ભાજપના સાંસદ અનુરાગ ઠાકુરે લોકસભા અધ્યક્ષ ઓમ બિરલાને રાહુલ ગાંધી વિરુદ્ધ વિશેષાધિકાર ભંગની નોટિસ આપી. આરોપ છે કે રાહુલ ગાંધીએ ગૃહમંત્રી અમિત શાહ વિરુદ્ધ અસંસદીય ભાષાનો ઉપયોગ કર્યો. બુધવારે રાહુલ ગાંધીએ પેપર લીક સુધારા બિલ પર બોલતા શાહ પર ગંભીર આરોપો લગાવ્યા હતા, જેમાંથી કેટલાકને અધ્યક્ષે કાર્યવાહીમાંથી હટાવી દીધા. આ દરમિયાન, પેપર લીક સુધારા બિલ રાજ્યસભામાં પણ પસાર થયું. મનુસ્મૃતિ પર મલ્લિકાર્જુન ખડગેના નિવેદન બાદ ગૃહમાં હોબાળો થયો.

અમદાવાદ પ્લેનક્રેશ દુર્ઘટનાના 412 દિવસ બાદ સરકારે સંસદમાં ખુલાસો કર્યો કે બોઈંગ ડ્રીમલાઈનર પ્લેનની ફ્યુઅલ સ્વિચમાં કોઈ ખામી નથી. જોકે, પાયલટ સુમિત સભરવાલના પિતાની અરજી પર સુપ્રીમ કોર્ટમાં સુનાવણી થઈ. મંત્રીના સ્ટેટમેન્ટ અને AAIB રિપોર્ટ વચ્ચેની અલગ થિયરી, રેમ એર ટર્બાઈન અને ફાઇનલ રિપોર્ટમાં વિલંબના કારણો પર ચર્ચા થઈ. ઓક્ટોબરના પહેલા અઠવાડિયામાં રિપોર્ટ સોંપવાની શક્યતા છે.

દેશભરમાં 'રિઝર્વેશન હટાવો આંદોલન' (RHA) ને વેગ મળ્યો છે, જેની અસર હવે ગુજરાતમાં દેખાઈ રહી છે. પાટીદાર, ક્ષત્રિય અને બ્રાહ્મણ સમાજના આગેવાનો સમીક્ષા અને જરૂરિયાતમંદોને લાભ આપવાની હિમાયત કરે છે. બીજી તરફ, આદિવાસી અને ઠાકોર સમાજના નેતાઓ હાલની અનામત વ્યવસ્થા યથાવત રાખવાની માંગ કરી રહ્યા છે. ઠાકોર સમાજના નેતા બળદેવજી ઠાકોરે આ ઝુંબેશ RSS અને ભાજપના દોરીસંચારમાં ચાલતી હોવાનો આરોપ લગાવ્યો છે.

અમદાવાદમાં જેલ ડિપાર્ટમેન્ટ દ્વારા એક અત્યાધુનિક સ્પોર્ટ્સ ટ્રેનિંગ સેન્ટરનું નિર્માણ ચાલી રહ્યું છે. આ સેન્ટરમાં VIP રૂમ, ઓલિમ્પિક સ્વિમિંગ પુલ, વર્લ્ડ ક્લાસ સ્ટેડિયમ અને હાઇ સિક્યોરિટી સેલ જેવી અદ્યતન સુવિધાઓ હશે. 250 કરોડથી વધુના ખર્ચે તૈયાર થઈ રહેલું આ સંકુલ પોલીસ અને જેલ સિપાહીઓ માટે તાલીમનું મુખ્ય કેન્દ્ર બનશે. 60 એકર જમીન પર ત્રણ તબક્કામાં નિર્માણ પામી રહેલા આ પ્રોજેક્ટમાં વિશાળ પરેડ ગ્રાઉન્ડ, એથ્લેટિક્સ, ફૂટબોલ, બેડમિન્ટન, ટેબલ ટેનિસ કોર્ટ, જીમ્નેશિયમ અને હોસ્ટેલની સુવિધાઓ પણ ઉપલબ્ધ થશે.

નસવાડી સ્થિત સરકારી બી.એડ. કોલેજમાં ગુરુપૂર્ણિમાનો ઉત્સવ આનંદ અને ઉમંગભેર ઉજવાયો. કોલેજના આચાર્ય, અધ્યાપકો અને તાલીમાર્થીઓએ ગુરુ-શિષ્ય પરંપરાના મહત્વને દર્શાવતા કાર્યક્રમોમાં ભાગ લીધો. દીપ પ્રાગટ્ય અને ગુરુ વંદનાથી શરૂઆત થઈ, ત્યારબાદ તાલીમાર્થીઓએ ગુરુ મહિમા ગાન, પ્રાસંગિક પ્રવચનો અને સાંસ્કૃતિક કૃતિઓ રજૂ કરી. આચાર્યએ આધુનિક યુગમાં પણ ગુરુના અદ્વિતીય સ્થાન પર ભાર મૂક્યો અને વિદ્યાર્થીઓને પ્રોત્સાહન આપ્યું.

ડભોઇ પાસે ઢાલનગર વસાહતમાં ગટર લાઈન નાખવા માટે કરાયેલા બેદરકારીભર્યા ખોદકામને કારણે મુખ્ય માર્ગ સંપૂર્ણપણે બિસ્માર બન્યો છે. લગભગ 1 કિલોમીટર લાંબો રસ્તો ખરાબ થતાં ગ્રામજનો રોજીંદા કામકાજ માટે પણ હેરાન થઈ રહ્યા છે. 108 એમ્બ્યુલન્સ પણ આવતી નથી, જેના કારણે બીમાર કે સગર્ભા મહિલાઓને હોસ્પિટલ પહોંચાડવામાં જીવનું જોખમ ઊભું થયું છે. શાળાના બાળકો અને શિક્ષકો પણ વાહનો દૂર મૂકીને પગપાળા ચાલી રહ્યા છે. ચોમાસામાં કાદવ-કીચડને કારણે અકસ્માતોનું પ્રમાણ વધ્યું છે.

પ્રધાનમંત્રી ગ્રામ સડક યોજના (PMGSY) ફેઝ-4 હેઠળ છોટાઉદેપુરના કુકરદા ગામમાં માર્ગ સ્ટ્રક્ચરના નિર્માણ માટે SVNIT, સુરતની ટીમે સ્થળ નિરીક્ષણ કર્યું. આ નિરીક્ષણમાં ખોહરી ફળિયા, બોર ડાબરા ફળિયા અને વાકી કડવ ફળિયા તરફ જતા માર્ગો પર જરૂરી પુલ અને કલ્વર્ટ જેવા સ્ટ્રક્ચરની જરૂરિયાતોનું ટેકનિકલ મૂલ્યાંકન કરાયું. ભૌગોલિક સ્થિતિ અને વરસાદી પાણીના વહેણને ધ્યાનમાં રાખીને રૂપરેખા તૈયાર કરાશે. ત્યારબાદ ડ્રોઈંગ, Estimate, અને મંજૂરી પ્રક્રિયા પૂર્ણ થતાં માર્ગ નિર્માણ શરૂ થશે, જે ગ્રામજનોની વર્ષો જૂની સમસ્યા હલ કરશે.

બોડેલી તાલુકાના મોટા વાજપુર ગામમાં 4 વર્ષની બાળકી ભવ્યાને મોતને ઘાટ ઉતારનાર આદમખોર દીપડાને વન વિભાગે ગણતરીના કલાકોમાં જ સફળતાપૂર્વક પકડી પાડ્યો. આ ઘટના બાદ સ્થાનિક રહીશોએ મોટી રાહત અનુભવી. વનવિભાગની ટીમે ઘટના સ્થળ નજીક રાત્રિના સમયે પાંજરું ગોઠવી દીપડા પર સતત નજર રાખી હતી. દીપડો પકડાયા બાદ ગ્રામજનો મોટી સંખ્યામાં સ્થળ પર ઊમટ્યા હતા અને વનવિભાગે તેને વધુ કાર્યવાહી માટે જબુગામ રેસ્ક્યુ સેન્ટર ખાતે ખસેડ્યો.

ડભોઇ નગરપાલિકા દ્વારા બંગાળની ખાડીમાં થયેલા ડીપ ડિપ્રેશનને કારણે ભારે વરસાદની આગાહીના પગલે જર્જરિત અને ભયગ્રસ્ત મકાનોમાં રહેતા 40 મિલકત ધારકોને તાત્કાલિક મકાનો ખાલી કરવા નોટિસ પાઠવવામાં આવી છે. ચીફ ઓફિસર જયકિશન તડવી અને મહેશભાઈ પરમારની ટીમ દ્વારા શહેરના વિવિધ વિસ્તારોમાં આ નોટિસની કામગીરી હાથ ધરાઈ છે. આગાહી મુજબ ભારે વરસાદની સંભાવનાને ધ્યાનમાં રાખી, નગરપાલિકા દ્વારા યુદ્ધના ધોરણે ઇમરજન્સી પરિસ્થિતિને પહોંચી વળવા માટે તૈયારીઓ શરૂ કરવામાં આવી છે. લોકોને સાવચેત કરવા રિક્ષા દ્વારા પ્રચાર પણ શરૂ કરાયો છે.

મહારાષ્ટ્રના રાજકારણમાં શિવસેના પક્ષનું નામ, ધનુષ્ય-તીર ચિહન અને બળવાખોર ધારાસભ્યોની અયોગ્યતા અંગે સુપ્રીમ કોર્ટમાં મહત્ત્વપૂર્ણ સુનાવણી યોજાઈ. ઠાકરે જૂથના વકીલ કપિલ સિબ્બલે દલીલ કરી કે એકનાથ શિંદેને 2018માં ઉદ્ધવ ઠાકરે દ્વારા જ વિધાનસભા પક્ષના નેતા નિયુક્ત કરાયા હતા. ચૂંટણી પંચે માત્ર ધારાસભ્યોની સંખ્યા જોઈને શિંદે જૂથને પક્ષ અને પ્રતીક આપ્યું, જે લોકશાહી માટે ખતરો છે. કોર્ટે બંને પક્ષોને દસ્તાવેજો રજૂ કરવા નિર્દેશ આપી સુનાવણી 4 ઓગસ્ટે નક્કી કરી.

ડભોઇના સરિતા રેલવે ઓવરબ્રિજ પર બે કાર વચ્ચે સામસામે અકસ્માત થતાં એક તરફનો બ્રિજ વાહનવ્યવહાર માટે બંધ કરાયો છે. સમારકામ હેઠળ હોવાથી એક જ બ્રિજ પર ટ્રાફ્કિ ડાયવર્ટ કરાયો હતો. આ અકસ્માતને કારણે કલાકો સુધી ભારે ટ્રાફ્કિ જામ સર્જાયો હતો, જેમાં બે લોકોને સામાન્ય ઈજાઓ પહોંચી હતી. આ મહત્વપૂર્ણ માર્ગ સ્ટેચ્યુ ઓફ યુનિટી અને અનેક પ્રવાસન સ્થળો તરફ દોરી જાય છે, જેથી પ્રવાસીઓને પણ હાલાકી પડી રહી છે.

બોડેલી રેલવે ફાટકમાં સર્જાયેલી ટેક્નિકલ ખામીને કારણે ગુરુવારે બંને તરફ ટ્રાફિક જામ થયો હતો. ટ્રેન પસાર થયા બાદ એક તરફનો ગેટ ઊંચો ન થતાં વાહનોની લાંબી કતારો લાગી હતી, જેનાથી વાહનચાલકોને ભારે હાલાકી પડી હતી. રેલવે કર્મચારીઓ તાત્કાલિક ઘટનાસ્થળે પહોંચી ગયા હતા અને જાતે ગેટ ઊંચો કરીને ફાટક ખોલ્યો હતો. સમયસર ખામી દૂર થતાં વાહન વ્યવહાર પુનઃ શરૂ થયો હતો અને સંભવિત અકસ્માત ટળી ગયો હતો.

મહીસાગર જિલ્લાના કોઠંબાને નવીન તાલુકા જાહેર કરાયા બાદ અહીં લોકોની અવરજવર વધી છે, જેના પરિણામે કોઠંબા પોલીસ સ્ટેશન ચોકડીથી અજયમાતા મંદિર સુધી ટ્રાફિકની ગંભીર સમસ્યા સર્જાઈ છે. સવારે 10 થી સાંજે 6 વાગ્યા સુધી વાહનોની લાંબી કતારો લાગે છે. સાંકડી જગ્યા અને ગેરકાયદેસર પાર્કિંગને કારણે પરિસ્થિતિ વધુ વણસી રહી છે. શાળા, કોલેજ અને બજારના સમયે વિદ્યાર્થીઓ, વૃદ્ધો અને મહિલાઓને ભારે હાલાકી પડે છે. લોકો ટ્રાફિક નિયમન માટે પોલીસ કર્મચારીઓની કાયમી નિમણૂક અને નો-પાર્કિંગ ઝોન જાહેર કરવાની માંગ કરી રહ્યા છે.

ગોધરા શહેરમાં પવિત્ર ગૌરીવ્રત પર્વ નિમિતે ગોધરા શહેરના મધ્યમાં આવેલા અટલ ઉદ્યાન ખાતે આ વર્ષે નગર પાલિકાના સત્તાધીશો પ્રમુખ, ઉપપ્રમુખ, કારોબારી અધ્યક્ષ તેમજ તમામ સભ્યો દ્વારા વિશેષ કાર્યક્રમનું આયોજન કરાયું હતું. જેમાં શહેરની કુંવારિકાઓ બાળાઓ અને તેમના પરિવારજનોએે લાઈવ સિંગિંગ, રાસ અને ગરબા, વિવિધ રમતો અને સ્પર્ધાઓમાં ઉત્સાહભેર ભાગ લીધો હતો. વિજેતાઓ માટે આકર્ષક ઇનામો, નાની બાળાઓ માટે અલ્પાહારની વ્યવસ્થા કરાઈ હતી. જાગરણના દિવસે LED સાથે વિશેષ કાર્યક્રમ યોજાનાર છે.

કાલોલ તાલુકાની ગોકળપુરા પ્રાથમિક શાળા ખાતે ગૌરી વ્રતના અવસરે કન્યાઓ માટે વિશેષ કાર્યક્રમ યોજાયો હતો. સેવા ગ્રુપ, સન ફર્મા, હાલોલ તરફથી મયંક ભગત તથા પંચમહાલ જિલ્લા મહિલા મોરચાના પ્રમુખ શેફલીબેન ઉપાધ્યાયના સહયોગથી બાળાઓને શ્રુંગાર કિટનું વિતરણ કરાયું હતું.

દેશના વિકાસને અવરોધવા દુશ્મનો ‘ગુપ્ત યુદ્ધ’ ચલાવી રહ્યા છે, જેમાં ડ્રગ્સ મુખ્ય શસ્ત્ર છે. યુવા પેઢીને નિશાન બનાવી દેશને અંદરથી નબળો પાડવાના આ ષડયંત્ર સામે ‘ડ્રગ્સ ફ્રી મુંબઈ’ અભિયાન શરૂ કરાયું છે. મુખ્યમંત્રી દેવેન્દ્ર ફડણવીસે વિદ્યાર્થીઓ, શિક્ષકો અને નાગરિકોને આ સામૂહિક લડાઈમાં જોડાવા અપીલ કરી. આ માટે સમગ્ર ‘ઇકોસિસ્ટમ’નો નાશ કરવો જરૂરી છે. પોલીસ, શિક્ષણ, આરોગ્ય જેવા વિભાગો સાથે મળીને કામ કરશે. ડ્રગ્સ વેચનારા અને માસ્ટરમાઇન્ડ સામે કડક કાર્યવાહી થશે. યુવાનોના ‘ના’ કહેવાના સંકલ્પથી ‘ડ્રગ્સ ફ્રી મુંબઈ’ શક્ય બનશે.

કાલોલના શ્રી સિધ્ધનાથ એજ્યુકેશન ટ્રસ્ટ સંચાલિત શ્રી સરસ્વતી વિદ્યામંદિર ખાતે ગૌરીવ્રત નિમિતે ડેરોલ સ્ટેશન રોટરી ક્લબ દ્વારા ડ્રાયફ્રુટ અને એજ્યુકેશન કીટનું વિતરણ કુમારિકાઓને કરાયું હતું. આ પ્રસંગે ડેરોલ સ્ટેશન રોટરી ક્લબના પ્રમુખ ચિરાગ વ્યાસ, મંત્રી દક્ષેશ બ્રહ્મભટ્ટ અને અન્ય સભ્યો ઉપસ્થિત રહ્યા હતા. ગૌરી વ્રત નિમિતે મહેંદી હરીફાઈ અને કેશ ગૂંથણ જેવી વિવિધ સ્પર્ધાઓ પણ યોજાઈ હતી. આચાર્ય રિતેશભાઈ પંડયાએ આભાર વિધી કરી હતી.

ગોધરામાં સ્વસ્તિક ચેરીટેબલ ટ્રસ્ટ સંચાલિત સાંદિપની વિદ્યામંદિર અને નર્સિંગ કોલેજમાં ગુરુપૂર્ણિમાની ભવ્ય ઉજવણી કરવામાં આવી. ટ્રસ્ટ પ્રમુખ દિલીપભાઈ પટેલના માર્ગદર્શન હેઠળ, સરસ્વતી પૂજન, રંગોળી અને વકતૃત્વ સ્પર્ધા યોજાઈ. આ પ્રસંગે, સેવા નિવૃત્ત થઈ રહેલા આચાર્ય ભરતભાઈ ઉપાધ્યાયને શાલ, શ્રીફળ અને મોમેન્ટો આપી ભાવભીની વિદાય આપવામાં આવી. આચાર્ય વિપુલભાઈ શાહે આભારવિધિ કરી.

ગોધરામાં ગુરુ પૂર્ણિમા નિમિત્તે આદિવાસી વિકાસ ફઉન્ડેશન ગોધરા દ્વારા દયાળ ગામની પ્રાથમિક શાળા ખાતે બાળકોને નોટબૂક વિતરણ કરાયું હતું. આ પ્રસંગે આદિવાસી વિકાસ ફઉન્ડેશનના સભ્યો એમ.એમ. પારગી, દેવજીભાઈ ડામોર, સુરેશભાઈ કલારા, તુષાર ભગોરાએ હાજર રહી બાળકોને નોટબુક, પેન, પેન્સિલ અને કેળાંના પ્રસાદનું વિતરણ કર્યું હતું.

પાલનપુર શહેરમાં 48 વખત પોતાના મતાધિકારનો ઉપયોગ કરનાર 102 વર્ષીય મહેરૂનીશા મસીઉદ્દીન કાદરી (મેરૂમા) નું ટૂંકી માંદગી બાદ નિધન થયું છે. તેઓ મૂળ સાબરકાંઠા જિલ્લાના પ્રાંતિજ તાલુકાના ઓરાણ ગામના વતની હતા અને વ્યવસાય અર્થે પાલનપુરમાં સ્થાયી થયા હતા. તેમણે ટાયર પંચરની દુકાન શરૂ કરીને હિન્દુ પરિવારો સાથે એક મકાનમાં રહી કોમી એકતાનું ઉત્તમ ઉદાહરણ પૂરું પાડ્યું હતું. તેમના પુત્ર સિતાબભાઈ કાદરીએ જણાવ્યું કે, તેમણે નગરપાલિકા, વિધાનસભા અને લોકસભા સહિત અનેક ચૂંટણીઓમાં મતદાન કર્યું હતું.

રાજસીતાપુરની માસુમ સ્કૂલના યુ.કે.જી.ના વિદ્યાર્થી દિવ્યરાજસિંહના અકસ્માતે મૃત્યુ બાદ શાળાને કારણદર્શક નોટિસ ફટકારાઈ છે. RTO વિભાગને બસના PUC અને ફિટનેસ સર્ટિ. સહિતના ડોક્યુમેન્ટ તપાસવા જણાવાયું છે. શાળાની બસનું તળિયું તૂટી જતા બાળક રોડ પર પટકાયું હતું, જેમાં શાળાની ગંભીર બેદરકારી સામે આવી છે. શાળા પાસે કેટલી બસ છે, GPS અને CCTV છે કે કેમ, તથા વીમા અંગેના આધાર રજૂ કરવા જણાવાયું છે. RTO રિપોર્ટ બાદ સમગ્ર વિગતો ગાંધીનગર મોકલવામાં આવશે.

દેશની સીમાઓની સુરક્ષા અને આપદાઓ વખતે રાષ્ટ્રસેવા માટે તત્પર રહેતા સશસ્ત્ર દળોના સેવારત તેમજ પૂર્વ સૈનિકો અને તેમના પરિવારોના કલ્યાણ અર્થે કેશોદ મંડપ, ઈલેક્ટ્રીક, સાઉન્ડ એન્ડ ફ્લાવર એસોસિએશન દ્વારા રૂ. 1,51,551/- નો ચેક સશસ્ત્ર સેના ધ્વજદિન ભંડોળમાં અર્પણ કરવામાં આવ્યો. જિલ્લા સૈનિક કલ્યાણ અધિકારીએ આપેલા અનુદાન બદલ આભાર વ્યક્ત કરી નાગરિકો અને સંસ્થાઓને યથાશક્તિ આર્થિક સહયોગ આપવા અપીલ કરી છે.

ગુજરાત પ્રાકૃતિક કૃષિ વિકાસ બોર્ડ દ્વારા રાણાવાવ તાલુકાની મહિલા ખેડૂતોને પ્રાકૃતિક ખેતી અંગે તાલીમ આપવામાં આવી. જેમાં બીજામૃત, જીવામૃત, ઘન જીવામૃત, આચ્છાદન અને મિશ્ર પાક પદ્ધતિ વિશે જાણકારી અપાઈ. તજજ્ઞોએ અગ્નિઅસ્ત્ર, બ્રહ્માસ્ત્ર, દશપર્ણ અર્ક જેવા પ્રાકૃતિક અસ્ત્રોના ઉપયોગ, વિવિધ પાકોમાં પ્રાકૃતિક ખેતી અપનાવવાની રીત સમજાવી. ડી.એ.પી. જેવા રાસાયણિક ખાતરોનો ઉપયોગ ઘટાડી જીવામૃત અને ઘન જીવામૃતનો ઉપયોગ વધારવા પ્રોત્સાહન અપાયું.

સાંદીપનિ વિદ્યાનિકેતનમાં ગુરુપૂર્ણિમા નિમિત્તે 15મો ગુરુ ગૌરવ એવોર્ડ સમારોહ યોજાયો, જેમાં શિક્ષણ ક્ષેત્રે નોંધપાત્ર યોગદાન આપનારા 5 મહાનુભાવો અને ગુજરાતના 35 જિલ્લાઓમાંથી પસંદ કરાયેલા શ્રેષ્ઠ શિક્ષકો તથા આચાર્યોનું ભાવપૂજન કરવામાં આવ્યું. કાર્યક્રમનો આરંભ દીપ પ્રાગટ્ય અને વૈદિક સૂક્ત પાઠથી થયો. આ પ્રસંગે પદ્મશ્રી ડૉ. રતિલાલ બોરીસાગરને લાઈફ ટાઈમ એચીવમેન્ટ એવોર્ડ સહિત વિવિધ પુરસ્કારો અર્પણ કરાયા. આર્ટિફિશિયલ ઈન્ટેલિજન્સના યુગમાં ગુરુનું કાર્ય ચારિત્ર્ય નિર્માણ અને લક્ષ્ય નિર્ધારણમાં મહત્વપૂર્ણ ભૂમિકા ભજવે છે.

પોરબંદરથી માધવપુર હાઈવે પર કમલાબાગથી છાંયા ચોકી સુધીની રોડ પર સ્પીડબેકર અને ઝેબ્રા ક્રોસિંગ નથી. આ મુખ્ય માર્ગ પર સરકારી એમ.કે. ગાંધી ઈંગ્લીશ મીડિયમ સ્કૂલ આવેલી છે, જ્યાં 1000થી વધુ વિદ્યાર્થીઓ અભ્યાસ કરે છે. સતત વાહનોના ટ્રાફિક અને સ્કૂલના સમય દરમિયાન ધસારાને કારણે અકસ્માતનો ભય રહે છે. સુપ્રીમ કોર્ટ અને IRC ગાઈડલાઈનનો ખુલ્લેઆમ ભંગ થઈ રહ્યો છે, છતાં તંત્ર દ્વારા કોઈ કાર્યવાહી કરવામાં આવી રહી નથી. હેવી વાહનો અને ઓવરસ્પીડિંગથી બાળકોની સુરક્ષા જોખમાઈ રહી છે.

મોડાસા-રાજેન્દ્રનગર રોડ પર ઇકો અને ટ્રક વચ્ચે થયેલા ગમખ્વાર અકસ્માતમાં ઇકો ચાલક યુવાનના મોત બાદ સ્થાનિકોમાં ભારે રોષ ભભૂક્યો હતો. છેલ્લા ત્રણ વર્ષથી અધૂરા રહેલા રોડની કામગીરી અને અકસ્માતોની ઘટનાઓથી ત્રસ્ત ગ્રામજનો અને આગેવાનોએ મોડાસા-રાજેન્દ્રનગર હાઇવે પર ચક્કાજામ કર્યો હતો. તેમણે માર્ગ અને મકાન વિભાગ સામે સૂત્રોચ્ચાર કરી તાત્કાલિક કામગીરી પૂર્ણ કરવાની માંગ કરી હતી. આ માર્ગ પર છેલ્લા છ મહિનામાં 17 અકસ્માત થયા છે, જેમાં 5 લોકોએ જીવ ગુમાવ્યા છે.

મોરબીના વાવડી રોડ પર મનપાની સફાઈ કામગીરી નબળી હોવાથી ગંદકીનું સામ્રાજ્ય સર્જાયું છે. હજારો વાહનો અને મધ્યમવર્ગીય સોસાયટીઓના કેન્દ્ર સમાન આ રોડની બંને બાજુએ કચરાના વિશાળ ઢગલા ખડકાયા છે. અગાઉ મૂકેલી કચરા ટોપલીઓ પણ ભંગાર હાલતમાં છે અને કચરો રોડ પર વેરવિખેર પડ્યો છે. નાલામાં પણ કચરો વધુ પ્રમાણમાં જોવા મળે છે. ચોમાસાને કારણે રોગચાળો ફાટી નીકળવાનું જોખમ છે, છતાં મનપા તંત્રની બેદરકારીથી સ્થાનિકોમાં ભારે રોષ છે.

અમદાવાદ શહેરમાં આગામી બે દિવસ ભારેથી અતિભારે વરસાદની આગાહીને પગલે કોર્પોરેશન દ્વારા તંત્રને હાઈ એલર્ટ પર મૂકવામાં આવ્યું છે. મ્યુનિ. કમિશનર બંછાનિધિ પાનીએ જણાવ્યું કે અમદાવાદ ડીપ ડિપ્રેશનનું કેન્દ્ર બની શકે છે, તેથી તમામ વિભાગોને પૂર્વ તૈયારીઓના આદેશ અપાયા છે. નાગરિકોને જરૂરી ન હોય તો બહાર ન નીકળવાની અપીલ કરાઈ છે. 40થી 50 કિમી પ્રતિ કલાકની ઝડપે પવન ફૂંકાવાની શક્યતા છે. સાબરમતી રિવરફ્રન્ટનું પાણી ઘટાડી લેવલ 123 ફૂટ સુધી લવાયું છે અને 5 તળાવો ઇન્ટરલિંકિંગ દ્વારા ખાલી કરવાનું શરૂ કરાયું છે.

જૂનાગઢના શશીકુંજ તાલીમ કેન્દ્રમાં જિલ્લા અને તાલુકા પંચાયતના નવનિયુક્ત પદાધિકારીઓ તથા સભ્યો માટે એક દિવસીય ક્ષમતા નિર્માણ તાલીમ યોજાઈ. સામાજિક ન્યાય મંત્રી ડો. પ્રદ્યુમન વાજાએ જણાવ્યું કે, સત્તા સેવાનું સાધન છે, ભોગવવાનું નહીં. તેમણે વિકસિત ભારતના લક્ષ્ય હેઠળ ગામડાઓના વિકાસ, સ્વચ્છતા અને જનતાના ઉપયોગી કાર્યો પર ભાર મૂક્યો. ઉર્જા મંત્રી કૌશિક વેકરીયાએ ગામડા, જિલ્લા અને રાજ્યના વિકાસથી દેશની ઉન્નતિની વાત કરી. નવા અધિકારીઓને વિદ્યાર્થી બની કામ કરવા અને પડતર પ્રશ્નોના નિરાકરણ માટે લોકદરબાર યોજવાની પણ ટકોર કરવામાં આવી.

દેવભૂમિ દ્વારકા જિલ્લામાં નેશનલ હાઇવે ઓથોરીટી દ્વારા પોલીસ અને વહીવટી તંત્ર સાથે મળીને સરકારી જમીન પર થયેલા ગેરકાયદે દબાણો અને અનઅધિકૃત પ્રવેશ માર્ગો સામે એક સંયુક્ત મેગા ડ્રાઇવ ચલાવવામાં આવી. આ ત્રણ દિવસીય વિશેષ ઝુંબેશ દરમિયાન, નાના-મોટા કુલ 65 દબાણો અને 42 અનઅધિકૃત ગેપ દૂર કરવામાં આવ્યા. આ કાર્યવાહીનો મુખ્ય ઉદ્દેશ્ય માર્ગ સુરક્ષાને મજબૂત બનાવવાનો છે. આ અભિયાન બાદ, હાઇવે કિનારે આવેલા વ્યાવસાયિક એકમોના સંચાલકોમાં જરૂરી મંજૂરીઓ મેળવવા માટે દોડધામ શરૂ થઈ છે.