જામનગર મહાનગરપાલિકાના ફાયર એન્ડ ઇમરજન્સી સર્વિસીસ વિભાગને 10 નવા અત્યાધુનિક વાહનો મળ્યા છે, જે નાગરિકોની સુરક્ષા વધુ સુદૃઢ બનાવશે. આ વાહનો અદ્યતન ટેકનોલોજી અને સાધન-સામગ્રીથી સજ્જ છે, જે રાહત અને બચાવ કામગીરીને વધુ ઝડપી અને અસરકારક બનાવશે. રાજ્ય સરકારની નીતિ અંતર્ગત 14 જૂના વાહનોને સેવામુક્ત કર્યા બાદ આ નવા વાહનો ખરીદવામાં આવ્યા છે. નવા કાફલામાં 4 વોટર બાઉઝર, 3 મલ્ટીપર્પઝ ફાયર ટેન્ડર, 2 મિની ફાયર ટેન્ડર અને 1 ટોયોટા હાઇલેક્સ કોન્વોય વ્હીકલનો સમાવેશ થાય છે. આનાથી સાંકડા માર્ગો, ઔદ્યોગિક વિસ્તારો અને હાઇરાઇઝ ઇમારતોમાં પણ ફાયર બ્રિગેડની કામગીરી વધુ સક્ષમ બનશે.