી બાદ હોર્મુઝ સંકટ ટળતાં ક્રૂડ ઓઈલના ભાવ ઘટ્યા છે, પરંતુ કેન્દ્રીય પેટ્રોલિયમ મંત્રી હરદીપ પુરીએ સ્પષ્ટ કર્યું કે ભારતમાં પેટ્રોલ-ડીઝલના ભાવમાં તાત્કાલિક ઘટાડો નહીં થાય. તેમણે જણાવ્યું કે હાલ કંપનીઓ અગાઉ ઊંચા ભાવે ખરીદાયેલા ક્રૂડનો ઉપયોગ કરી રહી છે. જો આગામી 2-3 મહિના સુધી ક્રૂડના ભાવ નીચા રહેશે તો ભાવ ઘટાડા અંગે વિચારાશે. તેમણે દાવો કર્યો કે વૈશ્વિક સરખામણીએ ભારતમાં ઈંધણના ભાવમાં વધારો ઘણો ઓછો રહ્યો છે.

અમદાવાદના માણેકચોક વિસ્તારમાં આવેલી એક જ્વેલર્સની દુકાનમાં ચોરીની ઘટના બની છે. એક અજાણ્યો યુવક ગ્રાહક બનીને આવ્યો અને મહિલા સ્ટાફની નજર ચૂકવીને લગભગ ₹2,80,000ની કિંમતના સોનાના દાગીનાની ચોરી કરી ગયો. તેણે 18 કેરેટના 30 ગ્રામ વજનના સોનાના ઝુલાનું પેકેટ તેની બેગમાં મૂકી દીધું. બાદમાં, 'હું પાછળથી આવીને ખરીદી જઈશ' કહીને તે ફરાર થઈ ગયો. માસિક સ્ટોકની ગણતરી વખતે ચોરીની ઘટના સામે આવતાં CCTV ફૂટેજ ચેક કરાયા હતા. આ મામલે ખાડિયા પોલીસ સ્ટેશનમાં ફરિયાદ નોંધાવવામાં આવી છે અને પોલીસે તપાસ શરૂ કરી છે.

દિલ્હી પોલીસના સ્પેશિયલ સેલે પાકિસ્તાનની ISI સાથે જોડાયેલા આતંકવાદી અને શસ્ત્ર નેટવર્કનો પર્દાફાશ કરીને ચાર આરોપીઓની ધરપકડ કરી છે. પંજાબ અને દિલ્હીમાં થયેલી કાર્યવાહીમાં વિદેશી પિસ્તોલ, કારતૂસ અને મોબાઇલ ફોન જપ્ત કરાયા છે. તપાસમાં સામે આવ્યું કે આરોપીઓ ISI હેન્ડલર શહઝાદ ભટ્ટીના ઇશારે ડ્રોન મારફતે શસ્ત્રો મંગાવતા અને વિદેશી નંબરથી સંપર્ક કરતા હતા. મુખ્ય આરોપી ગગનપ્રીતને દિલ્હીમાં પોલીસ સ્ટેશનો અને ધાર્મિક સ્થળોની જાસૂસી તેમજ હુમલાની જવાબદારી સોંપાઈ હતી.

પૂણેના બિલ્ડર કેતન અગ્રવાલ હત્યા કેસમાં પોલીસે મુખ્ય આરોપી સિયા ગોયલનો લાઈ-ડિટેક્ટર (પોલીગ્રાફ) ટેસ્ટ કરાવવા કોર્ટમાં મંજૂરી માંગી છે. પોલીસના જણાવ્યા મુજબ, પ્રત્યક્ષ પુરાવાના અભાવે સત્ય બહાર લાવવા આ ટેસ્ટ જરૂરી છે. સિયા અને સહ-આરોપી ચેતન ચૌધરી હાલ પોલીસ કસ્ટડીમાં છે. પોલીસે મોબાઈલ ડેટા ડિલીટ થયાની આશંકા વચ્ચે ફોરેન્સિક તપાસ શરૂ કરી છે અને લોહગઢ કિલ્લા પર ક્રાઈમ સીનનું પુનઃનિર્માણ કરીને ઘટનાક્રમની તપાસ આગળ વધારી છે.

ગુજરાત મેડિકલ કાઉન્સિલે ફાર્મા કંપની પાસેથી વિદેશ પ્રવાસ અને હોસ્પિટાલિટીનો લાભ સ્વીકારવા બદલ અમદાવાદના જાણીતા સ્કીન સ્પેશિયાલિસ્ટ ડૉ. ગીતા પટેલને 13 મહિના માટે સ્ટેટ મેડિકલ રજિસ્ટરમાંથી સસ્પેન્ડ કર્યા છે. આ કાર્યવાહી NMCના નિર્દેશ બાદ કરવામાં આવી હતી. તપાસમાં પેરિસ-મોનાકોની કોન્ફરન્સનો ખર્ચ ફાર્મા કંપનીએ ઉઠાવ્યો હોવાનું સામે આવ્યું હતું. આ જ કેસમાં સુરતના ડૉ. અમી શાહ અને ડૉ. જગદીશ સખિયાને પણ સમાન સજા ફટકારવામાં આવી છે.

સુરતના નાસીરનગર ડિમોલિશન મામલે ગુજરાત હાઈકોર્ટે રાજ્ય સરકાર અને સુરત મ્યુનિસિપલ કોર્પોરેશન (SMC) સામે કડક વલણ અપનાવ્યું છે. હાઈકોર્ટે સરકારને સ્પષ્ટ ચેતવણી આપી કે, 'અમારી સત્તાને પડકારશો નહીં.' SMC દ્વારા રજૂ કરાયેલ ઇન્કવાયરી રિપોર્ટને કોર્ટે 'આંખમાં ધૂળ નાખવા સમાન' ગણાવી ફગાવી દીધો. કોર્ટે પૂછ્યું કે, શું નાગરિકો પ્રત્યે તમારી કોઈ જવાબદારી નથી? મોટા પાયે ડિમોલિશન થયું અને સરકાર અજાણ રહી તે વાત માનવામાં આવતી નથી. મ્યુનિસિપલ કમિશનરને બચાવવા માટે તપાસ નીચલી કેડરને સોંપાઈ રહી છે, જે યોગ્ય નથી. કોર્ટે પોલીસ દ્વારા FIR ન નોંધાવા પર પણ આકરા પ્રશ્નો પૂછ્યા.

પેપ્સિકોના પૂર્વ CEO ઈન્દ્રા નૂયીએ ભારતીય વર્ક કલ્ચર અને સામાજિક વ્યવસ્થા પર કડવી ટિપ્પણી કરી છે. તેમણે કહ્યું કે જો તેઓ ભારતમાં રહ્યા હોત તો ક્યારેય CEO બની શક્યા ન હોત, કારણ કે અમેરિકાની યોગ્યતા આધારિત સિસ્ટમ વધુ શ્રેષ્ઠ છે. તેમણે ચીનની વ્યવસ્થાના વખાણ કર્યા અને ભારતને 'અસ્તવ્યસ્ત' ગણાવ્યું. લોકશાહીના કારણે ભારતમાં વિકાસ ધીમો છે, જ્યારે ચીનનો વિકાસ ઝડપી છે. તેમ છતાં, તેઓ ભારતની લોકશાહીથી ખુશ છે. અમેરિકાએ ચીન સામેના હરીફાઈમાં ભારતને 'નેચરલ પાર્ટનર' ગણાવ્યું.

ડિજિટલ યુગમાં સાયબર ગુનેગારો 'વાહન બચાવ' કે ટ્રાફિક પોલીસના નામે નકલી ઈ-ચલણની લિંક મોકલી નાગરિકોને છેતરી રહ્યા છે. આ નકલી લિંક પર ક્લિક કરવાથી બેંક ખાતાની વિગતો ચોરી નાણાંની છેતરપિંડી થાય છે. બીજી પદ્ધતિમાં, તેઓ વોટ્સએપ પર નકલી એપ્લિકેશન મોકલી મોબાઈલમાં વાયરસ દાખલ કરે છે, જે SMS, કૉલ અને બેંક વિગતો ચોરી શકે છે. સાયબર નિષ્ણાતો સલાહ આપે છે કે અજાણી લિંક પર ક્લિક ન કરો અને કોઈપણ એપ્લિકેશન માત્ર સત્તાવાર સ્ટોર પરથી જ ડાઉનલોડ કરો. શંકાસ્પદ સંદેશાને અવગણો અને ભોગ બન્યા તો તરત જ 1930 પર સંપર્ક કરો.

અમદાવાદમાં ગુજરાત કોલેજના સ્પોર્ટ્સ વિભાગના આસિસ્ટન્ટ પ્રોફેસર પ્રજ્ઞેશ બારહાટે વિદ્યાર્થીઓને એરફોર્સમાં નોકરી અને સ્ટેટ ક્રિકેટ એસોસિયેશનની ટીમમાં સિલેક્શન અપાવવાની લાલચ આપીને લાખો રૂપિયાની છેતરપિંડી કરી છે. પ્રોફેસરે 99,000 રૂપિયા લઈને સિલેક્શન કરાવવાનું કહ્યું હતું, પરંતુ સમય જતાં વિદ્યાર્થીઓને મેઈલ આવ્યો નહીં અને પ્રોફેસરે ફોન બંધ કરી દીધો. અન્ય બે વિદ્યાર્થીઓ પાસેથી પણ નોકરીના નામે 15-15 હજાર રૂપિયા પડાવ્યા હતા. આ કુલ 1.29 લાખ રૂપિયાની છેતરપિંડી અંગે એલિસબ્રિજ પોલીસ સ્ટેશનમાં ફરિયાદ નોંધાઈ છે.

કર્મચારી ભવિષ્ય નિધિ સંગઠન (EPFO) દ્વારા PF નિયમોમાં મહત્વપૂર્ણ ફેરફાર કરવામાં આવ્યા છે. નવા નિયમ મુજબ, હવે ₹15,000 સુધીના પગાર પર જ 12% PF કાપ ફરજિયાત રહેશે. ₹1 લાખ પગાર ધરાવતા કર્મચારી માટે પણ ₹1,800 જમા થશે. આ કાનૂની મર્યાદા કરતાં વધુ રકમ PF માં જમા કરાવવી કે નહીં, તે સંપૂર્ણપણે કર્મચારીની ઈચ્છા પર નિર્ભર રહેશે. કર્મચારી પોતાની બાકીની સેલરીમાંથી નિવૃત્તિ સમયની બચત માટે વધારાનું રોકાણ કરી શકશે.

રાજકોટમાં સોશિયલ મીડિયા દ્વારા શરૂ થયેલા પ્રેમ સંબંધનો અકલ્પનીય કિસ્સો સામે આવ્યો છે. ઉત્તર પ્રદેશના પિયુષ નામના યુવકે ફેસબુક અને ઇન્સ્ટાગ્રામ પર 'નિશા' અને 'પૂનમ' નામની આઈડી ધરાવતી વ્યક્તિ, જે પુરુષ ('ગે') નીકળ્યો, તેની સાથે પ્રેમમાં પડી લગ્ન કર્યા. બાદમાં સતત ત્રાસ અને મારકૂટથી કંટાળી પિયુષે તેની હત્યા કરી દીધી. પોલીસે આ ઘટનાનો ભેદ ઉકેલી આરોપી પિયુષની ધરપકડ કરી વધુ તપાસ હાથ ધરી છે.

અમદાવાદમાં રિયલ એસ્ટેટ વેપારીને પાણીની બોટલના નવા પ્લાન્ટમાં 50% નફાની ભાગીદારીની લાલચ આપી 1.55 કરોડ રૂપિયાથી વધુની છેતરપિંડી કરવામાં આવી છે. આ કૌભાંડ વેપારીના 10 વર્ષ જૂના મેનેજર, તેના પુત્ર અને પુત્રવધૂએ મળીને આચર્યું છે. આરોપીઓએ મશીનરી ખરીદવાના નામે ખોટા બિલ અને બેન્ક સ્ટેટમેન્ટ બનાવી વેપારી પાસેથી નાણાં પડાવી લીધા હતા. આખરે, મશીનરી ચોરી કરવાનો પ્રયાસ કરતા ભાંડો ફૂટ્યો અને પોલીસ ફરિયાદ બાદ વધુ તપાસ હાથ ધરાઈ છે.

પશ્ચિમી દેશોના પ્રતિબંધો બાદ રશિયાને આર્થિક ટેકો આપનાર ભારતે હવે ફરી એકવાર મિત્રતા નિભાવી છે. યુક્રેનના ડ્રોન હુમલાને કારણે રશિયાની ઓઇલ રિફાઇનરીઓને નુકસાન થતાં ત્યાં પેટ્રોલની ભારે અછત સર્જાઈ છે. આ સ્થિતિમાં, ભારતે રશિયાને ગેસોલિન એટલે કે પેટ્રોલની સપ્લાય કરી મદદ કરી છે. અત્યાર સુધીમાં 60 હજાર મેટ્રિક ટન પેટ્રોલ મોકલવામાં આવ્યું છે. નોંધનીય છે કે ભારત રશિયા પાસેથી ક્રૂડ ઓઇલનો સૌથી મોટો ખરીદદાર પણ છે.

બેંગલુરુમાં IT કંપની કેપજેમિનીના કેમ્પસમાં આવેલા ડે-કેર સેન્ટરમાં 2-3 વર્ષના બાળકો સાથે ગંભીર દુર્વ્યવહારનો કિસ્સો પ્રકાશમાં આવ્યો છે. બાળકો રડે ત્યારે તેમને બાથરૂમમાં બંધ કરી દેવાતા, વોશિંગ મશીનના ડ્રમમાં બેસાડવામાં આવતા અને ટોયલેટ જેટથી મોઢા પર પાણી મારવામાં આવતું હતું. વાયરલ થયેલા વીડિયો બાદ પોલીસે 5 મહિલા કેરગિવર વિરુદ્ધ FIR નોંધી છે. આ બાળકો IT પ્રોફેશનલ્સના છે, જેઓ ડ્યુટી દરમિયાન તેમને ડે-કેરમાં છોડી જતા હતા. ઘટનાની ગંભીરતાને જોતાં કર્ણાટક રાજ્ય બાળ અધિકાર સંરક્ષણ આયોગે પણ તપાસ શરૂ કરી છે.

વીરપુર પોલીસને મળેલ બાતમીના આધારે લીંબરવાળા ગામે કાર્યવાહી કરતાં એક ઇસમ વિદેશી દારૂના મોટા જથ્થા સાથે ઝડપાયો છે. જિલ્લા પોલીસ અધિક્ષક લુણાવાડા વિભાગનાઓએ પ્રોહીબીશનની અસરકારક કામગીરી કરવા સૂચના કરી હતી, જેના અનુસંધાને વીરપુર પોલીસ સ્ટેશન દ્વારા ચાંપતી નજર રાખવામાં આવી રહી હતી. લીંમ્બરવાડા ગામના રણજીતભાઈ અમરાભાઈ ઠાકોર પોતાના ઘરે દારૂ રાખી વેચાણ કરતા હોવાની બાતમી મળતાં દરોડો પાડવામાં આવ્યો હતો. તેમના ખેતરમાંથી ટીન બીયર અને રોયલ સ્ટેગ કવોટર મળી આવ્યો છે.

હિંમતનગરઃ સાબરકાંઠા જિલ્લાના હિંમતનગર સ્થિત ટ્રાફિક શાખા દ્વારા છેલ્લા એક મહિનામાં નંબર પ્લેટ ન ધરાવતા 3050 તથા બ્લેક ફિલ્મ લગાવીને ફરતા 628 મળી 3678 વાહન ચાલકો સામે ટ્રાફિક શાખાના પીએસઆઈ એ.વી.જોષી અને તેમના સ્ટાફે વાહન ચેકીંગ કરીને નિયમોનો ભંગ કરતા વાહનચાલકો વિરૂધ્ધ દંડનીય કાર્યવાહી કરી હતી.

વિરમગામ શહેરની શેઠ એમ. જે. હાઈસ્કૂલના મેદાન પાસેના હાથી તલાવડી વિસ્તારમાંથી દેશી અને વિદેશી દારૂનો ખાનગી વેપલો ચલાવતા ભાટ વાસણા ગામના રમેશજી ઉર્ફે ગુગો લક્ષ્મણજી ઠાકોરને શહેર પોલીસે દારૂના જથ્થા સાથે ઝડપી લીધો. પોલીસે વાહન કબજે કરી, જેમાં 130 વ્હિસ્કી ક્વાટર, 22 બિયર ટીન, 100 લીટર દેશી દારૂ, એક મોબાઈલ અને વાહન મળી કુલ રૂ. 5,42,840નો મુદ્દામાલ જપ્ત કર્યો. રમેશજી ઠાકોર અને દીપક સુરેશભાઈ ઠાકોર વિરૂદ્ધ ગુનો નોંધી તપાસ શરૂ કરાઈ છે.

સાયલા ગામના સર્વોદય જીન વિસ્તારમાં સવારે એક જ જ્ઞાતિના બે જૂથો વચ્ચે કોઈ મુદ્દે ઉગ્ર બોલાચાલી બાદ ધીંગાણું સર્જાયું. આ મારામારીમાં બન્ને પક્ષો દ્વારા ધારીયા, લાકડીઓ અને ધોકા જેવા હથિયારોનો ઉપયોગ કરવામાં આવ્યો, જેમાં કુલ નવ લોકોને નાની-મોટી ઈજાઓ પહોંચી. ઈજાગ્રસ્તોને 108 એમ્બ્યુલન્સ દ્વારા સાયલા સરકારી હોસ્પિટલ ખસેડાયા, જ્યાં ત્રણથી ચાર લોકોને વધુ સારવાર માટે સુરેન્દ્રનગર અને એકને રાજકોટ મોકલવામાં આવ્યા. સાયલા પોલીસે ઘટનાસ્થળે અને હોસ્પિટલમાં બંદોબસ્ત ગોઠવી તપાસ હાથ ધરી.

ધ્રાંગધ્રાની રજવાડી રેસ્ટોરન્ટના મેનેજરે એક મહિલાને બીભત્સ ફોટા બતાવી બ્લેકમેઈલ કરી કટકે કટકે રૂપીયા બે લાખ પડાવી લીધાની ઘટના બની છે. આબીદ માલપરા નામનો મેનેજર મહિલાના ફોટા વાયરલ કરવાની ધમકી આપી પૈસા પડાવતો હતો. તેણે મહિલાને તેના પતિથી છૂટાછેડા લેવા માટે પણ દબાણ કર્યું હતું. આ અંગે ધ્રાંગધ્રા સિટી પોલીસ મથકે ફરિયાદ નોંધાતા પોલીસે વધુ તપાસ હાથ ધરી છે.

નેશનલ સ્ટેટેસ્ટિકલ ઓફિસના એક નવા સરવે મુજબ, ગુજરાતના મહાનગરોમાં નોકરી કરતાં ધંધામાં સરેરાશ 27% વધુ આવક થાય છે. અમદાવાદ, સુરત અને રાજકોટ જેવા શહેરોમાં બિઝનેસ કે સ્વ-રોજગાર મેળવતા લોકોની માસિક આવક સરેરાશ 27 હજાર રૂપિયા છે, જ્યારે નિયમિત વેતન મેળવતા લોકોની આવક 21 હજાર રૂપિયા છે. દેશભરના 48 શહેરોમાં પગારની દ્રષ્ટિએ ગુજરાતના શહેરોની સ્થિતિ નબળી છે, જોકે નવી મુંબઈમાં સૌથી વધુ પગાર મળે છે.

માધવપુરથી પોરબંદર તરફ આવતા નેશનલ હાઇવે પર ગોસા ચેકપોસ્ટ પર LCB ટીમે વાહન ચેકિંગ દરમિયાન એક ટ્રકને રોક્યો હતો. આ ટ્રકમાં કપાસિયાના બાચકાઓની આડમાં છુપાવેલો ભારતીય બનાવટના વિદેશી દારૂનો મોટો જથ્થો મળી આવ્યો હતો. પોલીસે કુલ 25,560 બોટલો, જેની કિંમત આશરે રૂ.1,00,30,872 છે, તેમજ ટ્રક, મોબાઈલ અને બાચકા સહિત કુલ રૂ.1,15,49,872 નો મુદ્દામાલ જપ્ત કર્યો છે. ટ્રક ડ્રાઇવર બાલુ ટપુભાઇ મોરીની પૂછપરછમાં અન્ય ચાર આરોપીઓના નામ ખુલતા પોલીસે ગુનો નોંધી વધુ તપાસ હાથ ધરી છે.

જૂનાગઢ શહેરમાં રેલવે સ્ટેશન પાસે લારીએ નાસ્તો લેવા ગયેલા અકીલભાઈ ફિરોજભાઈ સીડાનું રૂપિયા 25,000ની કિંમતનું બાઈક માત્ર 15 મિનિટમાં ચોરાઈ ગયું હતું. આ ઘટનાની FIRના આધારે બી ડિવિઝન પોલીસ સ્ટેશનના સર્વેલન્સ સ્ટાફે ટેકનિકલ તેમજ હ્યુમન સોર્સ દ્વારા મળેલી બાતમીના આધારે તપાસ હાથ ધરી. આ તપાસમાં પોલીસે ભારત મીલના ઢોરા વિસ્તારમાં રહેતા 35 વર્ષીય ગુલામશા ઉર્ફ પપ્પુ દોસ્તમહમદ સર્વદી નામના શખ્સને ચોરાયેલા બાઈક સાથે ઝડપી લીધો.

જુનાગઢ મહાનગરપાલિકાની માલિકીની મિલકતો પર મંજૂરી વગર જાહેરાત સ્ટીકર અને બોર્ડ લગાવનાર ત્રણ લોકો પાસેથી કુલ ₹13,600 નો દંડ વસૂલવામાં આવ્યો છે. મોતીબાગ વિસ્તારમાં 'સ્વાતિ ફેશન જ્વેલરી' પાસેથી ₹10,000, જલારામ ટ્યુશન પાસેથી ₹2,500 અને રાધિકા બ્યુટી ઝોન પાસેથી ₹1,100 નો દંડ લેવાયો છે. મહા નગરપાલિકાએ ગેરકાયદેસર જાહેરાતો દૂર કરાવી અને ભવિષ્યમાં આવી ભૂલ ન થાય તેની લેખિત બાહેધરી પણ લીધી છે.

દેવભૂમિ દ્વારકા જિલ્લાના સલાયા નજીક ગોઇંજમાં એક અનોખો કિસ્સો સામે આવ્યો છે, જ્યાં એક શાકભાજી વિક્રેતા મંદિરના પટાંગણમાં ગાંજાની ખેતી કરતો ઝડપાયો છે. પોલીસે દરોડો પાડી બે લીલા છોડ અને 329 ગ્રામ સુકો ગાંજો, જેની કિંમત લગભગ રૂા. 16450 છે, તે કબજે કર્યો છે. આ શખસ, કેશુ છગનભાઇ રાઠોડ, શાકભાજી વેચવાની આડમાં આર્થિક લાભ માટે આ માદક પદાર્થનો વેપાર કરતો હતો. પોલીસે એનડીપીએસ એકટ હેઠળ ગુનો નોંધી વધુ તપાસ હાથ ધરી છે.

જામનગર નજીક બેડ પાસે વૃદ્ધ પદયાત્રીની સાયકલમાંથી રોકડ ચોરીના ગુનાનો ભેદ સ્થાનિક ગુના શોધક શાખાએ ઉકેલ્યો છે. પોલીસે એક કિશોર સહિત ત્રણ શખસોને દબોચી લીધા છે. પોલીસે ₹56,050 રોકડા, ચોરીમાં વપરાયેલું બાઈક અને અન્ય મુદ્દામાલ મળી કુલ ₹1.06 લાખનો મુદ્દામાલ કબજે કર્યો છે. રાજસ્થાનના વૃદ્ધ પદયાત્રી દંડવત યાત્રાએ દ્વારકા જઈ રહ્યા હતા, ત્યારે તેમની સાયકલમાં રાખેલી રોકડ ચોરી થઈ હતી. આરોપીઓની પૂછપરછમાં ગુનાહિત ઇતિહાસ પણ સામે આવ્યો છે.

અમરેલી LCBએ ચિત્તલ ગામના રેલવે ફાટક નજીક એક ઇકો કારને અટકાવી હતી. આ કારમાં બાબરાથી અમરેલી લઈ જવાતો 320 બોટલ ઈંગ્લીશ દારૂ ઝડપાયો હતો. પોલીસે કાર, દારૂ અને મોબાઈલ સહિત કુલ રૂ. 2,64,720 નો મુદ્દામાલ કબ્જે કર્યો છે. મધ્યપ્રદેશના બે રહેવાસીઓ નાનચા ગુમાનસીંગ બામનીયા અને રમેશ દિતલીયાભાઈ બામનીયાની ધરપકડ કરાઈ છે. આ ગુનામાં અમરેલીના વસંત બારોટ નામના એક આરોપીની શોધખોળ ચાલુ છે.