ભારતીય ક્રિકેટર વિરાટ કોહલી અને બોલિવૂડ અભિનેત્રી અનુષ્કા શર્મા IPL 2026માં રોયલ ચેલેન્જર્સ બેંગલુરુ (RCB)ની જીત બાદ વૃંદાવન પહોંચ્યા. તેમણે રાધા કેલી કુંજ આશ્રમમાં પૂજ્ય પ્રેમાનંદ મહારાજ સાથે મુલાકાત કરી આધ્યાત્મિક માર્ગદર્શન મેળવ્યું. બંનેએ ઉઘાડા પગે, તુલસીની માળા પહેરીને અને માથે તિલક લગાવી સાદગીપૂર્ણ દર્શન કર્યા. આ સ્ટાર કપલનો ભક્તિભાવ અને તેમની સાદગીભરી સ્ટાઈલ સોશિયલ મીડિયા પર ખૂબ વાયરલ થઈ રહી છે.

ધીરેન્દ્ર શાસ્ત્રી, બાબા બાગેશ્વર ધામ, રાજકોટમાં 'સનાતન સેતુ હનુમાન કથા' માટે આવી રહ્યા છે. સામાજિક આગેવાન પરસોત્તમ પીપળીયાએ ચમત્કાર અને તાંત્રિક વિદ્યાના દાવાઓ સામે સવાલો ઉઠાવ્યા છે અને પોતાના પર આવા પ્રયોગો કરવાનો પડકાર ફેંક્યો છે. આ નિવેદન બાબતે આયોજકોએ બાબા બાગેશ્વરનું ધ્યાન દોર્યું છે, જેના જવાબમાં ધીરેન્દ્ર શાસ્ત્રીએ પડકાર ફેંકનારાઓને પોતાના દરબારમાં આવવા આમંત્રણ આપ્યું છે. આયોજકો હિન્દુ સમાજને સંગઠીત કરવાની નેમ સાથે આયોજન કરી રહ્યા છે.

વડોદરાના તીર્થક્ષેત્ર ચાંદોદ ખાતે વિશ્વ કલ્યાણ હેતુ શ્રી કાશી વિશ્વનાથ મહાદેવ મંદિરના પરિસરમાં, ભારતના 8 જેટલા મુર્ધન્ય ઘનપાઠી બ્રાહ્મણોની પ્રેરક ઉપસ્થિતિમાં મંત્ર જાગરણ કાર્યક્રમ યોજાયો હતો. જેનું મુખ્ય આકર્ષણ 8 વિદ્વાન ઘનપાઠી બ્રાહ્મણમાં પૂ. સોમેશ જોશી (નાગપુર), પૂ. નીરજ ઝા (સુરત), પૂ. ઋષભ શાસ્ત્રી (ઉજ્જૈન), પૂ. ધિવ્યેશ જોશી (સુરત), કરણ રાવલ (મરોલી), કિરણ પાઠક, દેવવ્રત રેખે, વિપુલ શર્માના માર્ગદર્શનમાં અન્ય વિદ્વાનો જોડાયા હતા.

પ્રતિદિન જાગૃતિના અભાવે યુવાનો વ્યસન તરફ્ ધકેલાઈ રહ્યા છે ત્યારે આવા નવયુવકોને સાચો માર્ગ બતાવવા ગાયત્રી પરિવાર દ્વારા ગોધરા શહેરના ભૂરાવાવ સ્થિત હંગામી બસ સ્ટેન્ડ ખાતે વિશ્વ તમાકુ નિષેધ દિવસની ઉજવણી કરાઈ હતી. જે દરમિયાન ગાયત્રી પરિવારના પરિજનો દ્વારા મુસાફ્રોને પુસ્તિકા વિતરણ કરાઈ હતી. સૂત્રોચાર સાથે બસ સ્ટેન્ડમાં રેલી કાઢી લોકોને તમાકુ- ગુટખા ન ખાવા માટે જાગૃત કરાયા હતા, કાર્યક્રમમાં પરિજનો, કોમર્સ કોલેજના પ્રોફેસર, વિવિધ ડોક્ટર્સ સહિત લોકો જોડાયા હતા.

ઝઘડિયા તાલુકાના અછાલીયા ગામમાં અધિક જેઠ માસના પ્રારંભ સાથે રામજી મંદિરમાં ધાર્મિક કાર્યક્રમોનો અનેરો માહોલ સર્જાયો છે. ભાવિકજનો પુરુષોત્તમ મહાત્મ્ય કથાનું શ્રાવણ કરી રહ્યા છે, સાથે ભજન-કીર્તન, આરતી અને ધૂનમાં ઉત્સાહભેર જોડાઈ રહ્યા છે. ખાસ કરીને મહિલા મંડળ દ્વારા ભક્તિમય ભજનોથી મંદિર પરિસર ગુંજી ઉઠે છે. અનેક ભાવિકો નર્મદા નદીમાં સ્નાન કરી ધર્મલાભ મેળવી રહ્યા છે. આયોજિત વિધિઓ, સત્સંગ અને કથાથી ગામમાં આધ્યાત્મિક ચેતના મજબૂત બની છે.

મદ્રાસ હાઈકોર્ટ દ્વારા મંદિરોમાં ‘VIP દર્શન પ્રથા’ને ભેદભાવપૂર્ણ ગણાવ્યા બાદ ગુજરાતમાં પણ આ મુદ્દો ચર્ચામાં છે. અનેક આસ્થાળુઓ સવાલ ઉઠાવી રહ્યા છે કે ગુજરાતના ધર્મસ્થાનકોમાં પણ મહાનુભાવોને દર્શનમાં અગ્રતા શા માટે? ચેન્નાઈમાં પદાધિકારીએ આ પ્રથાને પડકારી છે. ગુજરાતનાં પ્રસિદ્ધ મંદિરોમાં અધિકારીઓ અને શાસક પક્ષના નેતાઓને સામાન્ય દર્શનાર્થીઓની કતારને બાયપાસ કરીને ઈશ્વર સન્મુખ થવાની પ્રાયોરિટી અટકાવવા કાનૂની પગલાંની જરૂરિયાત જનમત પ્રવર્તી રહ્યો છે.

પાટણના અનાવાડામાં પાટીદાર પરિવાર દ્વારા આયોજિત દેવી ભાગવત અને ભાગવત કથા અંતર્ગત કૃષ્ણ જન્મોત્સવની ભવ્ય ઉજવણી થઈ. અધિક માસની પૂનમના પવિત્ર અવસરે શ્રદ્ધાળુઓને ભગવાનનું પારણું ઝુલાવવાનો અને વિશેષ મહાઆરતીનો લાભ મળ્યો. અનાવાડા અને આસપાસના ગામોમાંથી મોટી સંખ્યામાં પાટીદાર સમાજના લોકો ઉપસ્થિત રહ્યા હતા. 'નંદઘેર આનંદ ભયો'ના નાદ સાથે સમગ્ર કથા મંડપ ગુંજી ઉઠ્યો હતો. આ ઉત્સવમાં શ્રદ્ધાળુઓએ ઉત્સાહભેર ભાગ લીધો હતો.

વેરાવળના જલારામ મંદિરે 251 કિલો કેરીનો 'મનોરથ ઉત્સવ' ધામધૂમથી ઉજવાયો. ભાવિકોએ પૂજ્ય જલારામ બાપાના સાનિધ્યમાં ભક્તિભાવપૂર્વક ભાગ લીધો. 251 કિલો કેરીઓથી ગર્ભગૃહને સજાવાયું, જે દર્શન માટે ખૂબ જ આકર્ષક હતું. કાર્યક્રમમાં સત્સંગ, ભજન-કીર્તન, રાસ-ગરબાની રમઝટ અને જલારામ બાપાની મહાઆરતી યોજાઈ. અંતે, ઉપસ્થિત તમામ શ્રદ્ધાળુઓ માટે ભવ્ય મહાપ્રસાદનું આયોજન કરાયું. આ ઉત્સવ વેરાવળના ધાર્મિક કાર્યક્રમોમાં એક યાદગાર પ્રસંગ બની રહ્યો.

ધરમપુર BAPS સ્વામિનારાયણ મંદિરમાં ચતુર્થ પાટોત્સવ નિમિત્તે 'ઉત્સવ ત્રિવેણી'નું ભવ્ય આયોજન થયું. આ મહોત્સવમાં ચતુર્થ પાટોત્સવ, પૂનમ સભા અને રવિસભાનો ત્રિવેણી સંગમ સર્જાયો. મહાપૂજા અને ઠાકોરજી સમક્ષ દિવ્ય અન્નકૂટ ધરાવીને આરતી ઉતારવામાં આવી. ટેક્નોલોજીના અતિરેક સામે જાગૃતિ ફેલાવતો યુવાનો દ્વારા રજૂ કરાયેલો 'પિંજર' સંવાદ ખાસ આકર્ષણ બન્યો. આ સંવાદે ડિજિટલ યુગમાં મોબાઇલ અને સોશિયલ મીડિયાના સકારાત્મક ઉપયોગનો સંદેશ આપ્યો. તીથલ મંદિરના કોઠારી પૂજ્ય વિવેકસ્વરૂપ સ્વામીએ પ્રેરણાદાયી પ્રવચન કર્યું.

જૂનાગઢમાં પવિત્ર પુરુષોત્તમ માસ નિમિત્તે ચારેકોર ભક્તિમય માહોલ છે. આ અવસરે, શહેરના દામોદરકુંડ સ્થિત સુપ્રસિદ્ધ રાધાદામોદરજી મંદિરે ભવ્ય અને અલૌકિક છપ્પન ભોગ મનોરથનું આયોજન થયું. રાધાદામોદરજી ચેરીટેબલ ટ્રસ્ટ દ્વારા આયોજિત આ દિવ્ય દર્શન સાંજે 06:15 વાગ્યે ભક્તો માટે ખુલ્લા મુકવામાં આવ્યા હતા. મોટી સંખ્યામાં ભક્તજનોએ પ્રભુ સમક્ષ ધરાવાયેલા છપ્પન ભોગ અને દિવ્ય શણગારના દર્શનનો લ્હાવો લીધો અને ધન્યતા અનુભવી.

સુરેન્દ્રનગર જિલ્લાના સુપ્રસિદ્ધ યાત્રાધામ ચોટીલામાં અધિક માસની મોટી પૂનમના પવિત્ર દિવસે માતા ચંડી ચામુંડાના દર્શનાર્થે રાજ્યભરમાંથી હજારો માઈભક્તો ઉમટી પડ્યા હતા. વહેલી સવારથી જ ડુંગર પર ભાવિકોની લાંબી કતારો જોવા મળી હતી, જ્યાં માતાજીને વિશેષ શણગાર અને અન્નકુટ ધરાવવામાં આવ્યો હતો. ઉનાળુ વેકેશન, અધિક માસની પૂનમ અને રવિવારના સંયોગે ચોટીલા નગર અને હાઈવે પર વાહનોના થપ્પા લાગી ટ્રાફિક જામ સર્જાયો હતો, જેના કારણે વાહનચાલકોને હાલાકી વેઠવી પડી હતી.

કોડીનારના સ્વામિનારાયણ મંદિરમાં અધિક માસ નિમિત્તે કેરી મનોરથ ઉત્સવ અને સંગીતમય સુંદરકાંડ પાઠનું આયોજન થયું. આ ધાર્મિક મહોત્સવમાં કોડીનાર અને આસપાસના વિસ્તારોમાંથી મોટી સંખ્યામાં હરિભક્તોએ ભાગ લીધો. રાત્રે સામૂહિક સુંદરકાંડ પાઠ યોજાયો, જેમાં ભક્તિભાવનો માહોલ છવાયો. મધ્યરાત્રિએ ઠાકોરજીની મહાઆરતી બાદ કેરીના રસરૂપ પ્રસાદનું વિતરણ કરાયું. આ ઉત્સવ આધ્યાત્મિકતા અને ભક્તિમય વાતાવરણથી પરિપૂર્ણ રહ્યો.

અધિક માસની પૂર્ણિમાના પવિત્ર દિવસે દ્વારકામાં ભક્તોનો ભારે મેળાવડો જોવા મળ્યો હતો. વહેલી સવારથી જ ગોમતી નદીમાં પવિત્ર સ્નાન કરીને પુણ્ય કમાવવા માટે હજારો ભાવિકો ઉમટી પડ્યા હતા. ઘણા ભક્તો તો મધ્યરાત્રિથી જ લાઇનમાં ઉભા રહી ગયા હતા. ત્યારબાદ, તેઓએ જગતમંદિર પહોંચીને કાળિયા ઠાકોરજીના દિવ્ય દર્શન કર્યા હતા અને ભાવવિભોર થયા હતા. આ અવસરે દ્વારકામાં એક અનોખો જ ઉત્સાહ જોવા મળ્યો હતો.

રાજકોટ સ્વામિનારાયણ ગુરુકુલ સંસ્થાન દ્વારા 1100 કિલો કેરીનો આમ્રકૂટ ઉત્સવ યોજાયો, જેમાં ગુરુ મહારાજ દેવકૃષ્ણદાસજી સ્વામીએ આરતી કરી કેરી ભગવાનને અર્પણ કરી. આ કેરીઓ શહેરની વિવિધ બાંધકામ સાઈટ પર કામ કરતા શ્રમિકોમાં વિતરણ કરવામાં આવી. ઉપરાંત, ભૂતપૂર્વ વિદ્યાર્થીઓ દ્વારા આર્થિક રીતે નબળા બાળકોને School bag, ચોપડાઓ અને stationery kit નું વિતરણ કરવામાં આવશે. આયોજન અષાઢી બીજના દિવસે થશે.

પોરબંદરના સ્વસ્તિક ગ્રુપ દ્વારા આયોજિત શ્રીમદ બાળ ભાગવત સપ્તાહ જ્ઞાનયજ્ઞમાં શ્રીકૃષ્ણ જન્મોત્સવ અને નંદ મહોત્સવની ભવ્ય ઉજવણી થઈ. 81 બાળકોના યજમાનપદે યોજાયેલા આ કાર્યક્રમના પાંચમા દિવસે, બાળકોએ સૌપ્રથમ વામનજી જન્મોત્સવ, ત્યારબાદ ભગવાન શ્રીરામનો જન્મોત્સવ ઉજવ્યો. અંતે, બાળ કલાકારોએ શ્રીકૃષ્ણ, વાસુદેવ, દેવકી, યશોદા મૈયા અને બલરામ જેવા પાત્રો ભજવી શ્રીકૃષ્ણ જન્મોત્સવની ઉજવણી કરી. 150 થી વધુ બાળકોએ વિવિધ વેશભૂષા ધારણ કરી આપણા પૌરાણિક પાત્રોનો સુંદર પરિચય આપ્યો.

ધ્રાંગધ્રા ખાતે જૈન એલર્ટ ગ્રુપ દ્વારા 'અનુકંપા દાન – અનુકંપા ભક્તિ' કાર્યક્રમમાં આરાધના, માનવ સેવા અને જીવદયાનો અદ્ભુત ત્રિવેણી સંગમ સર્જાયો. આ કાર્યક્રમમાં 500 થી વધુ શ્રમિક ભાઈ-બહેનોએ કેરીના રસ સાથે અનલિમિટેડ ભોજનનો લાભ લીધો. સાથે જ, 189 આયંબિલ તપના આરાધકોએ રેકોર્ડબ્રેક સંખ્યામાં ભાગ લઈને જૈન શાસનની પ્રભાવના કરી. મૂળી મહાજન પાંજરાપોળની ગાયો માટે ₹1,08,000નું અનુદાન, જે સાઉદી અરેબિયા સ્થિત મંત્રી પરિવારે પ્રેરણાદાયી ઉદાહરણ પૂરું પાડ્યું.

અધિક પુરુષોત્તમ માસની પૂર્ણિમા, દેવ દિવાળી મહોત્સવ અને રવિવારના શુભ સંયોગને કારણે ગુજરાતના પવિત્ર દ્વારકાધામમાં ભક્તોનો અખૂટ પ્રવાહ જોવા મળ્યો. દેશ-વિદેશથી લાખો શ્રદ્ધાળુઓ ભગવાન દ્વારકાધીશના દર્શન અને ગોમતી ઘાટમાં પવિત્ર સ્નાન કરવા ઉમટી પડ્યા હતા. સમગ્ર યાત્રાધામ ભક્તિમય વાતાવરણમાં ગરકાવ થઈ ગયું હતું. મંદિર તંત્ર દ્વારા ભક્તોની સુવિધા અને સુરક્ષા માટે વિશેષ વ્યવસ્થા ગોઠવવામાં આવી હતી.

સાબરકાંઠાના ખેડબ્રહ્મા સ્થિત અંબિકા માતાજીના મંદિરે અધિક જેઠ પૂનમે ભક્તોનો મેળાવડો જામેલો જોવા મળ્યો હતો. માણસાના એક ભક્ત દ્વારા માતાજીને કમળ પર બિરાજમાન સ્વરૂપમાં અન્નકૂટ અર્પણ કરાયો હતો. રવિવારે આ વિશેષ પૂનમ હોવાથી ગુજરાતભરમાંથી મોટી સંખ્યામાં શ્રદ્ધાળુઓ દર્શનાર્થે ઉમટી પડ્યા હતા. સવારે 6:30 કલાકે યોજાયેલી મંગળા આરતીમાં ભક્તોની ભારે ભીડ જોવા મળી હતી, જેના કારણે મંદિર પરિસર ભક્તિમય બન્યું હતું. ભક્તોએ માતાજીના દર્શન કરીને કૃતાર્થતા અનુભવી હતી.

પાટણ શહેરના જુનાગંજ વિસ્તારમાં કર્મકાંડી બ્રાહ્મણ સંગઠન દ્વારા પુરૂષોત્તમ માસ દરમિયાન ગરમીમાં રાહદારીઓને રાહત આપવા માટે એક ખાસ કાર્યક્રમનું આયોજન કરવામાં આવ્યું. જેમાં ૧૦૦૦ લીટર ઠંડી મસાલા છાસનું વિનામૂલ્યે વિતરણ કરવામાં આવ્યું. આ સેવાકાર્યનો લાભ રાહદારીઓ અને વેપારીઓએ લઈને પોતાની જઠરાગ્નિ તૃપ્ત કરી. સંગઠનની આ માનવીય સેવાને લોકોએ ખૂબ વખાણી.

પાટણ બ્રહ્મા સમાજના અગ્રણી અને જગન્નાથ મંદિર ટ્રસ્ટના ટ્રસ્ટી સહિત વિવિધ સંસ્થાઓ સાથે સંકળાયેલા રોટેરીયન વિનોદભાઈ જોષીને બેસ્ટ રોટેરીયન એવોર્ડથી સન્માનિત કરવામાં આવ્યા છે. વિનોદભાઈ જોષીને બેસ્ટ રોટેરીયન એવોર્ડથી સન્માનિત કરવામાં આવતાં પાટણ રોટરી પરિવાર તથા જગન્નાથ મંદિર પરિવાર સાથે તેમના સ્નેહીજનો દ્વારા ખુશી વ્યક્ત કરાઈ છે. જેથી એવોર્ડ હાંસલ કરનાર વિનોદભાઈ જોષીએ પણ તમામ શુભેચ્છકોનો આભાર વ્યક્ત કર્યો હતો.

પાટણના ત્રણ દરવાજા નજીક આવેલી બાલકૃષ્ણલાલજી (માજી મહારાજ) હવેલીમાં અધિક માસ અને ઉનાળાની ઋતુ નિમિત્તે ઠાકોરજીને શીતળતા અર્પણ કરવા વિવિધ ધાર્મિક મનોરથોનું આયોજન કરવામાં આવ્યું છે. અહીં ભગવાન કૃષ્ણના નામસ્મરણ, કીર્તન અને ભક્તિમય કાર્યક્રમો યોજાઈ રહ્યા છે. નાવ મનોરથ, યમુનાજી ઝૂલો, સફેદ ઘટા, ખસખાના, શરદોત્સવ, અન્નકૂટ, માનસી ગંગા, પુષ્પવિતાન અને કેરી મનોરથ જેવા વિશેષ ઉત્સવો ભક્તોના આકર્ષણનું કેન્દ્ર બન્યા છે. આ ધાર્મિક કાર્યક્રમોમાં ભાગ લેવા માટે દૂર-દૂરથી વૈષ્ણવો ઉમટી રહ્યા છે. હવેલીના મુખ્યાજી, ટ્રસ્ટીઓ અને સેવાભાવી વૈષ્ણવો દ્વારા તમામ આયોજન અને વ્યવસ્થાઓ સુચારુ રીતે સંભાળવામાં આવી રહી છે.

લીમખેડા તાલુકાના નાન સલાઈ ગામે પાટીદાર સમાજ દ્વારા પવિત્ર અધિક માસ નિમિતે તા.25થી 31 મે દરમિયાન શ્રીમદ્દ ભાગવત કથા યોજાઈ છે. જેના પ્રારંભે પોથી તથા કળશ યાત્રા યોજાઈ હતી. વ્યાસ પીઠ પર પૂ.સ્વામી અનંત રામજી મહારાજ સંગીતમય શ્રીમદ ભાગવતનું રસપાન કરાવી રહ્યા છે. કથા સાથે રોજ શ્રીમદ્દ ભાગવત કથાના પાત્રોની વેશભૂષા સાથે વિવિધ ધાર્મિક કાર્યક્રમો, સુંદર કાંડ, ભજન સંધ્યા, ડાયરો, આનંદનો ગરબો વગેરે પણ યોજાય છે. કથા શ્રાવણ માટે આવતા ભક્તો માટે મહાપ્રસાદનું પણ આયોજન કરાયું છે. શ્રીમદ્દ ભાગવત કથામાં દુધિયા, મુવાડા, વરોડ, લીલવા, રણીયાર સહીતના ગામોના પાટીદાર સમાજના ભક્તો કથા શ્રાવણ કરવા આવી રહ્યા છે.

દક્ષિણ મુંબઈના 12મી ખેતવાડી સ્થિત દિશા રેસીડેન્સી ખાતે જૈન સંત પદ્મદર્શનસૂરિજી મહારાજ અને તેમના શ્રમણવૃંદનું ઢોલ-નગારા સાથે ભવ્ય સ્વાગત કરવામાં આવ્યું હતું. આ પ્રસંગે પરિવારજનો, સમાજના આગેવાનો અને મોટી સંખ્યામાં શ્રદ્ધાળુઓ ઉપસ્થિત રહ્યા હતા. પોતાના પ્રવચનમાં પદ્મદર્શનસૂરિજીએ જણાવ્યું કે સંતોના સાનિધ્યથી જીવનમાં નવી ઊર્જા અને શાંતિ આવે છે. તેમણે સંપત્તિ કરતાં ગુણોને વધુ મહત્વ આપવાની, જરૂરિયાતમંદોને સહારો આપવાની અને પ્રભુ તથા સદગુરુ પ્રત્યે સમર્પિત જીવન જીવવાની પ્રેરણા આપી હતી. તેમણે કહ્યું કે સાચું ધન આંતરિક ગુણો અને આધ્યાત્મિક સમૃદ્ધિમાં રહેલું છે.

દેવભૂમિ દ્વારકામાં આવેલા પ્રસિદ્ધ દ્વારકાધીશ જગતમંદિરના શિખર અને જર્જરિત ભાગોના પુનઃજીર્ણોદ્ધારની કામગીરી હજુ શરૂ ન થતાં ભક્તો અને સ્થાનિકોમાં નારાજગી જોવા મળી રહી છે. વર્ષ 2024માં ભારતીય પુરાતત્ત્વ વિભાગ દ્વારા મંદિરનું 3D સ્કેનીંગ અને ટેકનિકલ સર્વેક્ષણ કરવામાં આવ્યું હતું, જેમાં શિખર, ફ્લોરિંગ, સભામંડપ અને અન્ય ભાગોના પથ્થરો બદલવાની જરૂરિયાત દર્શાવવામાં આવી હતી. આશરે ₹18 કરોડના ખર્ચનો અંદાજ પણ તૈયાર થયો હતો. જોકે બે વર્ષ બાદ પણ કામગીરી શરૂ ન થતાં મંદિરના સંરક્ષણ અંગે ચિંતા વધી છે. ભક્તો તાત્કાલિક પુનઃજીર્ણોદ્ધાર શરૂ કરવાની માંગ કરી રહ્યા છે.

માનવ સેવા યુવા ગ્રુપ દ્વારા બકરી ઈદ નિમિત્તે અબોલ પશુઓ માટે 'કરુણા દિવસ' તરીકે એક અનોખા કાર્યક્રમનું આયોજન કરાયું. આ પહેલ હેઠળ, પશુઓને 2621 કિલો મિક્સ ફ્રુટ અને 500 કિલો શાકભાજી ખવડાવવામાં આવ્યા. જોરાવરનગર, રતનપર અને સુરેન્દ્રનગર સહિત વિવિધ સ્થળોએ યોજાયેલા આ કાર્યક્રમમાં 'જીવો અને જીવવા દો' ની ભાવના સાથે જીવદયાનો સંદેશ અપાયો. કાર્યક્રમનો પ્રારંભ જૈન સાધુ-સંતોના આશીર્વાદ સાથે થયો, જેમણે યુવાનોના કાર્યને બિરદાવ્યું. આ ભગીરથ કાર્યક્રમથી પશુઓ પ્રત્યે સંવેદના દર્શાવવામાં આવી.

હરિદ્વાર તીર્થ ખાતે પાટણના શ્રી શ્રીહરિ સેવા પરિવાર દ્વારા 18મા શ્રીમદ ભાગવત મહોત્સવનો મંગલ પ્રારંભ થયો છે. અધિક માસમાં સામાન્ય માણસ પણ તીર્થયાત્રા સાથે કથા શ્રવણ કરી શકે તેવા ઉદ્દેશ્યથી આ આયોજન કરાયું છે. મહોત્સવના પ્રારંભ પૂર્વે હરિદ્વારના રાજમાર્ગો પર ભવ્ય પોથીયાત્રા નીકળી હતી, જેમાં પાટણના ભાગવતીઓના ભક્તિનાદથી વાતાવરણ ગુંજી ઉઠ્યું હતું. ભાગવતાચાર્ય શાસ્ત્રી દિલીપભાઈ આચાર્ય કથાનું રસપાન કરાવી રહ્યા છે, જે કથા શ્રવણથી ભગવાનની અનુભૂતિ અને મોક્ષ પ્રાપ્તિ સુલભ હોવાનું જણાવી રહ્યા છે.

વડોદરાના અપનાઘર આશ્રામ, ગોકુલપુરા ખાતે પુરુષોત્તમ માસ નિમિત્તે મહામંડલેશ્વર કર્મયોગી સંજયગિરીજી મહારાજ ગુરુ મહાયોગી પાયલોટ બાબાની ભૂ-સમાધિ તપસ્યા ચાલી રહી છે. વિરલ ચૌધરી અને અરવિંદભાઈ બ્રહ્મભટ્ટના નિમંત્રણથી ચાલી રહેલી આ તપસ્યાનો આજે ત્રીજો દિવસ છે. મહારાજ અનેક કલાકો સુધી મૌન સાધના અને ધ્યાનમાં તપસ્યા કરી રહ્યા છે. તાજેતરમાં ૨૫ મેના રોજ બે કલાક, ૨૬ મેના રોજ ત્રણ કલાક અને આજે સવારે ત્રણ કલાકની સમાધિ લીધી હતી.

પાવી જેતપુર સંઘમાં પ્રસિદ્ધ જૈનાચાર્ય અશોકસાગર સુરીધરજી મ. સા. અને પાંચ આચાર્યો સાથે ૧૦ મુનિ મહારાજનું આગમન થયું. જૈનશ્રાવકોએ તેમનું ભાવભર્યું સ્વાગત કર્યું. જૈન દેરાસરના દર્શન બાદ, સનરાઈઝ સ્કૂલમાં મ. સા.નો સ્થિરવાસ થયો. પૂ. પ્ર.પ્ર. આચાર્ય સાગરચંદ્ર સાગર સુ. મ. સાહેબે 'વસુધૈવ કુટુંબકમ' સૂત્રના મહત્વ પર પ્રકાશ પાડ્યો, જે માત્ર માનવો પૂરતું સીમિત નથી, પરંતુ સમગ્ર જીવસૃષ્ટિ સાથેના સંબંધનું સૂત્ર છે.

સાબરકાંઠા જિલ્લાના હિંમતનગર શહેર અને આસપાસના વિસ્તારોમાં ગુરૂવારે પવિત્ર બકરી ઈદના તહેવાર નિમિત્તે મુસ્લિમ બિરાદરો દ્વારા 26 જેટલા સ્થળો પર શાંતિપૂર્ણ માહોલમાં નમાજ અદા કરવામાં આવી હતી. હિંમતનગરની મસ્જિદો અને ઈદગાહ ખાતે પણ ભક્તિભાવપૂર્વક ઈદની ઉજવણી થઈ હતી. આ તહેવારને કારણે અનેક વેપારીઓએ પોતાની દુકાનો બંધ રાખી હતી. સવારે 6:45 થી 7:30 દરમિયાન અલગ અલગ સમયે નમાજ પઢવામાં આવી હતી, જેમાં ખેડ તસિયા રોડ પર આવેલી ઈદગાહ મુખ્ય હતી. પોલીસ દ્વારા ચુસ્ત બંદોબસ્ત ગોઠવવામાં આવ્યો હતો.

પવિત્ર પુરૂષોતમ માસ દરમિયાન યાત્રાધામ દ્વારકામાં સુપ્રસિધ્ધ ભગવાન દ્વારકાધીશ જગતમંદિરમાં ધાર્મિક કાર્યક્રમો ચાલી રહ્યા છે. અધિક માસમાં પણ વિવિધ ધાર્મિક ઉત્સવો ભક્તિભાવપૂર્વક ઉજવાઈ રહ્યા છે. જેના ભાગરૂપે ગુરૂવારે વામન દ્વાદશી નિમિત્તે વિશેષ ધાર્મિક કાર્યક્રમો યોજાયા હતા. જગતમંદિરમાં બપોરે 12.00 વાગ્યે ઉત્સવ આરતી સાથે વામન જયંતિના વિશેષ દર્શન યોજાતા સમગ્ર મંદિર પરિસરમાં ભક્તિમય વાતાવરણ છવાઈ ગયું હતું. મોટી સંખ્યામાં ભાવિકો ઉમટી પડ્યા હતા અને ઓનલાઈન માધ્યમો દ્વારા પણ લાખો ભક્તોએ લાભ લીધો.