ભાજપના સાંસદ અનુરાગ ઠાકુરે લોકસભા અધ્યક્ષ ઓમ બિરલાને રાહુલ ગાંધી વિરુદ્ધ વિશેષાધિકાર ભંગની નોટિસ આપી. આરોપ છે કે રાહુલ ગાંધીએ ગૃહમંત્રી અમિત શાહ વિરુદ્ધ અસંસદીય ભાષાનો ઉપયોગ કર્યો. બુધવારે રાહુલ ગાંધીએ પેપર લીક સુધારા બિલ પર બોલતા શાહ પર ગંભીર આરોપો લગાવ્યા હતા, જેમાંથી કેટલાકને અધ્યક્ષે કાર્યવાહીમાંથી હટાવી દીધા. આ દરમિયાન, પેપર લીક સુધારા બિલ રાજ્યસભામાં પણ પસાર થયું. મનુસ્મૃતિ પર મલ્લિકાર્જુન ખડગેના નિવેદન બાદ ગૃહમાં હોબાળો થયો.

ડભોઇ પાસે ઢાલનગર વસાહતમાં ગટર લાઈન નાખવા માટે કરાયેલા બેદરકારીભર્યા ખોદકામને કારણે મુખ્ય માર્ગ સંપૂર્ણપણે બિસ્માર બન્યો છે. લગભગ 1 કિલોમીટર લાંબો રસ્તો ખરાબ થતાં ગ્રામજનો રોજીંદા કામકાજ માટે પણ હેરાન થઈ રહ્યા છે. 108 એમ્બ્યુલન્સ પણ આવતી નથી, જેના કારણે બીમાર કે સગર્ભા મહિલાઓને હોસ્પિટલ પહોંચાડવામાં જીવનું જોખમ ઊભું થયું છે. શાળાના બાળકો અને શિક્ષકો પણ વાહનો દૂર મૂકીને પગપાળા ચાલી રહ્યા છે. ચોમાસામાં કાદવ-કીચડને કારણે અકસ્માતોનું પ્રમાણ વધ્યું છે.

પ્રધાનમંત્રી ગ્રામ સડક યોજના (PMGSY) ફેઝ-4 હેઠળ છોટાઉદેપુરના કુકરદા ગામમાં માર્ગ સ્ટ્રક્ચરના નિર્માણ માટે SVNIT, સુરતની ટીમે સ્થળ નિરીક્ષણ કર્યું. આ નિરીક્ષણમાં ખોહરી ફળિયા, બોર ડાબરા ફળિયા અને વાકી કડવ ફળિયા તરફ જતા માર્ગો પર જરૂરી પુલ અને કલ્વર્ટ જેવા સ્ટ્રક્ચરની જરૂરિયાતોનું ટેકનિકલ મૂલ્યાંકન કરાયું. ભૌગોલિક સ્થિતિ અને વરસાદી પાણીના વહેણને ધ્યાનમાં રાખીને રૂપરેખા તૈયાર કરાશે. ત્યારબાદ ડ્રોઈંગ, Estimate, અને મંજૂરી પ્રક્રિયા પૂર્ણ થતાં માર્ગ નિર્માણ શરૂ થશે, જે ગ્રામજનોની વર્ષો જૂની સમસ્યા હલ કરશે.

ડભોઇ નગરપાલિકા દ્વારા બંગાળની ખાડીમાં થયેલા ડીપ ડિપ્રેશનને કારણે ભારે વરસાદની આગાહીના પગલે જર્જરિત અને ભયગ્રસ્ત મકાનોમાં રહેતા 40 મિલકત ધારકોને તાત્કાલિક મકાનો ખાલી કરવા નોટિસ પાઠવવામાં આવી છે. ચીફ ઓફિસર જયકિશન તડવી અને મહેશભાઈ પરમારની ટીમ દ્વારા શહેરના વિવિધ વિસ્તારોમાં આ નોટિસની કામગીરી હાથ ધરાઈ છે. આગાહી મુજબ ભારે વરસાદની સંભાવનાને ધ્યાનમાં રાખી, નગરપાલિકા દ્વારા યુદ્ધના ધોરણે ઇમરજન્સી પરિસ્થિતિને પહોંચી વળવા માટે તૈયારીઓ શરૂ કરવામાં આવી છે. લોકોને સાવચેત કરવા રિક્ષા દ્વારા પ્રચાર પણ શરૂ કરાયો છે.

ડભોઇના સરિતા રેલવે ઓવરબ્રિજ પર બે કાર વચ્ચે સામસામે અકસ્માત થતાં એક તરફનો બ્રિજ વાહનવ્યવહાર માટે બંધ કરાયો છે. સમારકામ હેઠળ હોવાથી એક જ બ્રિજ પર ટ્રાફ્કિ ડાયવર્ટ કરાયો હતો. આ અકસ્માતને કારણે કલાકો સુધી ભારે ટ્રાફ્કિ જામ સર્જાયો હતો, જેમાં બે લોકોને સામાન્ય ઈજાઓ પહોંચી હતી. આ મહત્વપૂર્ણ માર્ગ સ્ટેચ્યુ ઓફ યુનિટી અને અનેક પ્રવાસન સ્થળો તરફ દોરી જાય છે, જેથી પ્રવાસીઓને પણ હાલાકી પડી રહી છે.

બોડેલી રેલવે ફાટકમાં સર્જાયેલી ટેક્નિકલ ખામીને કારણે ગુરુવારે બંને તરફ ટ્રાફિક જામ થયો હતો. ટ્રેન પસાર થયા બાદ એક તરફનો ગેટ ઊંચો ન થતાં વાહનોની લાંબી કતારો લાગી હતી, જેનાથી વાહનચાલકોને ભારે હાલાકી પડી હતી. રેલવે કર્મચારીઓ તાત્કાલિક ઘટનાસ્થળે પહોંચી ગયા હતા અને જાતે ગેટ ઊંચો કરીને ફાટક ખોલ્યો હતો. સમયસર ખામી દૂર થતાં વાહન વ્યવહાર પુનઃ શરૂ થયો હતો અને સંભવિત અકસ્માત ટળી ગયો હતો.

શહેરાના ગ્રીન પાર્ક અને શાન્તા કુંજ સોસાયટીમાં વારંવાર સાપ નીકળવાની ઘટનાઓથી રહીશોમાં ભય હતો. ગ્રીન પાર્ક સોસાયટીમાં એક મકાન પાછળ 6 ફૂટ લાંબો ધામણ સાપ જોવા મળતાં વન વિભાગને જાણ કરાઈ. રાઉન્ડ ફેરેસ્ટર સી.બી. બારિયા, શક્તિભાઈ માલીવાડ અને ભાવેશ રાવલે મહેનત કરીને સાપને રેસ્ક્યુ કર્યો. ત્યારબાદ સાપને સુરક્ષિત રીતે તેના કુદરતી રહેઠાણ જંગલમાં છોડી દેવાતાં રહીશોએ રાહત અનુભવી.

રોટરી ક્લબ ઓફ સુરેન્દ્રનગર દ્વારા માતા અને બાળકના સ્વાસ્થ્યને પ્રાધાન્ય આપવા, એચયુએમએફ – હેલ્ધી ફુડ એન્ડ ન્યુટ્રીશીયન કિટ પ્રોગ્રામ ફોર પ્રેગ્નેટ લેડીઝ પ્રોજેક્ટ હેઠળ જોરાવરનગર સરકારી હોસ્પિટલમાં 55 ગર્ભવતી બહેનોને પોષણ કિટનું વિતરણ કરાયું. કિટમાં ગોળ, ચણા, પ્રોટીન પાઉડર અને આયર્ન સિરપ જેવી વસ્તુઓ હતી. લાભાર્થીઓને પ્રોટીન પાઉડર અને આયર્ન સિરપના ઉપયોગ તેમજ પોષણના મહત્વ વિશે માર્ગદર્શન અપાયું. આગામી વર્ષ દરમિયાન દર મહિને 55 બહેનોને કિટ આપવાનો સંકલ્પ છે.

રાજસીતાપુરની માસુમ સ્કૂલના યુ.કે.જી.ના વિદ્યાર્થી દિવ્યરાજસિંહના અકસ્માતે મૃત્યુ બાદ શાળાને કારણદર્શક નોટિસ ફટકારાઈ છે. RTO વિભાગને બસના PUC અને ફિટનેસ સર્ટિ. સહિતના ડોક્યુમેન્ટ તપાસવા જણાવાયું છે. શાળાની બસનું તળિયું તૂટી જતા બાળક રોડ પર પટકાયું હતું, જેમાં શાળાની ગંભીર બેદરકારી સામે આવી છે. શાળા પાસે કેટલી બસ છે, GPS અને CCTV છે કે કેમ, તથા વીમા અંગેના આધાર રજૂ કરવા જણાવાયું છે. RTO રિપોર્ટ બાદ સમગ્ર વિગતો ગાંધીનગર મોકલવામાં આવશે.

દેશની સીમાઓની સુરક્ષા અને આપદાઓ વખતે રાષ્ટ્રસેવા માટે તત્પર રહેતા સશસ્ત્ર દળોના સેવારત તેમજ પૂર્વ સૈનિકો અને તેમના પરિવારોના કલ્યાણ અર્થે કેશોદ મંડપ, ઈલેક્ટ્રીક, સાઉન્ડ એન્ડ ફ્લાવર એસોસિએશન દ્વારા રૂ. 1,51,551/- નો ચેક સશસ્ત્ર સેના ધ્વજદિન ભંડોળમાં અર્પણ કરવામાં આવ્યો. જિલ્લા સૈનિક કલ્યાણ અધિકારીએ આપેલા અનુદાન બદલ આભાર વ્યક્ત કરી નાગરિકો અને સંસ્થાઓને યથાશક્તિ આર્થિક સહયોગ આપવા અપીલ કરી છે.

પોરબંદરના ગરેજ પ્રાથમિક આરોગ્ય કેન્દ્ર (PHC) ખાતે સગર્ભા માતાઓના સ્વાસ્થ્ય અને સુખમય માતૃત્વ માટે એક વિશેષ એ.એન.સી. (ANC) કેમ્પનું સફળ આયોજન થયું. આ કેમ્પમાં ગરેજ અને આસપાસના વિસ્તારોમાંથી કુલ 45 સગર્ભા બહેનોએ ભાગ લીધો અને આરોગ્ય સેવાઓનો લાભ મેળવ્યો. ડૉ. કુછડીયા અને ડૉ. ગરીબા દ્વારા તેમની તબીબી તપાસ કરવામાં આવી. એચ.બી., બ્લડ સુગર, બ્લડ ગ્રુપ જેવા જરૂરી ટેસ્ટ સ્થળ પર જ થયા. પોષણ અને ગર્ભાવસ્થા દરમિયાનના જોખમો વિશે માર્ગદર્શન અપાયું. 'ખિલખિલાટ' વાહન દ્વારા વિનામૂલ્યે આવવા-જવાની વ્યવસ્થા કરાઈ.

ગુજરાત પ્રાકૃતિક કૃષિ વિકાસ બોર્ડ દ્વારા રાણાવાવ તાલુકાની મહિલા ખેડૂતોને પ્રાકૃતિક ખેતી અંગે તાલીમ આપવામાં આવી. જેમાં બીજામૃત, જીવામૃત, ઘન જીવામૃત, આચ્છાદન અને મિશ્ર પાક પદ્ધતિ વિશે જાણકારી અપાઈ. તજજ્ઞોએ અગ્નિઅસ્ત્ર, બ્રહ્માસ્ત્ર, દશપર્ણ અર્ક જેવા પ્રાકૃતિક અસ્ત્રોના ઉપયોગ, વિવિધ પાકોમાં પ્રાકૃતિક ખેતી અપનાવવાની રીત સમજાવી. ડી.એ.પી. જેવા રાસાયણિક ખાતરોનો ઉપયોગ ઘટાડી જીવામૃત અને ઘન જીવામૃતનો ઉપયોગ વધારવા પ્રોત્સાહન અપાયું.

પોરબંદરથી માધવપુર હાઈવે પર કમલાબાગથી છાંયા ચોકી સુધીની રોડ પર સ્પીડબેકર અને ઝેબ્રા ક્રોસિંગ નથી. આ મુખ્ય માર્ગ પર સરકારી એમ.કે. ગાંધી ઈંગ્લીશ મીડિયમ સ્કૂલ આવેલી છે, જ્યાં 1000થી વધુ વિદ્યાર્થીઓ અભ્યાસ કરે છે. સતત વાહનોના ટ્રાફિક અને સ્કૂલના સમય દરમિયાન ધસારાને કારણે અકસ્માતનો ભય રહે છે. સુપ્રીમ કોર્ટ અને IRC ગાઈડલાઈનનો ખુલ્લેઆમ ભંગ થઈ રહ્યો છે, છતાં તંત્ર દ્વારા કોઈ કાર્યવાહી કરવામાં આવી રહી નથી. હેવી વાહનો અને ઓવરસ્પીડિંગથી બાળકોની સુરક્ષા જોખમાઈ રહી છે.

મોડાસા-રાજેન્દ્રનગર રોડ પર ઇકો અને ટ્રક વચ્ચે થયેલા ગમખ્વાર અકસ્માતમાં ઇકો ચાલક યુવાનના મોત બાદ સ્થાનિકોમાં ભારે રોષ ભભૂક્યો હતો. છેલ્લા ત્રણ વર્ષથી અધૂરા રહેલા રોડની કામગીરી અને અકસ્માતોની ઘટનાઓથી ત્રસ્ત ગ્રામજનો અને આગેવાનોએ મોડાસા-રાજેન્દ્રનગર હાઇવે પર ચક્કાજામ કર્યો હતો. તેમણે માર્ગ અને મકાન વિભાગ સામે સૂત્રોચ્ચાર કરી તાત્કાલિક કામગીરી પૂર્ણ કરવાની માંગ કરી હતી. આ માર્ગ પર છેલ્લા છ મહિનામાં 17 અકસ્માત થયા છે, જેમાં 5 લોકોએ જીવ ગુમાવ્યા છે.

મોરબી જિલ્લામાં જૂન મહિનામાં વરસાદના અભાવ બાદ જુલાઈમાં સારા વરસાદથી ખેડૂતોને રાહત મળી છે. સમગ્ર જિલ્લામાં થયેલા સાર્વત્રિક વરસાદથી જળાશયો છલકાયા છે. જુલાઈ મહિનાનો સરેરાશ વરસાદ 279 મીમી (11.16 ઇંચ) નોંધાયો છે, જે છેલ્લા 10 વર્ષમાં ત્રીજી વખત જુલાઈમાં ડબલ ડિજિટ વરસાદ છે. સામાન્ય રીતે જુલાઈમાં ઓછો વરસાદ પડે છે, પરંતુ આ વર્ષે સ્થિતિ બદલાઈ છે. અગાઉ 2017 અને 2022માં પણ જુલાઈમાં 10 ઇંચથી વધુ વરસાદ નોંધાયો હતો.

વટવા વિસ્તારમાં વર્ષોથી ગટરો ઉભરાવાની સમસ્યાએ લોકોને ત્રાસ આપે છે. ચોમાસામાં ગંદા પાણી ભરાવાથી ગંદકી અને મચ્છરોનો ત્રાસ વધે છે, જે આરોગ્ય માટે જોખમી છે. મ્યુનિ.માં ઓનલાઈન ફરિયાદો કરાય તો તંત્ર માત્ર ફરિયાદ નોંધી સંતોષ માની લે છે. સમસ્યાના નક્કર ઉકેલ વિના જ ઓનલાઈન ફરિયાદો બંધ કરી દેવાતી હોવાનો લોકો આક્ષેપ કરી રહ્યા છે. આ ઓનલાઈન નોંધણી માત્ર કાગળ પર જ રહી રહી છે, વાસ્તવિક કાર્યવાહી થતી નથી.

અમદાવાદ શહેરમાં આગામી બે દિવસ ભારેથી અતિભારે વરસાદની આગાહીને પગલે કોર્પોરેશન દ્વારા તંત્રને હાઈ એલર્ટ પર મૂકવામાં આવ્યું છે. મ્યુનિ. કમિશનર બંછાનિધિ પાનીએ જણાવ્યું કે અમદાવાદ ડીપ ડિપ્રેશનનું કેન્દ્ર બની શકે છે, તેથી તમામ વિભાગોને પૂર્વ તૈયારીઓના આદેશ અપાયા છે. નાગરિકોને જરૂરી ન હોય તો બહાર ન નીકળવાની અપીલ કરાઈ છે. 40થી 50 કિમી પ્રતિ કલાકની ઝડપે પવન ફૂંકાવાની શક્યતા છે. સાબરમતી રિવરફ્રન્ટનું પાણી ઘટાડી લેવલ 123 ફૂટ સુધી લવાયું છે અને 5 તળાવો ઇન્ટરલિંકિંગ દ્વારા ખાલી કરવાનું શરૂ કરાયું છે.

રાજ્ય સરકાર દ્વારા વન સંરક્ષણ અને વન્યજીવ સુરક્ષાને મજબૂત કરવાના પ્રયાસોના ભાગરૂપે, દાહોદ વન વિભાગના કર્મચારીઓને મોટરસાઇકલની ફાળવણી કરવામાં આવી છે. દાહોદ જિલ્લા પ્રભારી મંત્રી અર્જુન મોઢવાડિયાના હસ્તે આ બાઈકને લીલી ઝંડી આપી પ્રસ્થાન કરાવવામાં આવ્યું. આ વાહન સુવિધાથી જંગલ વિસ્તારોમાં પેટ્રોલિંગ, વન્યજીવ સંરક્ષણ, ગેરકાયદેસર પ્રવૃત્તિઓ પર નિયંત્રણ અને આપત્તિ સમયે ઝડપી પ્રતિભાવ આપવામાં મદદ મળશે. આધુનિક સુવિધાઓ દ્વારા વન સંપદાના સંરક્ષણ માટે રાજ્ય સરકાર પ્રતિબદ્ધ છે.

દાહોદ જિલ્લામાં ભારે વરસાદની આગાહી અને હવામાન વિભાગની ચેતવણીને પગલે જિલ્લા વહીવટી તંત્ર એલર્ટ થયું છે. તા. 31 જુલાઈ અને 1 ઓગસ્ટે ભારેથી અતિભારે વરસાદની સંભાવના હોવાથી, જિલ્લા કલેક્ટર સુરભી ગૌતમે અધિકારીઓ સાથે બેઠક કરી પરિસ્થિતિની સમીક્ષા કરી. દાહોદ અને દેવગઢ બારીઆમાં NDRF અને SDRFની ટીમોને તૈનાત કરવામાં આવી છે. આ ટીમો મામલતદાર અને કલેક્ટરના આદેશ મુજબ રેસ્કયુ કામગીરી કરશે. નાગરિકોને બિનજરૂરી બહાર ન નીકળવા અને સાવચેતી રાખવાની સલાહ અપાઈ છે.

હવામાન વિભાગે પંચમહાલ જિલ્લા માટે ઓરેન્જ એલર્ટ જાહેર કર્યું છે. આગામી શનિવાર સવાર સુધી ભારેથી અતિભારે વરસાદની સંભાવના છે. આ પરિસ્થિતિને પહોંચી વળવા જિલ્લા તંત્રને હાઈ એલર્ટ પર રાખવામાં આવ્યું છે. SDRFની બે અને NDRFની એક ટીમ ફ્લ્ડિમાં તૈનાત કરાઈ છે. નીચાણવાળા વિસ્તારોની મુલાકાત લઈ લોકોને સલામત સ્થળે ખસેડવાની તૈયારી છે. ઈમરજન્સી ઓપરેશન સેન્ટર 24 કલાક કાર્યરત રહેશે અને તમામ વિભાગો સતર્ક છે. ગોધરા અને શહેરા તાલુકામાં પણ સર્વેક્ષણ કરાયું છે.

ભરૂચ તાલુકાના દયાદરા ગામની સાબરી કોલોનીમાં અનેક ચકલીઓ શંકાસ્પદ રીતે મૃત હાલતમાં મળી આવતા ભારે ચકચાર મચી જવા પામી છે. ચકલીઓના ચણમાં ઝેર ભેળવવામાં આવ્યું છે કે પ્રદૂષણની અસર છે તે સ્પષ્ટ નથી. સ્થાનિકોએ તાત્કાલિક તપાસની અને કસૂરવારો સામે કડક કાર્યવાહીની માંગ કરી છે. વિલાયત GIDCના પ્રદૂષણની આશંકા પ્રબળ બની રહી છે. આ ઘટનાની નિષ્પક્ષ તપાસ કરી જવાબદારો સામે કાર્યવાહી કરવામાં આવે તેવી નાગરિકોની માંગ છે.

રાજપીપળામાં વરસાદી ઋતુને ધ્યાનમાં રાખીને ખોરાક અને ઔષધ નિયમન તંત્ર દ્વારા સઘન ચકાસણી અભિયાન હાથ ધરાયું. આ અભિયાન હેઠળ 30 જેટલા ખાણીપીણીના સ્ટોલ અને લારીઓની તપાસ કરવામાં આવી. વેપારીઓને સ્વચ્છતા જાળવવા અને આરોગ્યપ્રદ ખોરાક વેચવાની સૂચનાઓ અપાઈ. તપાસ દરમિયાન, અસ્વચ્છ અને માનવ આરોગ્ય માટે અયોગ્ય જણાયેલી 27 કિલોગ્રામથી વધુ ખાદ્ય સામગ્રી, જેમાં બટાકાનો માવો, મન્ચુરિયન બોલ્સ, મન્ચુરિયનનો લોટ, પાણીપૂરીનું પાણી અને કૃત્રિમ રંગના પેકેટનો સમાવેશ થાય છે, તેનો સ્થળ પર જ નાશ કરવામાં આવ્યો.

વૈશ્વિક ઇક્વિટી બજારોમાં અમેરિકન ફેડરલ રિઝર્વ દ્વારા વ્યાજદર યથાવત્ રાખવામાં આવ્યા બાદ સ્પષ્ટ દિશાનો અભાવ રહ્યો હતો. ફુગાવા સામે કડક વલણના સંકેતોને કારણે અમેરિકન બોન્ડ યીલ્ડમાં વધારો થતાં સાવચેતી જોવા મળી. ભારતીય બજારને પ્રથમ ત્રિમાસિકના સારા કોર્પોરેટ પરિણામો, સ્થાનિક સંસ્થાકીય રોકાણકારોની ખરીદી અને SIP દ્વારા આવતા નાણાંપ્રવાહનો આધાર મળ્યો. જોકે, ઉપરના સ્તરે નફાવસૂલી અને વૈશ્વિક અનિશ્ચિતતાને કારણે દિવસ દરમિયાન ઊંચી વોલેટિલિટી રહી. બજાર મહત્વના ટેકનિકલ સપોર્ટ ઉપર ટકી રહ્યું છે, પરંતુ અવરોધ સ્તરો નજીક નફાવસૂલીનું દબાણ યથાવત્ છે.

હવામાન વિભાગે 31 જુલાઈએ રાજ્યના 13 જિલ્લાઓમાં ભારેથી અતિભારે વરસાદની આગાહી સાથે ‘રેડ એલર્ટ’ જાહેર કર્યું છે. અમદાવાદ અને દક્ષિણ ગુજરાતના જિલ્લાઓમાં અત્યંત ભારે વરસાદની સંભાવના છે. રાજકોટ, અમરેલી, સુરેન્દ્રનગર સહિત 7 જિલ્લામાં ‘ઓરેન્જ એલર્ટ’ છે. સૌરાષ્ટ્ર અને ઉત્તર ગુજરાતમાં ‘યલો એલર્ટ’ સાથે ભારે વરસાદની આગાહી છે. માછીમારોને દરિયો ન ખેડવા સૂચના અપાઈ છે. રાજ્યમાં એકસાથે ચાર વરસાદી સિસ્ટમ સક્રિય હોવાથી વરસાદનું જોર વધશે.

દેશભરમાં ચોમાસાની આફતે હાહાકાર મચાવ્યો છે. ઉત્તરાખંડ, મહારાષ્ટ્ર, જમ્મુ-કાશ્મીર, હિમાચલ પ્રદેશ, ઓડિશા અને અસમ સહિત અનેક રાજ્યોમાં મુશળધાર વરસાદ, પૂર અને ભુસ્ખલનના કારણે જનજીવન અસ્તવ્યસ્ત થઈ ગયું છે. કેદારનાથ યાત્રા સ્થગિત કરવી પડી છે, જ્યારે અસમમાં મૃત્યુઆંક વધીને 78 પર પહોંચ્યો છે. મુંબઈ-પુણે એક્સપ્રેસવે પર ભુસ્ખલન અને ઓડિશાના ભદ્રકમાં લાખો લોકો પૂરની અસરમાં છે. હવામાન વિભાગે આગામી દિવસોમાં પણ ભારે વરસાદની ચેતવણી જારી રાખી છે.

મુખ્ય ચૂંટણી કમિશનર (CEC) અને ચૂંટણી કમિશનરોની નિમણૂકમાં કેન્દ્ર સરકારની ભૂમિકા પર સુપ્રીમ કોર્ટે મહત્વપૂર્ણ ટિપ્પણી કરી છે. કોર્ટે કહ્યું કે, ચૂંટણી કમિશનર તટસ્થ અને સ્વતંત્ર હોવા જોઈએ, અને પસંદગી સમિતિમાં નિષ્પક્ષતા દેખાવી જોઈએ. 2023ના નિમણૂક કાયદા સામેની અરજીઓ પર સુનાવણી દરમિયાન, જસ્ટિસ દીપાંકર દત્તા અને જસ્ટિસ સતીશ ચંદ્ર શર્માની બેંચે આશ્ચર્ય વ્યક્ત કરતાં પૂછ્યું, "શું આજકાલ ન્યાયાધીશ જ ન્યાયાધીશોની પસંદગી કરે છે?" કોર્ટે રાજકારણીઓના ગુનાહિત ઇતિહાસ અને પસંદગી સમિતિમાં 2:1ની બહુમતી પર પણ ચિંતા વ્યક્ત કરી.

PM નરેન્દ્ર મોદીની ફેસબુક પોસ્ટ અસ્થાયી રૂપે દૂર થવાના મુદ્દે કેન્દ્ર સરકારે Metaના સિનિયર અધિકારીઓને આગામી 7 થી 10 દિવસમાં દિલ્હી ખાતે હાજર થવા સમન્સ પાઠવ્યું છે. ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રાલય (MeitY) માત્ર ટેકનિકલ ભૂલની સ્પષ્ટતા સ્વીકારવા તૈયાર નથી. સરકાર કંપની પાસેથી નીતિગત તથા ટેકનિકલ સ્તરે વિગતવાર ખુલાસો માંગી રહી છે અને ખાતરી કરવા માંગે છે કે ભવિષ્યમાં આવી ઘટનાઓ ફરી ન બને. Metaએ પ્રોટોકોલમાં ફેરફાર કરીને હાઈ-પ્રોફાઈલ એકાઉન્ટ્સ પર વધારાની દેખરેખ રાખવાનો નવો નિયમ અમલમાં મૂક્યો છે.

સંસદના ચોમાસુ સત્ર દરમિયાન રાજ્યસભામાં વિપક્ષના નેતા મલ્લિકાર્જુન ખડગેએ ગૃહમંત્રી અમિત શાહ પર આકરા પ્રહારો કર્યા. તેમણે ગૃહમાં અમિત શાહની ગેરહાજરી અને વિરોધીઓ પર થયેલી પોલીસ કાર્યવાહી પર તેમના મૌન પર પ્રશ્ન ઉઠાવ્યો. ખડગેએ કહ્યું કે, "શું કોઈએ ગૃહમંત્રીનું મોં બંધ કરી દીધું છે?" તેમણે તાજેતરના "ચલો સંસદ" કૂચ દરમિયાન વિરોધીઓ પર થયેલી કાર્યવાહી અને જંતર મંતર પર વિદ્યાર્થીઓ સામે બળપ્રયોગ જેવા મુદ્દાઓ પર ગૃહમંત્રીના જવાબદારીની માંગ કરી.

દેશભરમાં ચોખાના ભાવમાં સતત વધારો નોંધાઈ રહ્યો છે, જે ₹1,400ની ગુણ ₹1,800 સુધી પહોંચી ગઈ છે. આ ભાવવધારો માત્ર મોસમી નથી, પરંતુ ઉત્પાદનમાં ઘટાડો, પાડોશી રાજ્યોમાંથી ઓછા પુરવઠા, બાસમતી સિવાયના ચોખાની વધતી નિકાસ અને ખેતી તથા પરિવહન ખર્ચમાં થયેલા નોંધપાત્ર વધારા જેવા અનેક પરિબળો જવાબદાર છે. ખાસ કરીને તામિલનાડુ જેવા રાજ્યોમાં, જ્યાં સ્થાનિક ઉત્પાદન ઓછું છે અને અન્ય રાજ્યો પર નિર્ભરતા વધુ છે, ત્યાં અસર વધુ સ્પષ્ટ છે. અલ નીનો અને ક્લાઇમેટ ચેન્જ જેવા પરિબળો પણ ઉત્પાદનને અસર કરી રહ્યા છે.

ગ્લાસગો કોમનવેલ્થ ગેમ્સ 2026ની ભાલા ફેંક સ્પર્ધામાં ભારત માટે સારા સમાચાર સામે આવ્યા છે. સ્ટાર એથલેટ નીરજ ચોપરા (79.61 મીટર), રોહિત યાદવ અને યશ વીર સિંહે ક્વોલિફાઇંગ રાઉન્ડ પાર કરીને ફાઇનલમાં સ્થાન મેળવ્યું છે. 84 મીટરનો ક્વોલિફાઇંગ માર્ક કોઈ પણ ખેલાડી હાંસલ કરી શક્યો ન હોવાથી ટોચના 12 ખેલાડીઓને ફાઇનલમાં પ્રવેશ મળ્યો છે. ડિફેન્ડિંગ ચેમ્પિયન પાકિસ્તાનના અર્શદ નદીમ (78.63 મીટર) પણ 1 ઓગસ્ટે યોજાનારી મેડલ ઇવેન્ટમાં રમશે.